Samedi passé, comme je prenais un p'tit somme opprès dîner, je fus rêvillyi en sursaut par une affreuse capuchechie à la porte de not'e mansarde.
"Douochement!" je criyi, "vos 'n'allous trébutchi la maison?"
Et la d'sus une vouaix officielle raîponni, "Ouvre nous la porte immédiatement au nom d'la louai!"
"Hallô," j'pensi, "tchest qui peut oquo y aver qui n'va pas bain?"
Enfin, j'pouvri la porte en trembliant, et deux hommes lus précipitirent dans la mansarde.
"B-b-b-bonjour messieux!" je lus dis, ou pathaissiz diversement pressis; tch'est que j'peux faithe pour vous?"
I' y en avait un haut mince avec des lunettes et pis un p'tit court, et l'pus grand des deux me d'mandi tout rupéement:
"Est-che té qu'est l'Caouain?"
"Oui dja, j'ai ch'tte honneur là."
"Eh bain je t'pliains bain man vyi. J'avons r'chu certaine information que tu as d'la marchandise en ta possession en contravention à la louai. Ah ça, montre nous tout d'suite ouest qu'tu gardes ta pétrole!"
"Mé! d'la pétrole? Et pourtchi craithe que j'en gardethais? Je n'ai pas d'automobile, mé, che s'sait si en cas pour cachi la machine-à-couôtre à Marie Hibou, don!"
"Je n'avons pas besoin de t'n insolence! Montre nous ouest qu'oulle est tout-d'un-coup, ou j'allons fouôllyi les prémisses du haut en bas!"
"Eh bain," je li raîponni, "puis-qu'ou n'pouvez pas prendre la pathole d'un Caouain, fouôilliz, et que l'djâble vos enlève!" Je sais bain que je n'aithais pas deu aver pâlé d'même, mais j'étais mârri, par exemplye!
Nos messieux ne perdirent pas un moment, mais quémenchirent a touanner tout chein d'sus d'sous. Heutheusement que Maris Hibou était horte au marchi ou bain i' y aithait du feu d'satchi.
Ils ouvrithent l'armouaithe dans tchi que j'garde ma médecine et débouchithent toutes les bouteilles pour les senti.
I' y en avait tchiqu'unes que l'odeur lus était familièthe et pathaîssait lus pliaithe assez bain, mais le lus fis comprendre qu'i' n'taient pas v'nus là pour supper ma litcheu.
Opprès qu'i' furent satisfaits qu'i' n'y avait rain en haut, i' d'cendithent dans la cave ouest qu'la Chronique s'imprimait le temps passé. Chute cave là ne sert pas à grand chose acheteu et j'ai ieu permission de m'en servir pour y rattither tchique mio d'man butin.
Dans une carre, j'y garde une barique de cidre que j'avais ieu à Noué siez un fermi d'la Trinneté, et dès qu'nos messieux l'apperchurent, iun d'ieux s'êcriyi "Ah! nouos y v'chin chute feis!" Et i' s'mins à touanner la chante-plieuthe. Au même instant je satchi une allumette que j'envyi en d'sous d'la barrique. I' firent un brai et couothirent pour la porte.
"T'en vas tu soufflier la ville en haut, imbécile?"
"N'ayiz pas d'peux, messieux," j'lus dis, du cidre bain arrosé comme est ch't-is là ne s'en va pon exploder comme chenna."
Opprès aver examiné la cave bain minutieusement, i' r'montithent en haut et pathaissaient tout-à-fait désappointés de n'pouver pas m'mettre souos arrêt.
"Exchusez-mé, messieux," je lus dis, "mais je voudrais bain saver pas tchil accompte qu'ous êtes venus ichin touanner tout man fait chein d'sus d'sous souos prétexte de r'garder pour de la pétrole, qu'ou d'vez bain saver que je n'posséde pas."
Là-dus le pus haut dit au p'tit, "Montre-la la lettre."
Ch'tait une lettre qu'avait 'té êcrite avec un "typewriter" et qui portait la signatuthe "Patriote."
Oulle informait l's autorités que les dêcouvertes qu'avaient 'té faites à Niermont, à St. Sauveux, à la Prumié Tour et à Grouville n'étaient rain à compathaîte à chein qui pouorrait se dêcouvri au haut du Vier Marchi siez un individu qui s'appelait "Caouain."
En la liaisant i' m'sembli vaie un mio d'lumièthe, sustout quand j'vi qu'oulle 'tait datée du 31 de Mars.
Je pointi la chose ès deux messieux et je lus dis, "Ou viyiz bain quand tchi qu'ou fu postée?"
"Vaithe, mais tch'est qu'chenna a à y faithe?"
"Ous allez vaie tout-d'suite. Quand est-che qu'ou l'avez r'chue?"
"A matin à huit heuthes."
"Justement, et tchi jour que ch'est anniét?"
"Le prumi d'Avri sans doute!"
"Eh bain, vos y v'là!"
Je voudrais, garçons, qu'ous aithiez peu vaie l'expression sus la fache de ches deux hommes-là et qu'ous aithiez ouï lus langage.
Mais je voudrais bain saver le tchet d'entre vous qu'êcrivi chute lettre-là.
Caouain
1916
Viyiz étout: