Le Procès du Prussien

Racontè par ELIE

Le Tribunal de l'Opinion Universelle 'tait plien d'monde. L'entrée avait 'tè laissie libre à toute persounne, houmme femme ou êfant, qu'avait la conscienche nette et l'esprit ouvert à la conviction.

Bien que nou fusse au 20e siècle et que certains prédicateurs eussent prêchi dépis longtemps que l'monde était perdu d'pouorreté et excessivement vicieux, i' s'était occouo trouvè une foule de gens qu'avaient droët d'accès, à tel point que n'y'avait pas yeu d'run pour en ac'moder le d'mié-quart. Les premièrs venus avaient 'tè, coumme de raison, les prumièrs servis, et les autres, à lus grand r'grèt, n'avaient pas peu entrer. Mais i' n'en avaient pon fait pus diffitchulté pour chounna, car chatchun avait confiance dans l'jugement d'san vaisin. Entre gens qui s'respectent, ch'est tréjous d'même et l'monde v'nait, dépis pus d'quatre ans, d'être êprouvè dans un creuset qu'avait l'pouvair d'faithe dispathaître la crache et toute les imputh'tès des siens qu'en avaient sorti avec hounneu.

Le procès qui s'en allait être jugi en 'tait y'un d'la pus haute importance. I' s'agissait d'savair si un individu avait l'droët, simpl'yément parce qu'il 'tait fort et traître et mauvais, de faithe tout l'ma' qu'i' voulait sans être erchèrchi et puni coumme i' l'méthitait, et avec li, les siens qu'étaient parchounnièrs dans sa mauvaitchi. Jamais Cour n'avait yeu l'air si solennel. Jamais l'public n'avait pathu si sérieux. Jamais les Juges n'avaient senti autant lus responsabilitè. Jamais Jury pus grave n'avait prins l'serment de dithe si un prév'nu 'tait coupabl'ye ou innocent du crime de tchi qu'il 'tait atchusè.

Le Président d'la Cour avait nom Justice. Il avait deux Assesseurs, qu'avaient nom Droët et Libertè.

Les témoins à chèrge 'taient si nombreux que nou n'pouvait pas les compter.

Les témoins à dêchèrge 'taient touos emminottés, car lus mêfaits les avaient dêjà faits condamner et ch'tait par contrainte qu'i' v'naient d'vant l'Tribunal, à la d'mande du prév'nu.

L'Avocat pour la d'fense avait nom Bat-d'la-Goule; i' pliaidjait d'office et, pour chutte cause-là, avait hallé sa robe, à seule fîn qu'ou' n'fusse pas salie.

La Partie Publique avait nom Châtiment; l'Autorisé s'app'lait Evidence, et l'Vicomte, Rétribution.

Nous éthait ouï une souothie couorre quand l'prév'nu entri, marchant entre deux agents d'police.

Ch'tait un grand corps, blond, ov' de grosses lèvres et une moustache ertroussèe en pointe, coumme un p'tit doubl'ye paratonnerre. Il avait l'air hautain, dans s'n'habit gris-vert occouo tout touoill'yi d'pité, triyi ichin et là, rapiéchi à difféthents bords et mèrtchi de rouoges tacques, qu'avaient une maniéthe d'odeur de sang. Ses grand's bottes à êp'thons sounnaient sus l'pavage de la Cour coumme des coups d'marté sus un coffre en pliomb.

I' marchait drait d'vant li, avec un r'gard de haine, les yièrs en feu, les dents frumèes bein du' driéthe ses lèvres un p'tit mio r'troussèes. Quand i' 'passait, les hoummes frumaient lus poings et le r'gardaient dans l's'ièrs, coumme s'i' s'attendaient à l'vaie s'avoler pour les assoummer; les femmes se dêtouannaient en trembliant; les enfants êprouvaient à s'muchi et s'engroutaient à plieuther.

I' souorit coumme s'il 'tait content en passant le long d'un p'tit êfant et d'une vielle femme en deu', et se r'dréchi de toute sa hauteur, ov' un air satisfait, quand i' r'mèrtchit un janne garçon qu'était tout estropiè.

I' salui le Président, mais n'le r'gardi pas en fache, s'arrêti en d'vant de s'n'Avocat, et s'assiévi.

La Cour entrait justement et l'Greffi fit la priéthe.

Le prév'nu se l'vit tout d'un coup, joignit les mains, montri l'blianc de ses yièrs et r'gardi en haut, tout l'temps qu'ou' duthi, faisant la mine d'être un houmme de grande dévotion et barbélottant li-même tchic' chose entre haut et bas.

La priéthe finie, tout l'monde se rassiévit, sinon les agents, qui se t'naient de chaque côté du prév'nu et qui n'cessaient pas d'avair les yeux sus li.

Le Président fit un signe au prév'nu.

- Lév'ous, i' lis dit.

Le prév'nu se l'vit, drait coumme un piquet.

- Votr' nom? fit l'Président.

- Prussien, Fils d'Prussien, Péthe de Prussien, rêpounnit l'prév'nu, sècqu'ment.

- Ch'est mai qu'ai l'hounn... ou pustôt la tache, de le d'fendre, dit l'Avocat Bat-d'la-Goule. A cause de la natuthe du procès et d'la persounnalitè d'man client, j'n'ai pas voulu mettre ma robe et j'vos r'mercie, Moussieu l'Président, de m'avair accordè la permission de la laissi d'côtè pour annièt.

- La robe d'un avocat dait tréjours rester sans tacque, dit l'Président. Je n'pouvais, don, pas vos d'mander d'la mettre pour chutte cause ichin et ch'est pour l'hounneur de la profession que j'vos rêpounnit, hier, qu'ou pouorrethiez faithe comme ou' l'souhaittiez.

L'Avocat Bat-d'la-Goule et l'Bâtonn'yi, qu'était à côté d'la Partie Publique, saluidrent le Président, pour le r'mercier de sa sollicitude et d'sa considéthâtion.

Le Président prins la pathole.

- La cause qui veint annièt devant l'Tribunal de l'Opinion Universelle, i' dit, est une cause toute spéciale - pas se'lment en raison d'la natuthe des faits à êtablyi mais tout autant au point d'veue des conséquenches qu'en dêcoulent.

Les deux Assesseurs fidrent un p'tit signe de tête pour approuver le Chef Magistrat.

- Je n'ai pas l'moindre droët, continui l'Président, ni même le moindre d'si, de cherchi à influencer sait la condite de la poursuite par la Partie Publique, sait l'opinion du Jury, sait l'avis de mes Assesseurs. A touos êgards, le procès qui s'ouvre es'sa condi' dans la pus stricte et la pus impartiale légalitè. Mais à cause même de l'importance de l'affaithe, je voudrais rapp'ler à tous les siens qu'ont à y prendre part qu'ils ont tous une grande responsabilitè. Ch'est à yeux de s'en dêchèrgi consciencieusement, sans haine, malice ou préméditâtion.

Le Protchuleux, le Chef du Jury et l'Avocat Bat-d'la-Goule fidrent un salut, en signe qu'i' n'oubliethaient pas les r'mèrques du Président.

Le prév'nu, li, ergardait l'tou' d'la Cour, et touistait les buts d'sa moustache, en faisant la mine de n'être pon gênè de ch'qui s'n'allait s'passer.

Le Président continui: Pour la prumiè fais dans l'histoëthe du monde, j'avons, annièt, un jury mixte. Certaines des chèrges qui sont inscrites dans l'enditement, sont, en effet, d'une nathuthe toute partitchulièthe et concernent l'honneur et la responsabilitè morale des femmes. Certaines tchestchons s'en vont être souol'vèes sus tchi que l'opinion des hoummes pouorrait n'être pas suffisamment êcliaithie. Des femmes seules sont à même de savair apprècier certains des faits qui sont à la chèrge du prév'nu et à tchi qu'i' pliaide non coupabl'ye. Ches faits-là, ches tchestchons-là, sont d'natuthe, il est vrai, à mettre la modestie et la pudeur naturelle des femmes qu'en êcout tont les dêtails à une rude êpreuve, mais j'soummes arrivès à une êpoque yoù qu'les femmes ont de nouvelles responsabilitès, en même temps que de nouvieaux droëts. Ch'est en tchi, dans une cause qui s'compose à un si grand point de faits et de présomptions concernant des femmes et des êfants des femmes sus l'Jury. Et la Cour a constatè avec satisfaction que pas y'une des dames qu'ont 'tè appelèes, n'a erfusè d'siêgi, bieau que la loë diche positivement que nulle femme ne pouorra être contrainte de servi s'ou n'l d'sithe pas.

Le Président assèrmenti l'Jury. Le Chef avait nom Conviction, et parmi les siens et les siennes qu'étaient avec li, y'avait MM. Juste, Recta, Inflexibl'ye, Impartial, Sens-Commun, et des dames Prudence, Modestie, Maternitè, Charitè, Sollicitude et Innocence.

Les témoins fudrent assermentès et la Partie Publique présenti s'n'enditement.

Le prév'nu Prussien, Fils d'Prussien et Pèthe de Prussien, avait 'té saisi (en flagrant délit) par le Chantgni Victor Allié et présentè en Justice par le Counnétable de la pâraisse de l'entente.

Il 'tait atchûsè d'avair, d'abord, dans telle période devant le 31 Juillet 1914 que la couôtume sus la préscription permettait d'mentionner, préméditè et prépathè des armes et armements, bein au delà de ses besoins légitimes, en veue tant d'atteintes sus la propriêtè de ses vaisins à droëte et à gauche que d'attaques et d'outrages sus lus persounnes individuelles et collectives:

D'avair, à la dite date du 31 Juillet 1914, de propos délibéthè et d'connivence avec gens d'san mépas, à ses gages et souos sa contrainte, décliathè une dghèrre d'oppression, de tyrannie et d'ravage, et d'avair, dès lors, mins en mouvement touos les moyens d'armes et d'armements mentionnès au prumiè chef de l'enditement pour opprimer, tyranniser et ravagi tout alentou d'li, pour dêtruithe, saccagi ou voler les beins d'autrui et pour assailli, achouêmi, êtouffer et assassiner des gens qui n'y avaient fait autchun tort ni dit autchun ma':

D'avair, notamment, dans l'couothant du mais d'Août, 1914, de propos délibéthè, dêchithè certain contrat de bail à fin d'héthitage concernant la propriêté d'la famille Belgique, à tchi qu'san grand'-grand'pèthe avait mins sa signatuthe coumme témoin: d'avair injustement ercliamè et illégalement exercè une fatchulté d'passage pas au-d'sus d'la propriêtè de tchi qu'il 'tait disposè dans l'susdit contrat: d'avair brûlè, abattu, et dêtruit les immeubl'yes qui s'trouvaient sus ladite propriêté; d'avair criminellement appropriè à s'n usage et enlevè illégalement des argents, valeurs, meubl'yes et effets qui y'étaient pliéchis: le tout au préjudice de la Dame Belgique.

D'avair insultè et injuriè ladite dame, assoummè et tithè ses domestiques, emm'nè ses garçons en escliavage, livrès des filles ès outrages les pus criminels et vilannè et êtrangl'yi ses servantes:

D'avair forchi ladite Dame Belgique à lis r'mettre, sans lis dounner de r'chu ni de r'counnaissance, touos ses titres et les argents qu'oulle avait à la banque; de l'avair forchie, par m'niches, à travaill'yi pour li, du matin au sair, quatre ans d'temps et au d'là, lis prenant même les provisions qu'étaient dans s'n'armoëthe, le lard qu'était dans san saleux, le beurre qu'était dans sa terrine, la graisse qu'était dans san pot, et les patates qu'étaient dans ses bathis; laissant, d'la sorte, ladite dame dans la pus grand' disettes et en dangi d'mouothi d'faim et l'obl'yigeant d'être à la chèrge de la pâraisse de l'Entente, yi et toutes les persounnes qui vivaient précédemment sus sa propriêtè:

D'avair, en usant illégalement d'un certain c'min d'passage au d'sus d'ladite propriêtè, pénétrè, au moyen d'effraction, dans la ferme de Citoyen Français, Gentilhoumme, d'avair dêvastè une grand' partie d'ses clios, d'ses pâtuthes et d'ses gardîns, en volant ses récoltes, êrachant ses pliantes et abattant ses bouais; d'avair emportè san fain, s'n'êtrain, san grain et s'n'avaine, et d'avair mins l'feu à ses granges, à ses êtabl'yes, à ses tcherquéthies et à ses cottes; de s'être enivrè et d'avair enivrè les autres individus qu'étaient avec li sus l'cidre audit Citoyen Français, Gentilhoumme, et d'avair, oprès chounna, mins tout l'restant dudit cidre à banon, en êrachant les chanteplieuthes des difféthentes barriques; et d'avair volè des tchéthiots, tchéthues, hèrnais et autres machines et ustensiles de ferme qu'étaient dans les bels, le tout aux préjudice et perte dudit Citoyen Français, Gentilhoumme; et d'avair, de pus, tithè sus ses domestiques à poudre et à balle, et de l's'avair assaillis à coups d'coutè et d'sâbre, de sorte que plusieurs en sont morts;

D'vair m'nichi les êfants et pathents de Nicolas L'Russe, de l'savair assoumès et volès; d'avair capuchi et volè l'dit Nicolas L'Russe, et mins sa maison à feu; et, oprès chonna, d'avair fait ligotter et assassinè l'dit Nicolas L'Russe par les mains du noummè Bolchevicq et d'avait induit l'dit Bolchevicq à s'empather, souos d'faux prétextes, de sa propriétè et d'la mettre à l'abandon et en ruines;

D'avair mins d'la dynamite dans plusieurs des batcheaux appartenant à Maître John Bull, et coulè lesdits batcheaux dans les vivièrs au pourportant d'la propriêtè dudit John Bull, nonobstant le fait que y'avait des femmes et des êfants dans lesdits batcheaux; d'avair tithè sus les persounnes qu'êprouvaient à aller au s'cours des femmes et êfants qu'étaient sus l'point d'être niès et de l's'avair niès ètou: d'avair empouaisounnè l'ieau dans lesdits vivièrs et dans les pis et citernes, à seule fin de causer la mort de la famille dudit John Bull;

D'avair mins l'feu à un hopita' plien de malades; et d'avair, assassinè des chentaines de femmes et d'êfants qui n'y'avaient jamais fait l'moindre ma':

D'avair enviè du vitriol à la fache d'une foule de garçons qui voulaient l'empêchi d'assassiner des vielles gens et des femmes et êfants:

D'avair condi à la mort, ses propres pathents, êfants, domestiques et parchounnièrs;

Et enfin, d'avair, brûlè et dêtruit des quantitès d'autels, de tchaithes, d'égl'yises et d'chapelles, et coummins les pus affreux sacrilèges, et les pus grands bliasphêmes.

Touos lesdits mêfaits, crimes et forfaits coummins sans provocâtion et continuès sans interruption jusqu'au jour de la saisie du prév'nu par la police souos l's'ordres du Chantgni Victor Allié, d'l'avant dite pâraisse de l'Entente.

La lectuthe de l'enditement 'tait finie. Le Protchuleux ajouôti que les noms des persounnes qu'avaient 'tè assoummèes, bliessès, et tuèes était trop longue pour en faithe un chef sus chaque cas individuel. Il espéthait trouver assez d'preuves des faits mentionnès dans l'enditement pour satisfaithe le Jury.

Les témoins fudrent app'lès à dounner lus dépositions.

Coumme de raison, le prumi 'tait le Chantgni Victor Allié. I' raconti qu'avec l'aide de toute la police de la pâraisse de l'Entente, y comprins les hoummes de siez l'Oncl'ye Sam et l'Couosin Jonathan, il s'était mins en d'vair d'arrêter le prév'nu, contre tchi qu'il avait r'chu un grand nombre de pliaintes. I' l'avaient trouvè en flagrant délit, avec ses camarades, les uns à pilvâtchi les rachines et à saccagi les récoltes dans la ferme de Citoyen Français, les autres à coup-d'piser et à assoummer la Dame Belgique, tandis que d'autres, ne pouvant pon faithe grand ma' à John Bull li-même, s'en prenaient à sa famille et ès êfants qu'étaient siez li. - Les compagnons du Prussien avaient fait d'lus mus pour ne pon être happès. Ils avaient r'fusè d'obéir à la police et l'y'avaient résistè violemment, de toutes les manièthes possible, capuchant, bliessant, tuant partout yoù qu'i' pouvaient. I' fallut taper d'sus sans grâce ni merci. Ch'fut avec bein d'la peine que l'Prussien et ses gens furent battus. Mais le Chantgni avait d'mandè au Sergent Foch (de la milice de France) de lus baill'yi un coup d'main et l'Sergent Foch lus avait dit coumment s'y prendre pour v'nin à bu de ches sacripants-là. Touos l's'hoummes de tchoeu lus avaient dounnè un coup-d'main et, finalement, à forche d'taper d'sus, nous avait fait le Prussien et ses gens ertchuler pas à pas, jusqu'au jour qu'ils en eudrent yeu assez et qu'enfin i' s'avouidrent battus et que nou put les em'ner en prison.

En rêponse au Protchuleux, le Chantgny dit que touos les autres individus avaient pliaidji coupabl'ye et avaient dêjà 'tè condamnès, mais l'Prussien avait d'abord erfusè d'pliaidji du tout et pis avait prétendu qui n'tait pas coupabl'ye.

L'Avocat Bat-d'la-Goule ne fit pas une seule tchestchon au Chantgni Victor Allié.

Madame Belgique, qui pâli la deuxième, pathaissait bein faill'yie. Oulle 'tait maigre et hallèe; ses pouorres hardes l'abriyaient bein à peine; et oulle 'tait occouo toute ênervèe. Ou raconti coumment que l'Prussien 'tait v'nu siez l'yi un jour, avec un tas de mauvais sujets, avait volè san contrat d'héthitage et l'avait mins en morcieaux, en disant que che n'tait "qu'un sale mio d'papi"! Oulle eut un tas de tchi à dithe, ètou, au sujet d'la maniéthe que l'Prussien avait agi envers les êfants et sustout envers les jannes filles et les femmes. Ches choses là sont trop horribl'yes pour les imprimer, et fidrent une diverse impression sus l'Jury, partitchuliéthement sus les femmes.

La pouorre vielle dame fut obl'yigie de s'arrêter bein des fais, pour essuyer ses yeux, en racontant ch'qui s'était passè siez l'yi. Mais ou' trouvi la force d'aller jusqu'au but et, sa déposition faite, ou' pathut avair l'air bein soulagie.

Toute une scouade de vièrs hoummes, de p'tits orphelins et orphelines, de jannes filles et d'veuves corroboridrent chein qu'la dame Belgique avait dit. Ils avaient tous l'air d'avair souffert hardi et enduthè de grandes privâtions. I' faisaient vraîment pitchi.

L'Avocat n'lus fit pas une seule tchestchon.

Quand ch'fut l'tou' de Citoyen Français à monter dans la boëte à témoins, il eut d'la peine à passer l'long du Prussien sans lis cliamûser la fache, en viyant coumment qu'i' s'motchait d'une pouorre femme qui v'nait d'avair bein d'la peine à faithe sa déposition.

Chein que Citoyen Français raconti 'tait au sujet d'chein qui s'était passé dans sa ferme. Touos les fermiers sus l'Jury avaient l'air navrès.

L'Oncl'ye Sam et l'Couosin Jonathan, pâlant un mio dans lus nez, certif'yidrent que Citoyen n'avait dit qu'la puthe véthitè et l'Oncl'ye Sam ajouôti que s'il avait bein comprins chein qu'était la bête à tchi que nous avait à faithe, i' n'éthait pon laissi le pouorre Citoyen enhanner trais ans d'temps devant s'en v'nin l'y'aidji à chasser les malfaiteurs de sa ferme.

Il avait à peine dit la patholle que Citoyen se l'vit de d'sus san banc et couothi l'embrachi sus les deux jo'es, malgrè l'huissier qui hallait à tigue de corps sus la pannèe d'sa casaque!

Ch'tait rein-que quand l'affaithe fut faite que l'pouorre Citoyen se r'souvint qu'il 'tait en Cour!

- Oh, pardon, mon Président, i' c'menchi, mais, voyez-vous? l'émotion, la reconnaissance, la...

Le Président l'interrompit en souoriant: N'vos troublièz pas, i' lis dit, d'une vouaix douoche et compatissante, je comprenons...

Et coumme Citoyen, en s'touannant promptement pour s'en r'aller à sa plièche, avait, par mêsgarde, dounnè un coup d'coute dans les côtes à l'huissier, qui n'avait cessi d'haller sus sa casâque:- Tant pièthe pour vous, huissier, s'fit l'Président, fallait l'laissi! Quand un houmme a souffert autant coumme li, faut avair d's'êgards pour s'n'êtat d'esprit, au bu du compte!!

Par rapport au chef concernant la propriêtè à Nicolas l'Russe, et les vols et assassinats à san préjudice, i' n'y'avait pas d'témoins, partie des victimes étant mortes et les autres à l'Hôpital, mais l'Protchuleux produisit les dépositions qu'ils avaient fait dévant mouothi et qu'avaient 'tè obtenues par devant l'Vicomte à l'Hôpital. I' produisit en même temps l'verdict d'l'enquête sur la mort dudit Nicolas, "assassinè par le noummè Bolchevicq, de connivance avec le prév'nu":

Oprès que divers autres témoins eudrent 'tè entendus, ch'fut l'tou' à John Bull.

Coumme d'habitude, i' c'menchi à groumâchi, disant qu'i' n'savait pas l'français, et qu'i' voulait déposer en angliais, etc., etc.

- Eh bein! d'visèz-en angliais, mon doux! s'lis fit l'Président. Ch'est grand dommage pour vous s'ou' n'savèz qu'une seule langue, mais ch'est votr' affaithe! D'visèz du mus qu'ou pouvèz, nou vos comprendra tréjous assez bein.

John Bull raconti, don, s'n'histoëthe, une histoëthe à faithe frémi. Et tout l'temps qu'i' pâlait, i' r'gardait le prév'nu dans l's'ièrs, coumme si ch'tait à li-même qui r'citait touos les mêfaits de tchi qu'il 'tait tchestchon dans l'enditement. Il raconti les choses tout au long, en prenant san temps, et n'oubliant pas la moindre chose, et des qu'il eut fini, i' tchitti la Cour, s'n'alli à la prumiéthe auberge du vaisiné, avali deux pintes de bièthe et s'en r'vins à sa plièche dans la gal'lie.

Justement l'Président 'tait à app'ler les noms des témoins à dêchèrge:

...... Cupidité, Ordghi, Envie, Violence, Atrocitè, Pouaison, Traîtrise, Hypocrisie, Vanité, duplicitè, Parjuthe, Malice, arrogance, falsification, Incorrigibilitè, Tromp'thie, Cruautè.

Les individus en tchestchon 'taient tous d'bu à la barre. Jamais si vilain assortiment de visages pendabl'yes n'avait 'tè veu dans la cour. Les habits d'prison qu'ils avaient conv'naient d'charme à lus mauvaises mines.

En les r'gardant, le prév'nu hauchit l's'êpaules et fit un mûsé, coumme pour montrè combein qu'il 'tait dêgouôtè de ses propres témoins.

Tout d'un coup, l'Avocat Bat-d'la-Goule se l'vit, tout d'un embront.

- Moussieu l'Président, dit-i', les témoins à dêcherge veinnent de m'informer qu'i' n'ont rein S dithe en faveur du prév'nu. si je n'lus fais pas de tchestchons, la Partie Publique ne peut pas les contre-examiner, peut-alle?

- La Partie Publique n'a pas la moindre envie de s'touoill'yi avec une telle bande de voyous, allez! lis cliatchi le Protchuleux, rupêment.

- Ou n'avez qu'à les r'tchûser, fit l'Président.

- J'les r'tchûse, fit l'Avocat: j'ai l'honneur de les r'tchûser, tant qu'i' y'en a.

Et toute la scouade fut emm'nèe rond'ment hors de la Cour.

Le Protchuleux fit san réquisitoire. Ah! Fallait l'ouï mettre les choses au cliai, montrer la préméditâtion, la prépathâtion, l'exécution des infernals plians du prév'nu. Fallait l'ouï montrer les crimes de tchi qu'il avait 'tè coupabl'ye. Fallait l'vaie plieuther (vaithe plieuther, li, un vier Protchuleux qu'avait passè sa vie parmi des crimes et des criminels) en pâlant de chein qu'les femmes et êfants, les vieilles gens et les orphelins, avaient yeu à enduther d'la part du prussien et d'ses suppôts. - Et quand i' d'mandi au Jury de rapporter un verdict de coupabl'ye, sus touos les chefs de l'enditement, il 'tait bein évident que les faits 'taient touos prouvès et que l'Avocat Bat-d'la-Goule éthait biau pliaidji d'san mus; i perdrait sa peine.

Mais Moussieu Bat-d'la-Goule ne pliadji pon long. Jamais, même, i' n'en avait dit si p'tit...

- "La Cour m'a chèrgi d'la d'fense de chu prév'nu ichin", qu'i' dit d'une vouaix triste et lamentable, "car nul homme ne peut être condamnè sans avair 'tè entendu pour sa d'fense par l'entreminse d'un Avocat. I' prétend qu'il est innocent, car i' n'a fait que d'obéir à s'n'instinct naturel et a tout simpl'yement voulu protégi et agrandi sa propriêtè. Ne v'là tout ch'que j'ai à dithe. Si, pourtant, y'avait un doute dans l'esprit du Jury... che s'sait... che s'sait une grand' bêtise, ché s'sait une calamitè!..."

Le Président fit un long speech, excessivement sérieux, et pis le Jury s'en alli délibéther.

Dans deux minutes il 'tait r'venu.

- Le Jury est-i' unanime? d'mandi l'Président.

- Le Jury est unanime dit l'Chef, qu'avait nom Conviction.

- Tch'est l'verdict? d'mandi occouo l'Président.

- Coupabl'ye, sus touos les chefs, sans exception, dit l'Chef du Jury.

Merci! Merci!! dit l'Président du Tribunal de l'Opinion Universelle, à pliaine vouaix...

Et aussitôt, conformément ès conclusions d'la Partie Publique, le Prussien dûment atteint et convaincu de larcins, vols, recels, bris d'clothuthe, dêtournements, fraude, abus d'confiance, effractions, attaques nocturnes, incendies volontaithes, viols, meurtres, assassinats, rapt, empouaisounnements, blasphêmes, sacrilèges, outrages, assauts d'grand c'min, pirat'tie, et d'infractions à toutes les louais humaines et divines, 'tait entrainè hors de la cour et pitchi dans l'cachot des condamnès qui ne r'vaient jamais la lumièthe du jour!

Et, coumme i' s'nallait, le temps qu'avait 'tè morne et gris jusque là, changi tout d'un coup.

Les nuages dispathudrent je-n'ai-yoù, et l'solei s'mins à r'lithe coumme i' n'l'avait pas fait depis l'mais d'Juillet 1914!

Elie
Sept. 1918.