|
A Londres, y'où qu'y'a des Palais, Des Cathédrales, des Tours, des grands Théâtres, Des Salles de Parlement, des Gall'ries et Musées, Des Monuments, l'Adjulle de Cleopatre; Y'où qu'est la Bourse, Madame Tussaud, Le mont d'Ludgate et l'Hippodrome; Et "Dirty Dick" et l'Rotten Row, Et l'Grand Saint Paul avec san Dôme; Et la Banque d'Angliéterre étou Qu'est ernoummèe partout pour être Absolument toute plienne de sous - Jusque, nou m'dit, sus l'siège des f'nêtres! Et l'Hôtel Cecil (y'où qu'nos Grands A nos frais tchic fais, font bouanne chère, Quand l's Êtats sont en hèrtchinant) Et les bieaux lions d'Trafalgar Square; Et les auberges de Holborn, don! Qui sont mèrtchis sus toutes les cartes, A Charing Cross - ou envithon - De d'la y'où qu'un tas d'tramways partent; Et l'Lincoln - l'hôtel d's'Avocats - Y'où qu'ils ont seul droit d'aller baithe Un p'tit café oprès lus r'pas, Comme j'allons nous siez Ordinaithe; Et Piccadilly, qu'j'oubliais, Le cirque annoncé en grand' lettres Sus toutes les 'bus et les tramways Aussi haut coumme i' peuvent le mèttre; Et un tas d'autres belles pièches étou Qu'nou-z'a veu des chents fais, sans doute, Quand en s'proum'nant, nou faisait l'tou' D'la Capitale et d'ses belles routes. A Londres, y'où qu'est chounna, Les gens sont bein calmes et trantchilles I' continuent lus veint et va Et lus p'tit commerce à la ville. Ils ont nommé, ch'est bein certain, Deux-trais douzaines de Counnètabl'yes - Spéciaux - pour vaie que tout va bein Et garder les gens respectabl'yes, Ch'la, nou l'comprend, ch'est juste assez, Faut garder d'l'ordre dans ses affaithes Mais nous en Jerry, j'soummes settlès, Nou l'sait, d'une bein pus rude maniéthe! Touos nos garçons sont en soudard Armès des pi'ds jusqu'à la tête Montant la garde, bouanne heuthe et tard, Et dormant parfais sus la biête! Nos jeunes femmes sont en orfantè D'senti' lus hoummes hors de la sorte Et hardi d'yeux, dès qui fait nièt Touannant bein vite la clié dans la porte. Nos clios s'ent vont en perdition La sèrcl'ye a êtouffè nos raves Pas moyen d'arrêter l'meurdron! Eche que nos autoritès l'savent? L's Allemands ont fait, siez nos vaisins, Elie
|
Viyiz étout: