"Si tu voulais v'n ov nous a la Chapelle?" que m'dit Laïzé, en me r'gardant par en-d'sous. "Y'a un prédicateu d'Angliétèrre."
"Un predicateu Anglyais!" que j'fit. "Ocquo tchiq' nouvelle collecte, sans doute? Ch'est pourtant 'war time,' tu dévthais t'en souv'nin; et j'n'avons pon d'sous d'èspeigne, par les temps qui couothent. Sus tchi qu'i' s'en va prèchi, tan prédicateu Anglyiais?"
"Ch'n'est pon pour tcheuté des sous, chutte fais," que s'fit Laïzé, enj aidjant à Lonôre a crochté sans fro par driéthe. "Ch'est sus la djèrre qu'i' s'en va pâslé. Ch'est pour nos dithe coumment s'y prendre pour aîdji au Roué a èsgliémmi les supots d'Satan."
"Ho, ho! Eh, bin, d'pis qu'ch'est d'même, et viyant qu'tu m'asseuthe qu'i' n'y'a pon d'collecte allons-y!"
Et nos v'la y'allé, touos les très, dans l'banc qu'Laïzé paie chinq shlings par quart d'an, pas trop lien d'la tchaise, viyant qu'ou oué un mio haut. La chapelle se remplyit vite; l'harmonium s'mint a joué, nou chanti, et né v'la l'service en bouan allant. Ch'est pas eunne grande chapelle, la sienne ou-ès qu'Laïzé va r'chévé ses moyens d'grace; ou n'est pas dans eunne belle rue; et n'y'a d'jéthe de principaux d'paraisse parmi la congrégation. D'bouan monde, s'ou voulez j'n'en disconvains pas; des gens qui chantent haut, disent "Amen" quant i' faut, et ne r'gardent pon atouore de yeaux duthant la priéthe. Mais ch'n'est pas ch'qué nou pouôrait dithe d'la haute classe coumme nou rencontre ès Shows d'flieurs et d'même. Nan! Ch'est pustot l'contraithe! Des gens qui vivent sus lus gages, l'pus et l'mus. Ch'est parmi chutte classe la, qué m'dit Laïzé a l'ouothelle, entre deux versets d'cantique, qu'y'a l'pus de r'ligion d'nos jours. Si ch'qu'ou dit est un fait, ch'est grand domage, et dounne raison au verset qui dit qu'il est pus aîsi a un chameau d'mettre eunne adjulle dans s'n'yi qu'a un riche de s'faufillé par la porte èstrette.
Mais pâslons du sermon; ch'est pour ch'la que j'tais v'nu. San sermon, a chu prédicateu la, ch'fut pour lus dithe, a touos chès pouores gens la, qu'i' fallait coyé, coyé, coyé, sus tout et tout l'temps, pour poué prêté des sous au Gouvernement. Faut s'passé d'moto-cars, de robes de soués, d'chapiaux a plieummes (Lonôre châtchi d'la tête la d'sus), et de toutes les goffiches que les femmes mettent a-touôre lus co. Faut pas accaté d'montres en or ni brac'lets, ni gabathé les rues dans des bottes à haut talon coumme les femmes qui battent la strade à Paris. Faut coyé sus la tchuîzinne; ne pon mangi d'saumon, ni d'hîtres, ni d'pêches au dessert; et les siens qui bevent du champanne et du vin d'porto a dîné font grand tort a l'Angliéterre, a ch'que l'predicateu nos dit. N'faut pon allé au Theatre, ni ès Pictures, ni rin! Et faut s'passé tout a fait d'litcheu duthant la djerre et pour siex mais après. Laïzé m'dounni un coup d'cout - ou'l a l'cout diversement pointu - ichin. Ou n'avait qu'faithe! J'sis raide bliu-ribban, a ch't'heu! N'y'a qu'tchiq' fais l'Samdi, quand nou s'adounne a rencontré un fréthe de gobille, ou les jours d'élections, ou d'Show, ou quand nous entre tchiq' bord pour démandé l'heuthe, ou si l'temps est pouffre, ou quand i' fait sec. Mais r'venous a not' sermon.
Ch'qui m'surprins, ch'fut d'l'entendre dithe a la congregation sus tchi qu'i' fallait coyé; quand j'savais par mé même que la congrégation n'avait jommais fait d'excès sus ch'qu'i' disait, par couonne raison qu'les pouôres gens n'en avaient pon l'moyen! Mais ch'n'est pas pour trouvé a r'dithe! ch'est seulment par voiée d'paslé. Et san raisoun'ment avait du bon. Si j'voulons gagnyi chutte minséthablye dgère, i' faut en payi les frais. I' faut don coyé tant qu'nou peut (Laïzé pâsle de fricachi san paîson sans beurre) sus tout, et prêté ch'qu'nous a d'èspeigne au roué. Ch'est un raide bouan pliéchment; miyeu que d'la rente ou d's obligations, et nou s'a remboursés, sans disconte, quand j'éthons dounné eunne rosteuse ès Prussiens. Auprès la djèrre nou pouôrra érquémenchi a porté des bottes a haut talon et des plieummes (j'mets chunna pour rasseuthé Lonôre), allé en moto, bèthe du champanne, et faithe les chent coups coumme d'amor.
Piteur Pain
Jersey Weekly Post 22/7/1916
Viyiz étout: