"Dînons d'bouonne heuthe," que j'dis a nos gens Lundi, "j'nos n'allons au Show au College. Ch'est mé qui paie partout, et bethons du tée là."
Ne v'la don que j'nos enfûmes dans touos nos ports. Me avec ma casaque a ponniaux, man veste de pé d'taupe, et man tappeur; Laïzé toute en né - ch'est la coulêu qui va l'mus avec san tempéthament - et Lonôre attifée coumme yun d'chès portraits qu'nou vet sus les gazettes de mode. Ch'est sa méthe qui se d'mente de l'habillyi d'même; ou s'est mînze dans l'idée qu'ch'est la vraie moniethe d'attithé les r'gards sus sa fille - en veue d'lis trouvé un gallant, s'ou voulez savé l'fond d'l'histouèthe.
Nou n'fut pas long a ramonté les caches du College, et en l'heu nos v'la souos l'portico. Ch'tait douze sous par tête d'entrée, et i' n'voulites pon m'faithe de rabat viyant que j'taimes toute la famille. Y'en avait pourtant d'yeux qui m'counaissaient, et j'ethais creu... Mais enfin! tchès qu'ou voulez? Ch'n'est pas trejous les pus méthitants qui sont au haut d'l'èstchelle.
Dêjà l'monde c'menchait a s'am'né, et chatchun de s'démandé - j'les viyais d'la carre de m'n'yi - tchès qu'était chutte belle hardelle là. Laïzé s'en r'dréchait d'ordgi, s'en tcheu d'mèthe en palpitait, et Lonôre 'tait "all smiles" a drouét et a gauche. Bétot y'eut tout un troupé d'gens a touôre de nous, a nos offri des catalogues, des titchets pour le tée, et ditet; d'vant qu'nous eusse le temps de se r'touôné, i' m'avaient sangnyi d'pus d'eun' èstchu.
Eh, bin! Nos v'la a nos proumné parmi toutes les belles choses; Lonôre a man bras, et Laïzé par driéthe pour èscouté les r'merques qui se f'thaient sus s'n'èsfant. Y'avait un peuplye! et j'avais bieau dithe: "Quar'ous que j'passe, bouonne gens," nou fut bétout djémmés coumme des poummes dans un bathi; et l'moussieu qu'avait la djob de crié d'temps en temps: "Keep to your right, please!" se tut de m'zespé, persounne ne prennait avis a li.
Bétôt, nos v'la dans l'appartement ou-ès qu'y'avait d's'habits d'bâteme, des calobres, d'la dentêlle, et ditet; v'la tch'intéressait hardi Lonôre et sa methe. Pour quant a mé, j'les laissi là, en lus disant de me r'trouvé dans l'allée, dans eunne demi'-heuthe, et j'mé faufilli la ou-ès qu'etaient les sabres et les connons. Là, je r'counnu des connons coumme les siens qu'j'avaient captuthé la bordée que j'èsmaglyi siex Boches a coups d'marté, et j'mé mâti endret pour explyitchi au monde coumment j'm'y print. "Move on, there!" s'fit un membre du Coumiti en m'pointant l'dégt. Et, pus tard, coumme j'tais a monnyié un sabre pour éxplyitchi a eunne petite Anglyiaiche - ou s'èsvonni du coup! - coumme j'en avais enfoncé yun dans la gorge d'un général Bosche, deux-très d'yeux s'mintes a m'bostchullé d'hort en m'disant d'avé a m'n'allé menti dans l'autre appartément.
J'trouvi nos gens dans l'allée, a admithé la grande bolle en méhoganné prêtée par not' pathent Binet - eunne bolle qu'éthait deu me r'vénin si j'avais yeu man drouét - et j'nos en fûmes bethe-du-tée. Pour douze sous chaque, nous en avait pus qu'assez de beurrées, d'gâche, et d'tée. Laïzé, toute maigre et seque qu'ou êst, en bu chinq tasses; j'en avais chose, et j'lis pinchi la gambe pour y'apprendre. Ma fille n'en but qu'y'eunne, a p'tites gorgies, en l'vant l'p'tit dégt coumme font les dames, et s'essuyé les levres sus la carre du doublyi - coumme ch'est la mode a ch't'heu.
Après l'tée, j'dis ès femme d'allé m'attendre a haut, dans d's'envithons des Batons-d'Justice; et, quand i' fûtes hortes, j'm'en fut rôdé du bord de la tchuizinne, dans l'idée d'offri d'l'aide ès dmouèzelles qu'étaient la d'dans a cacté en faisant des beurrés. Pas moyen! J'eut bieau lus dithe qué j'tais plien d'bouonne volonté, et que ch'tait mé qui faisais les beurrées siez nous, j'fut prié d'avé a d'èscampé au pus vite, et j'eut l'dèspié d'les entendre rithe driéthe man dos coumme j'men allais.
Coumme i' c'menchait a être temps d'en r'gagnyi siez sé, j'm'en fut a la r'cherche de nos gens. J'les trouvi pitchis en éxtâse endrét l's'assiéttes a Moussieu Mauji. Laïzé 'tait d'avis qu'ou n'ozait jommais met' des fêves et du piot sus ditelle vaisselle, tandi qu'Lonôre prétendait être prête a mathié l'preumi veuvi qui y'en doun'nait un tet set pour s'n'engag'ment. Tchès qu'ch'est qu'd'èsfants, tout d'même!
Enfin! sans avé yeu l'temps d'vaie la maintchi des belles choses qui y'a la d'dans, si bin arrangis, si bin explyitchis, j'fûmes oblyijis d'nos en r'touôné siez nous, pour manji - coumme i' s'adounnait - des fêves et du piot, mais pas dans d's assiettes coumme les siennes que Moussieu Mauji a dans sans drécheux.
Piteur Pain
Jersey Weekly Post 29/4/1916
Viyiz étout: