Le Ménage ès Feuvres
St. Ouën
Lé 7 d'octobre, 1972
Moussieu l'Rédacteu,
J'criyais qué l's Améthitchains 'taient pus ou mains affolés en temps d'êlection. Là, lé Président est êlu pour quatre ans, mais au but d'la traisième année lé parti politique opposé à s'n adminnistrêtion c'menche à l'êpinnotchi, et êprouve à faithe à saver au monde tch'i' n'a fait rein d'bouan et tch'i' faut l'rempliaichi, et nou-s-a à êcouter tout chu blèrnîn-là sus radio et télévîsion pour un an d'temps. Mais j'vai qué l'Sieur Wilson est à faithe la mème chose contre lé Preunmié Minnistre Heath en Angliétèrre. Ch'est tréjous la mème turlute! J'pense bein qu'ch'est ieune des choses qué nou-s-a à supporter quand nou jouit d'un gouvèrnément démocratique.
Heutheusement, j'n'avons pon pathelle embête en Jèrri. Et pourtant ch'est d's êlections d'împortance lé préchain mais. J'pense qu'la mâjorité des Sénateurs s'en vont r'prendre, et qué l'Député Jeune s'en va êt' sus les rangs pour en rempliaichi iun tchi né r'prendra pon. I' n'y a pon d'doute tch'i' f'thait un bouan Sénateu. J'éthais bein aimé vaie Madanme Betty Brooke sus les rangs. Ch'est seux qu'ou f'thait du rêvillon dans L's Êtats. D'habitude jé s'sais contre l'idée d'aver d's Angliais comme Sénateurs, mais jé s'sais înclyîn d'faithe eune exception dans san cas, car ch'est eune pétite femme d'êducâtion et tch'est plieine d'estouflia et d'vidgeu, et oulle a l'don d'la pathole et ou n'a pon d'peux d'freûler l's esprits - d'ses anmîns comme ses ennemîns - s'ou crait tch'i' l'méthitent.
J'en avons trop, dans l's Êtats, tchi n'disent janmais rein sénon "Pour" ou "Contre", et i' pathaît qu'iun d'ches jours i' s'en vont aboli ches mots-là. Ch'est en tchi ches Membres-là pouorront s'endormi trantchillement sans aver peux d'mantchi à faithe lus discours d'un seul mot! Mais tch'est tch'i' pouorront dithe ès Assembliées d'Pâraisses quand veindra l'temps d'êt' ré-êlus? Jusqu'à ch't heu, il' ont peu dithe: "J'avoue bein qué jé n'sis pon iun des cheins tchi d'vîsent dans L's Êtats, mais j'ai tréjous ieu l'întéthêt d'ma pâraisse dans l'idée et j'sai bein dithe 'Pour' ou 'Contre'"!
I' n'y a pon d'doute qu'un tas d'nouos Députés, et mème des Connêtabl'yes, tchi lus assiévent confortabliément dans la Chambre Législative n'disent janmais rein, et pis nou s'pliaint qué tout est fait et décidé par eune pétite minnorité dé chînq ou siex Membres tchi sont tréjous d'but sus lus pids d'driéthe à bagouler et dêpenser nouos sou mal à propos. Si les Membres d'campangne lus rêvilyaient et pâlaient et votaient en blio, i' pouorraient dominner la scène. Mais i' faut d'abord qué châque pâraisse faiche comme St. Ouen et êlithe des Députés tchi sont capabl'yes et tchi sont prêts à prendre d'la responsabilité. Ch'n'est pon bouan assez d'êlithe un candidat viyant tch'i' a 'té Înspecteux ds C'mîns, Offici d'Connêtabl'ye ou mème Chent'nyi. Ch'est vrai tch'i' méthite la r'connaîssance dé ses parouaîssiens, mais i' faut trouver tchiqu'aut' mouoyen dé l'rêcompenser s'i' n'a pon l'êducation et l'don d'la pathole nécessaithes pour être un bouan législateur.
Ch'est amûsant d'vaie es r'cliâmes des candidats tchi veulent êt' Députés. Les membres du mouvement souôdîsant "Démocratique", par exempl'ye, sont tous pour amender l'sort des travailleurs. I' n'pathaîssent pon rêalîser qu'un tas d'ches travailleurs-là sont souos l'aile des grands puaîsieaux des sŷndicats et divèrsément bein payis. D'ailleurs, un député est supposé êt' l'èrprésentant d'touos ses constituants.
L'aut' jour, j'viyais dans la gâzette qu'un candidat veurt êt' Député viyant tch'i' veurt aver tchiquechose à faithe pour lî otchuper l'esprit. À m'n idée, ché s'sait pus à propos s'i' voulait amender l'esprit êconomique des Êtats pour les empêchi d'continnuer à gaspilyi nouos sou!
Bouanne chance au Révérend Moussieu Peter Manton s'i' s'met sus les rangs. J'sai bein tch'i' y'en a un tas tchi craient tch'il a la tête cratchie, mais quant à mé, si ses lettres dans l'"Pilote" en sont l'rêsultat, ch'est grand danmage tch'i' n'y a pon pus d'têtes dé chu calibre-là dans l'monde! N'en v'la iun tch'est conscient du fait qué ch'est l'abondon d'disciplinne dans l'monde et dans l'Églyîse, et l'manque dé la Crainte dé Dgieu, et d'la vielle confianche dans les moeurs enraîchinnées dans les Dgiex Commandements, tchi sont la souche dé la mauvaitchi et des troubl'yes tchi nous m'nichent dans l'monde entchi au jour d'aniet!
George d'La Forge
Viyiz étout: