Not' Lonôre a l's esprits diversement exaltées, ches jours. Oul a ouï paslé de ch'qui s'passi Sam'di ès Estats, et ou s'est mînse dans la tête que les femmes de Jerri s'en vont être applées a soudardé de tchiq' monniethe. Oul en est dans la jouée, la mînzethe!
J'ai passé eunne bouonne heuthe a tâchi d'la dèstrompé, mais ch'qu'oul est tèstouogne! Ou marche "Up-an-down" a longues engambées dans la tchuizinne, en tappant du tallon sus l'aithe. Ou "shoulder-arms" avec la bringe, et ou s'amathi l'pokeur atouôre la chintuthe pour faithe la minne que ch'tait un sabre. Quazi touôs l's ornements du foyi s'en vîntent pataflias sus l'aithe tandi qu'oul 'tait a faithe "Charge!" ov sa bringe; et oul èstrueûlli sa methe la tête souos l'drécheux ov un pain qu'ou lis rui a la tête - ou disait que ch'tait pour pratichi coumment envié eunne bombe.
"Mais i' n'a pas 'té tchestchon d'femmes!" que j'lis fit comprendre. (Entre-nous, j'ne s'ais pas a je-n'sai s'il en fallait; ch'est mé qui lus offrithais Laïzé d'bouan tcheu.) "Ch'est des hoummes qu'i' lus faut! Ch'est d'la Milice pour allé aîdji au Roué a pourchassé les peûles de Prussiens s'i' dèsbertchaient en Angliéterre! I' pathait - d'après ch'qu'il en fut dit ès Estats - qu'i' n'y'a qu'des Jerriais pour chutte djob la, viyant que j'soummes monieth'ment Normands."
"Mais, pépée," s'fit Lonôre, "si je n'peut pon, viyant que j'sis fille, allé èsmaglyi des soudards, j'pouôrrai t'i' y'allé coumme neusse? J'pouorrai t'i' allé au Frunt, pour les neussé, quand i' s'ont rapportés sus des chiviethe-à-bras, en margallo, couérts de booe et d'puté? J'sait bin faithe du poussot, mé, et cachi des r'fréddeuses! Et j'pouôrais lus dounné lus med'cinne - justement, j'emportethais ma tchullyi d'batême, la sienne avec tchi j'mange man gué. Et pis," qu'ou dit, en s'dèstouannant du bord de sa méthe, "j'pouorrais lus liéthe des traitées, lus chanté des cantiques, et lus d'mandé s'i' vont rédjulliéthment au tchulte. Tchès qu'tu'en dit, mémée?"
"Du gniollin! tout cheunna," que j'mé fit. "S'ils ont besoin d'femmes, j'sis prèt a lus èspeigni Laïzé, avec pliaisi; et si par chance ou n'en r'venait pon, eh bin! nou mettrait un mio d'crêpe a san chapé. Mais ch'est des hoummes qu'i' lus faut; des hoummes pour se battre, gas déouèlle! des hoummes coumme cheun'chîn!" que j'dit en dounnant eunne forte ouappe sus le d'vant d'man veste. "Ch'est ditet qui s'en va aîdji au Roué a achouêmi les pendloques qui voudraient se d'menté d'attatchit l'Angliétèrre! Ou-ès qu'est men sabre? Gasdémmet! Apportez mé l'sien qu'a du sang d'Prussien sus l'bu - et apportez eunne affileuse en même temps!"
Et ch'est don d'même! J'nos n'allons, nous Jerriais - et, j'ai oui dite, un fliotchet d'monniethe de pintchinneurs Angliais qui sont muchis tchiq' bord d'eunne carre et d'lautre - j'nos n'allons formé un contingent. J'ai mins man nom bas pour offici - viyant que j'y'ai 'té dêjà. Et "look out for squalls!" Y'étha du feu d'satchi! Quand j'criethai: "Y'êtes-ous, garçons? En avant - 'arrrche!" Y'etha d'la bouochel'lie!
Piteur Pain
Jersey Weekly Post 10/6/1916
Viyiz étout: