Je n'pensais pon, quand j'ouï pâler que les Autrichiens et lus p'tits vaisins, les Serbes, 'taient à décider si s'en allaient s'entre-quétillyi que d'vant longtemps v'la qui s'en allait m'affecter personnellement, mai et touos les Jerriais, sans pâler d'une racachie d'autres.
Ch'est pourtant justement chein qu'est arrivè. J'ai tè obliyigi d'payer deux sous d'pus pour man pain; j'ai tè ob'yigi d'tchitter à mettre du chucre dans man thé; après aver vendu ses patates à un êtchu, il a fallu en racater à chinq ch'lins; i' pathaît qu'nou n'pouorra pas faithe de g'lée - et j'avais tréjous amor d'aver un rouollo à man dîner à man jour de naissance; j'avais idée d'aller passer deux trais jours en France ov un camarade, mais d'après touos les rapports, nou f'thait aussi bein d'vouler aller au Pole Nord, par le temps qui va, comme de vaoulair aller à Dinard; Jack Le Sueur avait promins de m'piloter à la faithe de Lessai, l'mais-tchi-veint, mais i' s'attend à être appelé à cachi li-même ses ch'vaux sus l'compte du gouvernement, dans chu temps-là, pour tchéthier des sacs d'sablion sus l'vier Marchi - pour faithe un maniéthe de grand blockhouse alentour d'la Salle des Etats, d'la Cour, d'la Bibliothèque et d'l'office y'où qu'Mess Bertaut prépathe les plians pour les grands bâtisses dans tchi que l's'Etats pliechent lus fonds...
Et ch'est d'même de tout. J'avais en'ye une pathe de braies à pressi et un veste à netti: n'y'a pas moyen d'les raver. Toutes les fais que j'vais d'mander pour, nou m'fait l'extchuse que touos les couotuthiers qui n'sont pas à l'Arsenal ou dans l'chimchiéthe sont en travas sus du khaki et que mes vieilles hardes peuvent attendre lus tou'.
Mes bottes n'ont pus de s'melles, mais not' cordonn'yi est hors en France et ses apprentis sont à monter la garde, yun à la Mathe de Ste.-Catherine et l'autre au Creux du Djabl'ye.
J'avons deux fourcèes d'p'tits animaux, mais ne v'là t-i' pas le prix d'vallè jusqu'à 14/- la piéche et nou n'sait pon si nou perdra pus à les vendre ach'teu ou à les garder pour les nouorri sus d'la pétuthe à un prix fo', p't'être pour finir par être forchie d'aller les porter au Gouverneux pour nouorri les prisonnièrs allemands qui s'en vont mettre dans les stalles à nos bêtes à Springfield.
Pas moyen d'aver d'show, pas d'concours beurrier, pas d'prix d'paraisse ni d'Goddington de toute l'annèe! Les siens qui pouorront vaie par dessus les balustres, le temps à v'nin dans notr' clios - car ch'est bein à la Société qu'il appartient, le clios de Springfield et pas ès Etats ni au Gouvernement angliais - ne verront pus nos belles géniches-mèthes avec lus coues frisèes, les chabots bliatchinès et lus cônes bein grattèes et huilèes; ni nos vieilles vaques ov lus piéchos qui les font marchi tout d'travers, comme le faisait y'un d'mes vaisins un jour qui s'était assis par mêsgarde sus une vêpriéthe pour haller du gravi de d'dans sa botte. Nou n'verra pas, nintou', la "progeny class" yoù qu'une démie douzaine de viaux d'un an sièvent patte-à-coue le péthe à tchi qui daivent l'existence et qui marche le nez l'air, en ernatchant d'orgi, à l'idèe que toute la population d'Jerri: Gouverneur, Bailli, Messieux d'la Cour, Recteurs, dames, d'mouêselles et êtrangiers de bouanne famille n'ont pas ergrettè de bailli douze sous à Mess Walsh, à la porte, pour entrer à Springfield et les admither.
Pas d'chance de gouôter une tomate ou deux des siennes au Chantgni Cooke, la séthèe que l'Show frume, quand nou va de frâser l'long des stalles ès gens que nou counnaît et qui n'manquent d'vos d'mander d'en gouoter yunne.
Pas d'chance de compather les "table decorations" à Madame John Falle avec les siennes à Madame John Bauche et d'dithe que nou-z'éthait p't'être jugi difféthemment.
Pas d'chance d'aver yun des îllets d'Indes à Douard Marett pour sa boutonnièthe, ni de s'faithe seuc qu'chest bein Moussieu L'Maitre qu'à les plus belle ledghumes de touos les Avocats et Moussieu Giffard les pus belles gérémiennes de touos les Ecrivains.
Pas moyen d'accater une douzaine de livres de beurre pour fricachi en faisant un cl'yin à Mess Mouothant quand il est à faithe la vendue. Rein de tout ch'là. Springfield n'est pus à nous.
Ch'èst des sauvages d'Allemands qui s'en vont être amathès es melles dans les stalles à nos bêtes et au lieu d'entendre dithe: "Ch'est man boeu d'un an qu'est au numétho 134," nou ouïtha des r'mèrques comme: "Mêfious du numétho 82, ch'est un coronel des cuirassiers de Wurtembourg, qui voulait mangi des vieilles filles de Liège," ou bein: "Ergardez à vous en allant en driéthe du numétho 27, ch'est un artilleur d'Hanovre qui tappait sus l'cap des canons qui r'puchent et qu'a tréjous coup-s'pisé par en driéthe de d'pis," ou bein occouo: "S'ou voulez absolument vos mêfaithe, allez d'mander à chu vièr barbu-là s'il aime aussi bein les sausiches à Mess Marett coumme les siennes de gh'va qui mangent à Strasbourd."
Ah! si j'avions seu, quand nou-z'tait à faithe de san mus pour aver un bieau terrain d'exposition, qu'i' faudrait un jour le baill'yi tout entchi au Gouverneux pour qu'il en fisse un maniéthe de poulaill'yi pour y garder des prisonnièrs de d'gherre! quand nou pense qui faut mettre du fi'd'fé à crochets tout alentou du terrain, haut coumme une maison et que Grandin est à fondre des boulets en pliomb à londgeur de jour pour fournir es soudards qui mont'ront la garde sus l'haut d'la muthâlle!
J'avions bein qu'faithe de tout chu peltas-là! Et nos chimtchèthes qui sont dêjà trop pliens! V'la qui meur-t'i d'enn'yi, des prisonniers Allemands? Ch'est tout bein d'les env'yer en Jerri, mais y'a pus d'une maniéthe à ergarder la tchestchon et si j'soummes bétôt à bu d'êtrain à forche d'lus faithe des pailloches tch'est qu'nou f'tha pour du chaff? Et pis, tchi lus baill'yi à mangi. Nou m'a dit que v'la qui goudalle sans cessi et qui peuvent baithe pus qu'un sergent-major un lendemain d'grand' r'veue. Ch'n'est p't'être pas la brach'chie à Randall et la sienne d'la Ann Street qui suffithont pour les abréver et si ch'est qu'i' faut s'mettre à lus baillyi de bouan cidre d'Jerri faudra-t-i que j'nos contentions d'limonade es grandes tchéthues, nous? Erviy'ous la sorte d'travas qu'un houmme pourrait faithe en fouant une carre si n'a rein qu'une galette et un verre de limonade à lis souot'nin la hethèque du dos?
Ch'est, à m'n'idèe, une grand' bêtise de mettre tout chu monde là dans not' terrain à rein n'faithe pour des mais d'temps. Coumme si n'y'avait pon de tchi faithe pour tout l'monde de bouanne volontè. J'n'ai pas rein contre yeux, coumme hommes, mais au mains i' dev'thaient gangni lus maintchien. Si l'Coumité d'la D'fense de l'Ile veut me consulter, j'lus trouvthai bein assez d'travas pour les garder hors de minchèt. Nou pourrait en env'yer une squade à clièrgi toute la vielle féthalle qu'est restèe des travaux d'la Colette et qu'est à roui au pliain - et p't'être à empoisonner l'paisson. Nous pourrait en mettre à faithe de l'irrigation sus les Quennevais - ergadez chein que Moussieu l'Bailli a veu en Egypte dans chu genre là! D'la terre qui n'est pon évaluèe à pus d'un louis ou deux pouorrait en valer chinquante ou septante s'oulle 'tait ramassèe coumme i' faut - si tout l'sablion tait portè hors de la vaie et remplièchi avec d'la bouanne biête de pânniéthe et arroûsée par un bouan cannè ou deux. Nou pouorrait en mettre à erbâti une cauchie à la Grève-de-Lecq et une autre à Ronez. Et dans la ville, yoù qui faut, à chèque nou dit, des neu's drains partout, nou pouorrait en èpeigni un coupl'ye de chents au Counnêtabl'ye; n'y'éthait qu'à choesi les pus maigres pour qui n'restent pon djammès dans tchic dêtou' d'pipe. N'y'éthait pas d'dangi, une fais là d'dans, qui s'êcapthaient et nou lus pass'rait lus mangi par les gratin's à l'heuthe des r'pas. Maîtr' John Wakeham, qu'est tout à fait au couothant des drains, pouorrait aisiment dirigi l'travas et lus dithe de tchi bord tôuanner quand i' s'sait temps, et j'sis seux que Mess Coxhead ne d'mand'dait pas mus que d'traduithe ses ordres en allemand, chein qui n'est pas d'excès mauvais, - j'ai ouï dithe qui n'y'a qu'a apprendre. Coumme chonna, les Etats éthaient tout l'travas fait à bouan marchi. Les ouvriers travaill'raient pour lus baithe et lus mangi - che s'sait bein au mains qu'i' f'thaient lus propre lavage, après aver 'tè pitrouoll'yi tout l'jour dans chu pité-là! - N'yéthait pas besoin d'lus baill'yi un sou et j'crai bein même qui n'en d'mand'raient pas; i' s'saient bein satisfaits d'aver d'l'otchupation utile et agriabl'ye et i' f'thaient d'lus mus pour montrer chein qui peuvent faithe.
Les autorités n'éthaient qu'a payi Mait John pour ordonner, Mess Coxhead pour interpréter et mai pour lus aver donnè l'idèe d's'y prendre aussi bein.
Vaithe, la dghèrre nos embête, même en Jerry et si j'vos en pâle annièt un mio en gniolant, ch'est pour n'être pas obligi d'en plieuther. Nou n'peut pon tréjous aver d'longues faches mais j'aimthais mus avair d'autres choses à vos dithe...
Elie
La Nouvelle Chronique de Jersey 2/9/1914
Viyiz étout: