J'm'èsvonni quasi hier quand Laizé m'dit qui n'restait pon pus d'chinq ou six coal-boxées d'tcherbon sous l'dégré, et qu'j'éthais a passer siez Rossigno pour en qu'mandé eunne cherge! Coumme si nou vendrait l'tcherbon au tounné, achteu! Quement, que j'lis dis; ch'est a la livre qu'chès Messieux l'vendent achteu dans des pouques de papi, et pouque est comprinze dans l'paids. Et ch'n'est oquo qu'a lus pathents et ès Messieux d's'Estats - viyant qu'il est li mème d'la consortie qui consent a en fourni! et pas a crédit, oquo d'pus. Not for Joe! Faut payi cash dans la main, et si-en-cas montré san livre de banque pour prouvé qu'nou n'est souos l'fou.
Acaté du tcherbon! Mais tu n'sais don pon, pouore innocente que tu ès, qu'les Estats ont mins saisie-arrèt sus ch'qu'en reste en Jerri - a ben près, treize tounnieaux - et qu'n'ya qu'yeux et Moussieu Tremel (viyant qu'chest la qui dinent) et les siens qui n'trouvent pon a r'dithe sus l'pité d'la Loué sus l'Inducation, qui sont alloués d'en avé. Et pas fort a la fais, oquo d'pus!
Acaté du tcherbon! Je s'ais mains èsnervé d'allé siez Walden t'acaté eunne belle neuve chaine et montre en or, et lis d'mandé de l'mertchi sus l'conte (ch'est rin qu'eunne supposition, tu comprends: Djieu merci, j'sis pas oquo si bégaud, qué d'allé coumme cheunna d'men pas dans l'office d'autchun marchand, dithe tout haut et sec: un tounné d'tcherbon au pus tôt pour Madame Pain, au Morning News! Djantre! Ch'est pas d'mème qui faut s'y prendre, au jour d'anniet, si nou n'veurt ristchi de s'vaie mins dans la rue par la pé du co. Ch'est a vouée basse, un p'tit a la fais, qu'faut ristchi d'lus dithe pour tché nous est v'nu les vaie. Y'a Sam Rèsté, Samdi passé! Y s'en vint en ville ov sa van et eunne casse a savon pour tachi d'avé du tcherbon. Y laissi san j'va auprès du ouaisbridge et s'en fut, les mains dans ses pouchettes, fliaounné endrét les stores en feummant sa cigare. Justement, Mess Rouessi 'tait sus l'pavé. Les v'la qui s'mettent a paslé d'choses et autres, des d'gats qu'la mathée a fait a Saint Cliement, d'appathence de flieurs sus les péthiers ch't'année, d'la fille a Joe Podèstre qui n'veurt pon aider a sa memée a traithe au matin et betot né v'la Sam qui dit qu'il 'tait v'nu en ville, qu'il avait acaté eunne casse a savon pour mettre eunne poule a coué, et qu'autant faithe, et pour sauvé sa course, s'n idée était d'la remporter plienne de tchiq'chose...
Mess Rouessi dit que, sem'n'age, ch'tait eunne bouonne idée j'pouvons t'la remplyi d'pétuthe, de kainit, de trèffliette, ou d'chucre. J'avais quasi pensé d'vos d'mandé s'ou pouoraites m'èspeigni un chent d'tchérbon, s'fit Sam.
Du tcherbon! s'fit Mess Rouessi y'a longtemps que j'soummes audsens! not' trolli a deux chv'aux fut porté l'dernié d'mie-cabot au recteu d'St. Jean, avant hier!
Tout d'mème, eunne heuthe après chu d'vis la, Sam er'cachi siez li ov un cabot d'tcherbon dans sa casse. Il avait fallu montré sa bourse plienne de louis (y v'nait d'vendre d's'animaux a la fèthe) promettre de cachi toutes ses poummes de terre au store l'èsté tchi vint, dounné s'n'ordre de guano pour 1913, s'engagi a voté du bord des rouoges a la prechenne election, porté eunne cherge de vraic dans l'gardin au marchand; et jé n'sais tchi oquo d'pus.
Mais tout d'mème, oprès avé dit tout cheun'chin a Laizé, et coumme n'ou n'peut coutchi sans tcherbon, j'm'en fut vaie tchès qu'en 'tait.
Du tcherbon! s'fit Mess Rouessi - Avous vos sous sus vous? et combin d'livres qui vos en faut? Et y m'emni dans sa store at m'montri c'qui lus en rhestait, muchi driethe eunne pile d'èstrain pour que les gens qui n'paient qu'a la saison n'le visse pon. Y'en avait ben sept ou huit chivthées - quazi tout du m'nu.
Et ch'est seulment viyant qu'ch'est vous et que j'soummes un mio pathents et qu'men fils r'vint tchiq' fais d'la chapelle ov vot' fille, Mess Pain, que j'vos en èspeigne, qui dit. Et ou vos n'allez payi cash, sans disconte, et un verre de tchiq' chose de caud. Et pis, que j'vos dise, ou vos n'allez l'emboulé vous meme dans eunne chiviéthe que j'vos pret'ons, dans eunne pouque a bran, pour que les gens n'sachent pon ch'que ch'est. Et dites a vot' missis d'allé douchment atou, car n'y'en étha pon d'autre d'ichin la fin du mais d'Mai.
Nos v'la dans d'bieaux draps! Pas d'tcherbon bétot, et, ch'est-tan-tchi, pas d'diné pour Piteur Pain. Si l'affaithe continue, j'm'en vais qu'mandé un tchinta d'bistchuit d'navithe pour nos gens. Mé, pour me souot'né les forches et poué continué a vos èscrithe du niolin, j'ithai diné touos les jours siez Couillard. Il a tout plien d'tcherbon.
Piteur Pain
Morning News 4/4/1912
Viyiz étout: