Moussieu l'Editeu,
La Merrienne, ayant considéthé pour tchiques jours, se r'mint hier au sé a chouâisi ses candidats pour Sénateur.
“Ch'est une chose sérieuse,” ou s'fit. “Tu'as la mine d'en faithe une rîselée, Ph'lip, mais tu s'sais l'preunmié à t'pliâindre si pus tard l's Etats passaient des louâix tchi n'te pliaisaient pon.”
“Oh, ma fé,” j'l'y dit, “ch'ne s'sait rain d'nouvé. Ch'est une habitude tch'ils ont tréjous yeu. Mais, enfin, tu'en as dêjà chouâisi chinq ou six. Tchêsque est tan préchain? Tu'as ocquo tchiques noms jèrriais. Tchêsque tu'en crai?”
“Je n'sait pas trop,” ou raiponnit, “car y'a l'Douar le Tchêsne et san fréthe Ph'lip, sans pâslé d'lus couôsin Frâinque. Et je n'sait pon tchi en faithe.”
“Et pourtant,” j'l'y dit, "ch'est trais bouons Jèrriais.”
“Trais Jèrriais, vèthe,” ou dit “mais je n's'y pas seûze tch'y sont si bouons comme chonna. A qu'menchi le Douar, à m'n'idée, est ben trop dêpenseux. N'y'a jamais yeu un homme dans l's'Etats tch'y nos a couôté tant.”
“Ch'la s'peut,” j'l'y dit, “mais r'garde le bouon travâs tch'il a fait. Considèthe tch'il est responsablye pour chutte magnifique maîson tch'il sont à bâti à l'hopita pour chais nosses.”
La Merrienne capuchit sûs la tablye avec ses deux poings. “N'm'en pâsle pas, de ch't'atrocite-là,” ou s'êcriyit. “Un palais pour un tas d'hardelles tch'y s'saient ben mus siez yeux à traithe les vaques et soigni lus avers. Ch'est une âffreuse honte.”
“Arrète une minute,” j'l'y dit. “Y faut tch'y s'saient mathiées d'vant avé d's'avers.”
“Oh, tu crai,” ou dit, “J'pouôrrais p't'être dithe tchiquechose la d'sûs, mais ch'n'est pas la peine. Enfin, n'faut pas biaumé l'sieur le Tchêsne pour chutte bêtise-là, car presque touos l's'autres membres s'accordites. Quand veindra l'jour, tout probablye que j'n'oubliethai pon qu'sa grand'méthe fut née à Saint Pierre.
“Quant au Ph'lip,” ou continuit, “j'n'approuve pas de toute ch't'êducation-là, mais ch'est un charmant corps, et y vos fait si bouonne mine quand nou va dans sa boutique. Une vouaix pour l'y, et pour san couôsin étout, car nou m'dit qu'ch'est un homme solide tch'êthait deu être dans l's Etats y'a longtemps.”
“Y'en a yun qu'tu'as oublié,” j'l'y dit, “le sieur Le Gallais.”
“Ah grand doûx, nouffé,” ou dit. “Sinon pour l'y, chutte gniche-r'nouv'lée-là tch'est dans l'êtablye n'êthai jamais passé pour le Herd Book. Ach'teu combain tchi nos en reste?”
“Ocquo une tappée,” j'l'y dit. “Y'a l'Juge Hind, et deux Députés d'la ville, et l'Seigneur de la Trin'té, sans pâslé d'yun ou deux autres. As-tu pensé au sieur Journiaux?”
“Oh, y na pas besoin de s'gêné, ch't'y-là,” ou dit. “Quant au restant, faut arrêté jusqu'à la s'maine tchi veint. Ramâsse la chandelle.”
Ph'lip.
1948
Viyiz étout: