Les Pages Jèrriaises

Caouain et la pétrole

Si jamais j'ai 'té erconnaissant pour les deux faillies ailes qui m'ont 'té données pour transporter ma pouore carcasse d'une carre et d'l'autre, ch'a 'té ches jours ilo. Pensez don, l'avantage que ch'est de pouver viagi dans touos les coins d'l'Ile sans l'aide d'un "motor-car!"

Ch'est, sans doute des ôtils qui sont bain utiles mais nou n'peut pas les faithe rouler sans pétrole, et la pétrole est dangereuse, ch'est un litchide qu'est infliammable comme tout et i' faut les pus grandes précautions quand nous est à l'manier. Ch'est un produit ettou de tchi que l'prix varie hardi et en temps d'djerre il est susceptiblye à hauchi de pus en pus. Naturellement les siens qui s'en servent en accatent une grande quantité quand i' peuvent l'aver à bouan marchi, mais comme i' y a des reglements qu'interdissent à tchi qu'che sait d'en stotchi pus qu'une certaine quantité i' y a des risques de s'faithe happer par les autorités et d'aver à payi des fortes amendes.

V'là justement chein qui vaint de s'arriver à ches dernyi et au moment d'êcrithe i' y a dêjà chinq messieux qui ont passé sans pâler d'une djaingue d'autres que nou dit qui sont également coupablyes et qui sont pour compathaître tchiqu'uns des préchains jours. Je n'ai rain à en dithe de cheux-là, car je pouorrais p't-être bain me trouver dans l'embarras pour aver écrit sus des causes qui sont oquo, comme nou dit, "sub judice."

Les chinq qu'ont 'té présentés jusqu'acheteu sont deux tchéthetchers, un Counaîtablye, un êcrivain, et un rentchi.

Ches treis derniers ichin ont payi une amende de chinq louis châtchun, les deux tchéthetchers n'en ont pas r'pathé justement si bouan marchi il est vrai, i' pathaît que iun en attrapi pour chent chinquante louis et l'autre pour chent, mais i' n'faut pas oublier qu'ils eurent l'honneur de compathaître devant la Cour Royale, ieux, tandis que l's autres furent jugis par le tribunal qu'est fréquenté par les communs criminels.

Comme je vos ai dit pus haut, je sis bain erconnaissant de pouver me servi d'mes ailes et que je n'ai qu'faithe d'un "motor-car," car ch'est bain, seux que si j'en avais ieu iun, le nom de Caouain aithait fidguthé parmi les prévenus.

* * *


I' n'faut pas aller satchi d's allumettes sus la cauchie d'Gouorey acheteu par exemplye!

Un farceux, l'aut'e jour, opprès aver liu les r'merques de Moussieu l'Bailli, se mins dans la tête d'aver un mio d'fanne avec les pêtcheurs de par-là, ch'est pourtchi i' s'en fu s'promener sus la cauchie.

Arrivé dans l's envithons des hôtelles, il aperchu un p'tit troupé d'pêtcheurs qui bavardaient en fumant lus pipe. I' s'appréchi d'ieux et lus dit:

"Eh bain garçons, et comment qu'est l'vent à matin?"

Et en disant chenna, i' dêhalli une bouaîtée d'allumettes de sa pouchette et en satchi iune qu'i' tint en haut pour vaie si l'vent la dêteindrait.

Les pêtcheurs comprinrent bain la manoeuvre et deustrais d'ieux se j'tirent sus li et l'prinrent par la pé du co et par le fond d'ses braies et s'n allaient justement le pitchi à l'ieau, quand il en sorti iun tout à la hâte de la "British" et lus criyi "Hi, arrêtez, garçons! Chenna n'vos sert pas d'rain de faithe chenna! Amenez le pûstôt par dedans et et j'allons l'faithe nouos payi un couplye d'rondes!"

Les autres trouvirent que che n'tait pas du tout une mauvaise idée, alors i' traînithent le pouore baloque dans la barre et burent à sa santé pour une démiuthe de temps.

I' y en arrivait d'autres à chaque instant qui n'lus faisaient pas prier deux fais pour joindre le parti, alors les frais s'acchumulaient tout l'temps, et quand not'e farceux vint à settler, il en eut justement pour treize chelins et vingt-deux sous.

Ch'est pourtchi, garçons, prenez m'n avis, et si ous allez du côté d'Gouorey, sus toutes choses, ne pâlez pas du vent, ni n'satchiz pas d'allumettes, car comme dit l'Angliais:

"It is a dangerous practice."

Caouain
La Chronique de Jersey 1/4/1916
 

Viyiz étout:

 

Les Pages Jèrriaises