|
Duthant l'mais d'Mars, un Mêcredi, djaix-huit chents nonante-neu, Mêrienne Halledoque surprint toute la famille, En presentant à san bouanhomme, le grand Pîteur Saquefeu, Une pathe de biaux jumiaux, garçon et fille. Pîteur n'en 'tait pas trop content quand il eut la nouvelle, Et qu'la gardgienne vint li souhaiter jouaie; "Ous appelez ch'la d'la jouaie?" qu'il dit, "sém'nâge! l'affaithe est belle ! Ch'est bain assez qu'il vainjent iun à la feis!” Mais à Mêrienne i' dit comme ch'la: "J'sis content qu'y en a deux, La fille es'sa d'la compagnie pour tai, Quant au garçon, je t'asseuthe que j'en sis bain ordgilleux, Il f'tha tchique jour un soudard pour le Rouai! " Chu pouore Pîteur! En pâlant d'même, il n'se fidguthait pas Qu'il s'souvaindrait d'ches patholes-là pus tard, Que l'jour vaindrait qu'la Mêthe-Patrie s'trouvethait dans l'embarras, Et qu'le Rouai Georges li d'mand'dait san soudard. Mais tel en fut, l'année passée Bert avait djaix-huit ans Et san pouore pèthe vint quâsi dêrangi De penser qu'fallait qu'san garçon fusse s'battre contre les Allemands, Et laissi p't'être sa couenne à l'êtrangi. Dès qu'Bertie fut appelé la pouorre Mêrienne se trouvi mal, Ou passait une partie d ses jours à braithe. Pîteur s'en fut cherchit une forme siez l'clerque du Tribunal, Et fut la faithe remplyi siez s'n homme d'affaithes. Dans l'entretemps i' vint un ordre d'aller à Brighton Road Pour être examiné par les docteurs, Et Mêrienne lavi san Bertie dans une traîsie d'ieau caude Pour qu'i' n'crûssent pas qu' ses gens 'taient ramoneurs! Sa pouore Mémmée fut l'y condithe et voulait être présente, Comme quand san mousse avait une dent d'hallée, Mais l'sergent dit quche s'sait une chose tout-à-fait indécente Et l'pendeloque li frumi la porte au nez. Bertie passi un mauvais quart d'heuthe tandis qu'i' fut là-d'dans, Jamais n'avait ieu patheille aventuthe, I' li pouaîssithent l'estoma' et li calfaîtithent les fliancs Comme si i' voulaient l'agver, le pouore laiduthe! Opprès qu'i l'avaient bain sondé, i' finithent san supplice; Le sergent dit qu'i' pouvait s'r'habillyi. Mêrienne qui l'avait ouï honner, s'n'allait cherchi la police, Quand sain et sauf Bert rappathut d'vant lyi. "Oh, mais, man chier êfant!" qu'ou dit, "Tch'est don qu'i' vainnent de t'faithe? J'étais à vos êpier pa' l'creux d'la cliè. Mais il est v'nu un temps qu'j'ai ieu bain d'la peine à m'taithe, Tch'est qu'avait jamais ouï pâler ditèt?" Mais Bert la r'consoli bain vite et dit qu'tout était bain, Les docteurs li avaient fait pus d'peux que d'ma', Et malgré toutes lus pôtringuethies, i' l'avaient trouvé sain, Et mertchi "A" sus san certificat! Eh bein, un jour, Pîteur Saquefeu passi d'vant l'Tribunal Et fit d'san mus pour exempter san fils. Fallait qu'les membres fussent bain crédules car i' l's l's'enjôli pas mal En lus contant ses saquetinnes ment'ties! Le Président li dit comme ch'la: "Combein de vrégies d'terre?" Et sans rouogi un mio, i' dit, “Chinquante," "Alors, Moussieu, ou' comprendrez qu'si Bertie va en djerre, Je s'sai forchi de vendre toute ma pliante!” “Ou n'avez pas d'autre aide que li?” fit l'Offici Militaithe, "I' y'a, i' m'sembl'ye, une fille à la maison?” "Oh vaithe,” se fit Pîteur, “ch'est vrai, mais oulle a douze vaques à traithe Et n'a pas 'té trop bain d'pis la saison." “Et pis, i y'a aut'e chose, Messieux, ma femme n'est pas bain forte, Le docteu dit qu'i' n'faut pas qu'ou travaille. Quant à ch'la, j'pouorrais vos dithe que j'sommes touos les deux d'une sorte, Car, pour de mé, j'fais pas grand chose qui vaille." Les Membres du Tribunal avalithent ch'la comme du lait doux! Une chose bain difficile à explitchi! Ils exemptithent Bertie Saquefeu jusqu'au trente-iune du mais d'Août, Avec la fatchulté de rapplitchi!
|
Viyiz étout: