"Ch'qu'y'a d'bon, s'fit Laïzé, après qu'j'eumes r'lu l'Proget pour la trèsieme fais; ch'qu'y'a d'bon, qu'ou dit en s'essuyant l's yeux ov eunne fille de frambouèze (j'en avaimes yeu pour dessert) - ch'est qu'i' n'pouôront pon m'prendre man Piteur. Tu y'as 'té bliéssé - et ou mint san degt sus la m'erque de grimmeuse que j'avais attrapé sus l'nez en m'sauvant à travers des ronches la bordée qu'un Boche voullait faithe sembliant de m'haile du sang ov eunne bagounette - et tu-és pethe de famille et souotchin d'menage, sans compté que tu pouorras lus dithe que tu-ès indispensablye au "Post"; n'y'a qu'té d'résté pour dounné le mot de c'mandement quand i' faut "knock-off" pour dîné." Et la d'sus ou r'fit sérvi sa fielle de frambouèse.
Il est d'fait que pus j'y pense et pus j'ai la conviction qu'ma pliéche est d'résté en Jerri. J'sis pus utile ichin, vivant et bin portant, que mort ou èsmaglyi au front. Je d'mand'ai a être dispensé. Tchès qui d'vindrait d'nos gens si j'm'en allais soudardé en Mèsopotamie, la ou-ès qu'i' fait si caud que l'chérvé vos bouoillounne coumme de la tathe? Tchès qu'ithait rencontré Lonore les bordées qu'ou reste tard a la pratique du chant? ou Laïzé quand oul a 'té passé la journée siez nos gens a la campanne, et qu'ou r'vint chérgie d'rhubarbe, de grouezilles, et ditet?
Mais, d'fait, n'y'a pon a s'faithe de bille devant l'temps. Sus eunne trentaine d'Articlyes, j'en compte les deux-tchiers pour dithe comment s'en rèscapé: faudra être vin bégaud pour ne pon en trouvé y'un a travès tchi s'en sauvé. Touos les siens qui peuvent prouvé qu'i sont pus utiles ichin qu'au Front, il est dit sus la gazette, s'ront exemptez. Hourras! Y'a du bon! Y'etha pas mal de paisson qu'escaptha par chu creux là! J'counnais déja un fils d'fermi (y'un qu'a l'air dé voulé s'appréchi d'not' fille, de tchiq' temps) qui s'en va pliédé qu'n'y'a qu'li qui peut déshallé lus boeu; un autre qu'a eunne jument qu'il est seul a poué èscrédé; un autre qu'est pour se mathié au printemps tchi vint, plieuve ou vente; un autre qu'a eunne femme "skittish" qui d'mande a être survillyie jour et niet. Et pis, coumme i' s'en va y'avé des Tribunaux d'Exemption dans les Paraisses, ch's'a bin au mains que l'Counnestablye, ou l'Député, ou l'Chantnyi pour tchi qu'nous a voté a la dérnié eléction, pâsle pour vous. Et si y'en a sus l'Tribuna qui dévent des obligations a un Principa d'Paraîsse, i' faudra bin qu'il exempte le fils du principa, ou sinon - !
Touôs les prédicateurs s'en vont être cliérgis. Y'en a qui sont d'avis qu'i' sont pus utiles a prié pour les mouothants dans eune Eglyise, qu'a s'battre pour des vivants dans eune tranchie, - Affaithe d'opinion! Les Surveillants étout, escapent. I' sont indispensablyes pour compté la collecte, payi les gages au fossi, et rouâblié les pauvres honteurs. Les docteurs, les pharmaciens, l's entrepranneurs d'enter'ments, l's ergots d'Cour, les ramouneurs de chimnées, les porteux d'gazettes, les siens qu'ont prins des toumates a tâche, tout cheunna et un fliotchet d'autres, s'en vont s'moustré pour prouvé qu'Jerru n'peut pon s'passé d'yeux.
Mais là ou-ès qu'nou ritha, ché s'a quand vindra l'tou ès Conscientious Objectors! I' s'en va en r'sourdre de toutes les carres, des gens qui ne d'mand'daient pas mus que d'allé s'battre sion pour l'amour de lus conscience qui crie: "No you do'n't." Impossiblye de se r'binfré contre eunne telle conscience: ch'est coumme eunne barre de fé! Ch'est èstounnant coumme chutte barre de fé la s'raidit quand ou sent d'la poudre!
Et pour en r'vénin a ch'que j'disais au c'mench'ment: y'a toutes sortes de moyens d'passé a travers les melles du drannet d'la Loué. Ch'qui réstétha pour envié au Front ne s'a pas grosse happe, a m'n avis.
Piteur Pain
15/7/1916
Viyiz étout: