|
Ou pouvais conté, qu'un trop bouan garson, Est seux de faithe un mauvais homme, Vaut biaucou mus chanté une chanson, Putôt que d'entendre l'sien qui ronne. Des siens qui ne boutent ni ne halent De ches z'la, y ne faut pon m'en paûlé Nou ne peut pon savé chain qui valent Vaut mus hieun qui peut bouté ou halé. Y hieun a qui vos disent tréjous oui A tout chain qu'ou pouvais lus demandé De touos ches z'la, pour quant a mé j'en ri Y cherchent d'mème a vos attrappé. Y hien a d'autres qui châquent la tête Voulant faithe sembiant d'vos admithé, Chest que ches z'la ne se craient pas bête, Ergardais bain, y cherchent a vos joué. D'autres ne disent, ni oui ni nannin En rêponse à auqune question Y vos donnent des avis en anmin De ches z'la, que non ne m'en paûle pon. J'en counais d'autres qui vos repondront A chain qu'ou demandais, d'une manièthe Que deux ou trais jours oprès y pouorront Expliqui le tout en sens contraithe. Ah ! que nou me pâule tout bouonnement Des siens qui s'en perdre un seul moment Vos repondront tout, bain directement A la question faite, sans détourne'ment. Car oquo faut biaucou mus refusé Tout chain que nou ne veurs pon du tout donné Et sans cherchi auqune exquse Dithe net et carrai, je refuze. Hieun a d'autres, chest tréjous lu femme Qui ne veurs pon oblighi personne Tandis que chonna est tout du gnolin, Car ou voudrait bain aidghi au vaisin. Que nou m'pâle d'un anmin qui dithea Je fetheai comme chonchi ou chonna Et stickthea a tout chain qu'il ethea dit Sans que nou puisse auqun'ment l'changhi. Dans les Elections, si les gens voulaient Dithe es Candidats chain qui fetheaient, Et combain que vela qui lus sauvtheai De peine, n'avé pon a galvaudé D'un but a l'autre toute la paraiss, Sans que pour un seul moment y cessent. Si disaient pour qui qu'ils allaient voté, Nou n'itheai pon d'autre les tormenté. |
Viyiz étout: