|
Dans un châté en France, un voleux, bein pressi, 'Tait à rempl'yi une pouque avec toutes sortes d'tchi. Des vases et des statues, des portraits, des bijoux, Des montres, d'l'argent'tie travaill'yie avec goût, Des jouettes pour ses garçons, d'la dentelle pour ses filles, Et des titres d'noblièche, et des contrats d'famille. Il avait fait main basse sur tout chein qu'i' voulait. L'propiètaith' 'tait mort d'un traitre coup d'couté Sa femme 'tait êvannie, sa fille 'tait vilannèe, Et l'voleux chantonnait en r'gardant ses mêfaits! Un autre voleux passi, errè coumme un lapin, Sauti par sus l'fôssè et traversit l'gardin. Nueue-tête et essouffliè, ses habits dêchithès, Saisi d'une peux mortelle, les yeaux touos êghethés: "Laisse ta pouque et sauve-tai, qu'i' heurli en passant. Car ne f'chin, souentre nous, toute une racachie d'gens, L'héthitchi du châté n'est pus d'autre un p'tit mousse, Il a happè une arme et le v'chin à mes trousses Et, avec li, s'en veinnent un tas de ses ammins Bin décidès d'nos pendre dès qu'i' nos éthont prins!" L'prumié voleux resti la becque et les yièrs ou'èrts, Endrait tout san butin, pensant ès parchounnièrs, Qu'il avait empliyè pour l'i'aidji dans sa tâche Et qu'étaient à s'rigaler d'vin, des fraits et d'gâche. I' lus criyi tout d'suite et raconti les faits Qu'l'autre voleux v'nait d'lis dithe à chez mauvais sujets. "I'pathaît, s'lus fit-i', qu'notr' scouade qu'était là bas Veint de s'trouver happèe dans un mio d'embarras. Notr' camarade Rupert a l'air tout êffritè Et, d'après s'n'appathence, il a 'tè maltraitè Il a des coups mèrtchis du haut au bas du corps. J'avions pourtant bein dit que l'Bouan D'jeu 'tait d'notr' bord! J'avions tuè l'vi d'ichin,mins sa femme en prison, Et dêbauchi sa fille, pour lus faithe une leçon. Mais l'fils, à ch'que j'veins d'ouï, veurt ach'teu' se r'binfrer Et prétend nos chasser d'ichin pour y rentrer! Dites mai, garçons, tchi ma' que j'pouorréthions lis faithe? Faut bûchi, saccagi et n'laissi rein driéthe!" "V'là qu'est bein, Prince Willy, rêpounnidrent le restant, Emportèz ch'qu'ou' pouvèz, prenèz tout d'ichin d'dans. Nous, j'avons des martcheaux, des bigornes et des haches; J'allons mettre tout chonnechin en brédelles et bédaches!" Et tandis que l'voleux qu'ils app'laient Prince Willy Ramassait d'autr' grand's pouques et s'mettait à l's'empl'yi Les parchounnièrs c'menchaient à bûchi à grands coups, Et saccageaient partout les meubl'yes couverts de v'lou's; Mettaient en mille brédelles pianos, mitheurs, portraits: Dêchithaient les tapis des plianchais et des d'grais; Salissaient, douoillaient, tout, êrachaient en juthant Tout ch'qui faisait l'châté être admithè des gens! Bétôt, dans tout l'châté, le d'sastre fut complièt, A forche d'capuchi, chaque voleux 'tait ennièt. Ils avaient êbrètchi deux-trais de lus ôtis. Et tout était en ruine et minchons souos lus pids! Lus chef, le Prince Willy, avait plien ses pouchettes De bagues, de chaînes en or et d'magnifiques attouettes De brôtches avec des perles, un tas d'boutons d'argent, Et pus d'un bieau coll'yi et pus d'un gros diamant. Ses pouques pliennes d'argent'tie 'taient trop pesantes pour li. Et ch'fut sus les tchéthiots que l'peûles les empili; - Pas d'trop bouan tchoeu in'n'tout, car i' s'mêfiait d'ses gens, Qui volaient avec li d'pis dêjà bein longtemps! "Portèz vite, i' lus dit, tout ch'la jusque siez mai; Et n'touchèz pas à rein, ou j'vous achouêmithai, Ou' s'sez rêcompensèz, s'ou' faites tout chein qu'j'ordonne. Mais n'd'sobéissèz pas, car jamais je n'pardounne!" Tout d'suite, au feu d'galop, ne v'là les tchéthiots hors Emportant tout l'butin, une grand' chèrge d'trésors, Et l'Prince Willy, restè parmi les autr' voleurs, Ermèrtchi qu'dans l'châtè, n'y'avait pus rein d'valeur! Nous entendait, au lliain, un continuel rounnais, Des coups, d'la galop'thie et les cris d'un tas d'vouaix, Des heurles et des hourras, qui s'rappréchaient bouan rond: Y'avait une fière bastaude tchic bord dans l's'envithons! Le Prince Willy grimpi sus la tour du châté Pour tâchi d'vaie coumment que l'affaithe se passait. Et quand i' r'dêvalli , avec d'affreux juth'ments: "Je crai qu'l'affaithe va mal, se fit-i', pour nos gens!" "Faut dêcamper d'ichin, tout d'suite, j'dév'thaîmes être hors, Je soummes quâsi cernès, j'en crains, de touos les bords. Mais d'vant nos en aller, j'avons occouo d'tchi faithe! Vite, apportèz du geon, d'l'êtrain et d'la feuegiéthe, D'la paraffine, d'la poudre! Fouorrez-en dans l's'allèes, Dans les chambres et l'parleux, et dans toutes les montèes! Faut l'brûler, lus châté, faut l'râzer jusqu'à tèrre, Quand i' veindront ichn, i' n' restétha qu'des pierres!..." Le Prince et l's'autr' voleurs sont contents d'lus travas, Le châté brûle, aussin, dépis l'haut jusqu'au bas! I' le r'gardent d'driéthe un large et haut fossè, Yoù qui craient qu'pour le temps i' sont bein en seuth'tè... Mais l'fils du vièr Chât'lain, ses ammins ses vaisins, Arrivent ov des bâtons, couothant par touos les c'mins. Le Prince Willy 'tait fort, 'tait traître et bein armè; D'accord avec san pèthe, il a coummins l'forfait! Mais la vengeance appréche et n'montrétha pas d'grâce Es voleurs couronnés, qui font les crimes en masse!! Elie Sept. 1918 |
Viyiz étout: