Moussieu l'Editeu,
Ach'teu qu'l'êlection pour Sénateurs est décidée, nous éthait creu qu'la Merrienne en éthait yeu assez, mais nouffé. Hier au sé, ayant lieut la gâzette, la v'là tch'y s'met à m'pôsé des tchéstchons.
Nou m'a dit agniet, ou qu'menchit, que l'Sieur Troy a dans l'idée d'accaté une p'tite férme à Saint-Ou et de v'nin y d'meuthé. Est-che vrai ?
Chein qu'j'ai entendu, Merrienne, j'l'y raiponnit, ch'est que quand l'temps veindra pour se r'tithé y voudrait passé l'restant d'ses jours ichin, car y dit que par chein tch'il a veu des Saint-Ouennais d'pis tch'y s'mint candidat pour Sénateur, ch'est les miyeu gens qu'nou peut trouvé dans l'Ile. Et, sans doute, il a raison.
Bein seux tch'il a raison, ou dit, et s'y qu'menche douochement avec un couplye d'vaques, tchique p'tits couochons, d'la volaille, et d'même y n'dévthait pas faithe banq'route pour tchiques années. Mais ach'teu, tchèqu'en ès des Députés? Y pathait qu'en Ville y'a des candidats en mâsse.
Par chein qu'nous entend, j'l'y dit, mais pour le moment j's'y pûs intérêssé dans chein tchi s'passe dans les pâraisses de campagne. Y'étha un mio d'rêmuage là étout.
Pas ichin à Saint-Ou, out dit, car le Sieur Amin a abandonné l'idée d'oppôsé l'Mâjeur de Gruchy, et il a yeu bein d'l'avis. Après tout, pourtchi fichi notre Député à la porte? Dans m'n'idée il a tréjous voté du bon bord, et a voté contre les dêpenseurs. Y peut pathaitre un mio drôle tchiquefais, mais ch'n'est qu'sa mannièthe. Mais, dis-mé, est-che vrai qu'y'a une femme sûs les rangs à Saint-Brélade?
J'l'y dit qu'la gâzette le dîsait et que je n'doutais pas que si l'Sieur Morrison r'êprouvait, y'éthait trais candidats. Mais, j'ajouôtit, n'y'a pas d'doute tch'il eut un grand d's'appointement l'autre jour, et s'y r'prend chutte fais y faudra dithe que ch'est un homme de couothage. Avec chonna, je n'peux pas dithe que j'approuve de mettre une autre femme dans l's'Etats. Y'en a dêjà deux là, et à ma veue ch'est deux d'trop. Tch'èsqu'tu'en dit, Merrienne ?
J'avoue, ou raiponnit, que j'ai changi un mio d'idée sûs chu sujet-là. Comme je vais les choses ach'teu, la femme tch'y s'mêle d'la politique est un imbécile. Dans l's'autres pâraisses, ach'teu?
Nou pâsle d'une femme étout à Grouville, j'l'y dit, mais ch'est p't'être du gniolin. Le Sieur Raymond Labey, à chein tchi pathait, préfèthe de continué comme Enregistreux, et ch'est un homme intélligent, sûs tch'y qu'nou peut s'fié. Saint Louothans est bein trantchille et à Saint-Jean le Sieur Le Vesconte a abandonné l'affaithe. A Sainte-Mathie nou pâsle de deux candidats, et à Saint-Sauveux y pathait que l'Sieur Mouothant tch'y fut oppôsé par un Angliais y'a trais ans à la dernié minute, pouôrrait r'êprouvé. Epis l'bouon homme Ph'lip Le Masuthi étha à s'battre étout dans Longueville, mais je n'crai pas tch'il a grand'chose à craindre.
Et à Saint-Pierre ?
Ah, là, Merrienne, je n'sais pas, j'l'y dit, mais par chein qu'nou ouait, y'a tout prospéct d'une êlection, et la pâraisse pouorrait s'trouvé hardi divîsée. Nous en sétha pûs long dans tchiques jours. À la Trin'té et à Saint-Martin il est probablye que n'y'étha pas d'changement, car les pâraissiens sont beins satisfaits des hommes tch'ils ont mint en poste.
Y n'reste que la Ville, ou dit. Sans doute y'étha des changements là.
Sans autchune doute, j'l'y dit, mais au moment nou n'peut pas bein distchuté la chance des nouviaux candidats, ou même des mêssieux tch'y sont actuéllement en office. Y s'en vont tous être entendu à l'Hôtel de Ville, et tandis j'y s'y Merrienne, j'peux aussi bein t'dithe que j'ai idée d'y'allée, mé, à chais reunions d'constituants.
Arrête un mio, man Ph'lip, ou dit, car j'éthais tchiques mots à dithe, mé, là d'sûs, ch'est accordant comment qu'tu t'comportent dans l'entretemps.
Et donc, Moussieu, j'peux vais qu'j'éthai à m'dêbroussé chais jours, ou che s'a une affaithe fichue.
Ph'lip.
1954
Viyiz étout: