Le Kaiser 'tait dans san palais.
Ch'tait l'moment du souper :
Et touos les pliats d'argent r'lisaient
Assez pour l'êgaluer!
Mais sa chère était pustôt maigre:
I' n'mangeait pon d'bouan tchoeu.
Y' avait du sè et du vinaigre,
Et pas mal de litcheu.
D'caboche au picl'ye, y'en avait bein,
Et d'la sausiche de g'va.
Mais ch'tait d'tchi bein triste qu'san pain
Couleur de chocolat :
N'y' avait pas d'beurre ou d'margarine,
Pas d'boeu, d'mouton ou d'lard
Mais une petite pliat'lée d'sardines
Et une boëtée d'houmard!
I' mangeait à londgheu' des dents,
Et rein q'par le Saint P'tit.
Et groumachait tout l'béni temps
De n'être pas mus servi.
Un valét en bel uniforme,
Décoré d'une Crouaix d'fé.
L'y'apportit un patchèt ênorme
Et s'mins à "dêficelé'.
Ch'tait les gazettes du monde entchi
Que l'Kaiser voulait vaie,
A seule fin d'pouvair s'renseigni
Sus chein qu'lus gens dinaient.
I' tchitti don l'mangi et l'baithe,
Et ouvri les papièrs,
Et s'mins assidûment a liéthe.
Ses lunettes sus ses yiérs !
I' lut coumme ch'la une gestion d'temps:
I' grounnait par bordées,
Parfais même i' grinchait les dents,
Sa fache en 'tait toute laie!
Mais. tout d'un coup, i' tressauti,
Dans une affreuse coléthe...
Le valét, prudemment, s'sauvi
Driéthe la chiffonniéthe -
Car il 'tait si maigre, l'pourr' corps,
Qui n'prenait d'ghéthe du run, -
L'Kaiser ergardi d'touos les bords
Cherchant sans doute tchic-un!
"Est i' bein vrai, chein qu'est dit là,
Sus chutte maudite gazette,
On l'ont i' mins pour me faithe ma?"
I' d'mandi... à s'n'assiette.
"Oh ! si ch'est vrai. C'h'est 'l'aguéve-tout'
Et mai, jmouorrai en cage,
Ch'est ichin le pus affreux coup,
Qui m'frappe en plien visage !
J'en avais pus qu'assez sus l'co .
Mais chutte fais j'sis perdu!
A tchi servi combattre occouo?
J'sis bel et bein fichu!!
De rouoge qu'il 'tait, i' touanni blianc,
Mais blianc coumme un lincheu :
Ses yiérs restidrent ouverts touos grands
San front 'tait trempè d'sueu'.
I' trembliait coumme la fielle au bouais,
Et tout d'un coup i' tchi,
Boum ! Tout san long, bas sus l'plianchais.
Coumme une chouque êbaubi !
Mais tch'est don qu'il avait peu' liéthe
Pour lis faithe tant d'effet,
Chu Kaiser, à la mine si fièthe,
Qui prétend être parfait?
...Un paragraphe dans la "Chronique"
Du Bas du Vièr Marchi, -
- (Ch'n'est pas qui s'sait y'une des pratiques
San valét la volit!) :
"La louai, en fin, est sanctionnèe
Et jusqu'à chinquante ans
L'armée jerriaise es'sa appelèe
Souos l's'armes en bein p'tit d'temps!"
Elie
Sept. 1918.
|
