I' n'y'a rein d'nouvé souos l'solei'
J'savons tous l'vièr dicton;
Et pus d'une fais nous a prouvè
Qu'il en est d'même en véthitè.
J'n'aithais jamais pensè, pourtant,
À chein que j'vis, Sam'di,
Dans “Hill Street” (app'lèe dans l'vièr temps,
La Rue ès Trais Pigeons, j'comprends).
Un soudard en kharki s'en v'nait
Amont la rue bouan rond
Et, 'slindgi sus san dos, portait
San sa' tout plien, comme nou l'viyait.
Aupi d'la pompe il arrêti
Pour pâler à tchiqu'un;
I' printsan sa', le dêblioutchi,
Et sav'ous tch'est qu'il en halli?
D'vinèz... d'vinèz... errêprouvèz...
Nannin dja, ou' n'y'êtes pas...
D'vinèz autant coumme ou' voulèz,
J'gag'geais qu'jamais ou' n'y pens'sèz!
Tchi don' qu'un soudard sus san dos,
Dans un sa' peut porter?
D'l'ammunition? tchullièrs? coutcheaux?
Des blankets pour se garder caud?
Noufait! N'y'a qu'dans l's'Iles de la Manche
Que nou' peu vaie d'itèt.
J'm'en vais l'dithe vite car l'heuthe avanche;
I' m'passi un livre d'tchittanches!!
Mais tandis qu'l'armèe en plien c'min,
Pense ès cabots et siextonn'yièrs
Inscrits dans l'livre en parchemin,
Je n'soummes pas sûs être à Berlin!
Elie
Chroniques de Jersey
19/12/1917
Viyiz étout: