Fort Lauderdale, Florida,
U.S.A.
Lé 3 d'mar, 1973.
Moussieu l'Rédacteu,
À la fîn des fîns! J'veins d'èrchéver la gâzette dé Jèrri du 16 novembre, 1972, tchi donne lé rêsultat d'l'êlection pour Sénateurs. Oulle a 'té trais mais en c'mîn, chutte gâzette-là. Ch'est presque încriyabl'ye, mais né v'là un exempl'ye du génie d'la bureaucratie des postes dans nouot' temps êcliaithi et modèrne.
Eh bein, i' faut féliciter les gangnants et lus souhaiter bouanne chance. J'espéthe tch'i' n'ont pon fait des promêsses ès êlecteurs tchi n'pouorront pon garder. Ichîn en Améthique nou s'attend tréjous qu' les candidats, à les ouï pâler, s'en vont faithe des mithacl'yes, mais eune fais êlus nou trouve tch'il' ont mangi d's oubliettes et qu' lus promêsses 'taient des m'luques et d'la castafouinne! J'sai bein, sans doute, qué les Jèrriais n'sont pon d'mème et qu' nou peut s'fier sus ieux. J'sis bein content d'vaie qué l's êlecteurs ont ieu l'bouan sens dé r'continnuer l'Sénateu Cyril Le Merquand dans l'siège finnancyi. J'avais quâsi ieu peux qué s'n âge éthait empêchi l'monde dé voter pour la, mais j'vai bein tch'il' ont ieu l'avis d'saver qu' un homme né vieillit pon d'nouos jours comme i' soulait dans les vièrs temps. Man Doue d'la vie! J'pouvais acouo sauter les fossés à s'n age!
I' y'a des pèrdants dans toutes les êlections, et j'ai grand r'gret d'vaie qué l'Sénateu Ph'lippe Rom'thi en est iun du nombre. Ch'est vrai tch'i' n'a pon 'té iun des bagouleurs dans L's Êtats, mais ch'n'est pon tréjous l'chein tchi fait l'pus d'bagoul'lie tchi fait l'pus d'travas pour lé bein-être dé san pays. Et nou peut dithe qué l'Sieur Rom'thi est un charmant moussieu et un bouan Jèrriais dans l'âme, et tch'il a rendu d'grands sèrvices à l'Île comme ambassadeu pour lé tourisme en France. Ch'est bein seux qué l'Sénateu du Pré s'en va l'mantchi. J'm'înmaginne tch'i' prînt sa défaite auve lé souori sus sa fache et absolûment sans rantcheune contre pèrsonne, et tch'i' connaît l'vièr diton tchi nouos dit qué “Nul n'est prophète siez li”. Enfîn, faut espéther tch'il étha la chance dé sèrvi l'publyi dans tchique aut' capacité, car il est trop janne et acti pour lé laissi s'mouaîsi en r'traite!
Un aut' moussieu qu' j'ai r'gret d'vaie laissi couorre san siège dans L's Êtats est l'Sieur Értu Tchéthée, tchi s'est distindgi comme Député d'St. Ouën. Nou peut dithe qué né v'la un homme întégre et couothageux tch'a voulu entréprendre eune tâche presque împossibl'ye quand veint affaithe dé pliaithe à la grand' partie d'ses constituants et des gens d'l'île en général tchi veulent bâti des maîsons, et tchi s'est quand-mème atchitté auve honneu et dîngnité. Dans la gâzette du 28 dézembre, 1972, r'chue quâsi en mème temps comme la cheinne du 16 novembre, j'vai qu'ch'est l'nouvieau Sénateu Averty tchi l'rempliaiche. J'lî souhaite bouanne chance. J'n'ai pon l'honneu dé l'connaître, mais dépis tch'il a r'chu pus d'vouaix qu'autchun aut' dans l'êlection, i' dait aver împressionné l's êlecteurs dé l'ile comme étant capabl'ye et dîngne dé confianche.
Ch'est eune belle chose pour un Jèrriais dé donner san temps et ses sèrvices dans les rangs d'la Police Honorifique dé s'n île natale, et ouaithe qué l'vièr diton nouos dit qué “Tchi sèrt lé publyi sèrt un îngrat”, ch'est mangnifique dé vaie tch'i' n'manque pon d'candidats dans la ville et les campangnes pour Officiyi d'Connêtabl'ye. Ch'est ches-là tch'ont l'pid sus la broque du bas d'l'êtchelle tchi mène au poste d'honneu - lé poste d'Connêtabl'ye d'la pâraisse! Lé temps pâssé, quand les Juges 'taient êlus par les êlecteurs dé toute l'Île, ch'tait souvent les Connêtabl'yes tchi r'chévaient ch't honneu-là, et j'ai tréjous ieu r'gret d'vaie chutte veulle couôteunme-là dispathaître car ch'tait eune fanmeuse opporteunité pour les Jèrriais d'rêcompenser lus Connêtabl'yes pour lus longs sèrvices dans lus pâraisses.
Ch'est vrai qué dans chu temps-là nou n'viyait pon tant d'mêssieux médallés sus l'Banc d'Justice, et atout un tas d'lettres majuscules au but d'lus noms, comme nou-s-a tchiquefais veu dans l'couothant des dreines années, mais i' s'atchittaient quand-mème auve honneu et dingnité.
Èrvénant au sujet d'la Police Honorifique, j'ai liu l'rapport des dêbats dans L's Êtats au sujet dans la gâzette du 16 novembre, 1972, et y'en a deux pages à digéther! J'sis êmèrvilyi d'vaie comment qu'ou fut supportée par la grand' partie des membres, et j'tais ordgilleux d'liéthe les discours - en sa faveur - du Connêtabl'ye Pithouët d'ma pâraisse dé St. Ouën, et du Sénateu J. J. L'Mèrquand, un bouan St. Ouënnais étout.
Jé n'sis pon prophète, mais j'ôse craithe qué quand la Police Honorifique nouot' belle vielle langue, et aut' institutions sindguliéthement Jèrriaises mouôrront, ché s'sa dans la pâraisse dé St. Ouën tch'i' pass'sont l'pas!
George d'La Forge
Viyiz étout: