Ertroussez vos manches de qu'minse garçons
Ertroussez vos manches de qu'minse garçons. Nou s'en va s'mettre à vos vacciner.
Les gâzettes disaient l'aut'e jour que les hommes du bataillon d'la Ville avaient 'tai adressis à la Grève d'Azette, par le Docteu Falla, sus les avantages de la vaccination.
Je n'sais pas tch'est qu'il lus conti, ni si ch'est qu'i' r'pathi des les convaincre que ch'tait pour lus bein de s'laissi briochi les bras et s'faithe inotchuler avec je n'sais tchi sorte d'pouaison, mais dans l'Evening Post de Jeudi au sé v'là-t-i' pas une lettre signée par "Britisher" qu'en faisait des moquethies et qui citait des passages au sujet de dans le Medical Times pour prouver que ch'est un tas d'gnollin.
Quant à mé, garçons, je n'prétends pas être une autorité sus une tchestion comme chette-là, et alors, je n'ai auchun avis à vos donner, ou f'thez comme ou voudrez. Un châtchun a s'n opinion, et l'caouain a la sienne, mais je sais bein que si je m'en allais à la djerre, je n'me lais'sais pas estropier par auchun docteu dévant que d'm'en aller.
Si ch'est qu'i y-a auchune lance'ie à faithe i' y-a des Uhlans par là qu'en font lus spécialité et i' s'sait temps assez quand nou veindrait là-bas de s'laissi briochi si ch'est qu'nou z-avait l'malheur de lus tchaît entre les mains.
Le seul avantage que j'y verrais, si en cas, de s'faithe vacciner, che s'sait quand la djerre es'sait finie et qu'nou s'sait ervenus sain et sauf, sans aver attrapé autchune êgrinflieûthe, nou voudrait p't-être raconter à ses anmins des histouaithes de san héroisme, et explitchi comment qu'nou z-avait ieu l'bras traversé par le sâbre d'un offici allemand. Eh bein, s'ils 'taient trop incrédules, nou les confondrait par tout simplyément ertrousser sa manche et en lus montrant la pitcheûthe au Dr. Falla, nou lus dithait: Là, en v'là oquo la merque.
* * *
I pathaît qu'i y-a tchique malentendu quant à l'enrôlement de volontaithes pour la djerre, de parmi les miliciens.
Ch'n'est pourtant pas la peux qui les tcheint, nos garçons, le couothage et l'patriotisme ne lus manquent pas.
I' y-a tchiques semaines nou ouiyait pâler qu'i y-en avait des chents qu'étaient prêts à lus embertchi, et pis acheteu nou ouait des rumeurs qu'i n'y a pas d'volontaithes jêrriais. Tch'est qu'est la cause de tout chenna?
I' y-en a qui disent que l's hommes n'aiment pas la maniéthe que la chose est entamée. V'là des s'maines que l'affaithe traîne!
Un offici ou bein un sergent d'mande à sa compagnie: I' y-en a-t-i' d'entre vous qui voudraient aller au front?
A qu'menchi ch'tait des douzaines qui disaient 'Oui' tout d'suite. Eh bein nou mettait lus noms bas, et v'là tout chein qu'i' y-en avait, i' n'en r'ouiyaient pas pâler et i' s'n allaient prendre lus pliaiche avec les autres se promener l'long du pliain à crier: Who goes there? à touos les vraitcheurs à m'suthe qu'i ramontent le slip.
I' n'faut pas s'êtonner si ch'est que l's hommes sont dêgouôtés d'êtres ramassés d'la sorte.
L'aut'e jour, un sergent avait toute sa compagnie rangie d'vant li et i' lus d'mandit: Does any man wish to volunteer for the front? If so, step forward.
I' n'y-en eu pas iun qui bouogit!
Les hommes natuthellement veulent saver tch'est qu'nou s'attend d'ieux. Ils ont perdu confiance, sustout quand i' vaient qu'les siens qu'avaient volunteeré i' y-a treis s'maines n'en sont pas pus d'l'avant.
Un farceux a deu dithe que comme les Jêrriais sont accouotumés parmi les patates, ch'est l'intention des autorités de prendre les volontaithes d'ichin et d'les parsemer dans toutes les grandes villes de la France pour peler les patates pour les troupes.
Nos garçons savent sans doute que tout chenna est un tas d'gnollin.
Mais i' n'veulent pas que nou les ramasse justement comme des êfants, i' sont presque tous des titheurs de prumié classe et ne d'mand'aient pas mus que d'former partie d'un régiment jêrriais qui, souos de bouans officiers, ne manquethait pas de s'distindgi sus l'champ d'bataille.
* * * *
En faisant mes touânnées attouo des côtes je vai bein des choses qui devthaient être amenées à la connaissance du public, pour l'amour de démontrer que bein des pièches de nos habitants ne sont pas si insouciants comme nou craithait bein.
Sav'ous bein que dépis qu'la djerre est dêcliathée et qu'un grand nombre de nos miliciens sont toutes les nyits à patrouoilli les grèves et les falaises, bein souvent dans du temps que nou n'mettrait pas un tchan d'hors, les maîtres d'hôtel et les fermiers dans l's envithons ont prins la généreuse habitude de lus cauffer du thée et du café et d'lus fourni toutes sortes de p'tits fricots qu'ont 'tait bein appréciés par les hommes.
Je voudrais en spécifié bein des cas et nommer des bouannes gens qui font preuve de lus dévouement, mais je sais que la pus grand' partie y objectéthait, et pis d'ailleurs je risquethais p't-être d'en oublier de parmi les pus généreux.
Enfin, tréjous, tout attouo d'l'île nou ouait la même histouaithe. Nos soudards sont enchantés de la maniéthe qu'i' sont traités par les habitants, et ch'est un signe que châtchun veur faithe san p'tit mio pour minimiser les inconvénients que nos miliciens êprouvent dans la dêcherge de lus d'vé.
Caouain
19/9/1914
Viyiz étout: