Les Pages Jèrriaises

Des Sénateurs Batilleux

Et d'Belles Bêtes à Springfield

Moussieu l'Editeu,

Je r'vint du 'show' d'l'Ile en temps pour lé thée, auprès une raide bouonne journée et eune exhibition d'bêtes tchi m'rêcauffit l'tchoeu. Ch'n'tait pas l'nombre tchi faisait l'show'r'merquablye, ch'tait la qualité dans toutes les clâsses, une qualité si uniforme qu'les Juges, auprès aver chouaisi les deux ou trais miyeuthes, avaient une djobbe a pliéchi l'restant. A cause de chenna i'y'avait des moments qu'nou c'menchait à craithe que nou pouôrrait êt'e la jusqu'a la niet. Mais pûs tard i'vintent à lus dépêchi: et la dernié clâsse sortit du 'ring' en temps pour la parade à trais heuthes et d'mie.

Bein seux, la Merrienne tchi 'tait toute contente dé m'vais r'vénin d'si bouonne heuthe et si sobre, voulit saver tchèsque j'avais veu, mais j'vis bein vite qu'ou 'tait pûs concernée dé chein qu'oulle avait liut dans la gâzette au sujet dé deux Sénateurs tch'avaient voulu s'entre-battre y'a tchiques jours. I'faut qué j'vos diche qu'ou m'avait dit d'vant m'n'aller dé dêcouvri si ch'tait vrai. Et don ou s'mint à m'tchestchionner.

'Oui, Merrienne' j'li dis 'i'pathait qué deus d'nos Sénateurs avaient c'menchi à s'entrecapuchi l'autre matin sûs la cauchie, mais au 'show' personne né pathaissait saver tchèsqu'i'taient. Entre nous, j'crais tch'ils avaient décidé entre yeux de garder l'affaithe trantchille.'

'Comme chenna' ou s'fit ' tu'es aussi savant àch'teu comme tu 'tais à matin?'

Comme ou d'vez saver, Moussieu,y'a des moments dans la vie quand nou fait la mine d'êt'e pûs bête qu'nous est. J'châtchis la tête comme un pouôrre innocent, mais la bouonnefemme né fut pas satisfaite, et ou s'mint à penser.

'Lé Sénateur Krichefski n'est pas batilleux' ou dit, au but dé tchiques minutes. 'Et, pis s'il attrapait un coup dans l'estomac, les consequences pouôrraient êt'e bein sérieuses. Nan, ch'n'tait pas li. Hedley Maillard a pûs d'avis qué d'aller faithe une patheille bêtisse, et j'crais pover en dithe autant d'man couôsin, lé Fred Dorey, mais j'voudrais en êt'e seux pasqué j'ai ouï qué quand il est mârri i'n'a peux d'personne.'

'Ne t'gène pas, ma vielle' j'li dis. 'J'ai veu l'Fred au 'show' et i'n'avait pas d'blackeye'. I' faut qu'tu cherche ailleurs.'

'Lé Sénateur Norman n'a pas tréjous sa santé' ou dit, 'et l'Sénateur Rumfitt est tréjous l'preumyi à donner un bouon exemplye. Tu n'voudrais pas m'dithe, par chance, qué not'e Sénateur 'J.J.' 'tait mêlé là d'dans? Et pis, en autchun cas, il en fallait un autre.'

'Bein seux' j'li dis 'i' faut êt'e deux d'vant c'menchi à s'entre camaillyi, mais tout chennechin, Merrienne, ch'n'est qué d'la spétchulation. Faut dithe qué la 'Post' sé trompait.'

Mais la bouonnefemme n'en voulit rein. 'Nouffé, Ph'lip, ch'est seux qu'ou n'sé trompit pas. Tout ch'que j'voudrais saver àch'teu ch'est tchèsqu'i capuchit l'preumyi, et pourtchi? Tu'en sais pûs long qu'tu n'veur mé dithe, man viér balloque, mais j'ithai vaie lé 'Douard Lé Maistre, tch'est àch'teu sus la 'post', et tch'a une bouonne tête sus ses êpaules. I'n'voudra pas dithe nânnîn à sa tante.'

'Ah' j'li dis 'ch'n'est pas un couôsin chutte fais; ch'est un n'veu. Comment qu'chenna s'fait?'

'J'n'ai pas l'temps dé t'explitchi' ou dit. 'Allons, as-tu veu d'bouonnes bêtes au 'show'?'

'Damme, oui Merrienne' j'li dis 'epis hardi. Dans toutes les clâsses i' n'y'avait rein d'faillyi. Toutes les bricoles qué nous a veu tchiquefais avaient resté dans les fermes.'

'Et tchèsqu'a fait l'championnat des vaques?'

'L'Sieur Rom'thi d'Saint Piérre, auvec sa jeune vaque' j'li dis 'mais y'en avait une aut'e qué j'aimais aussi bein, et les Juges ont 'té longtemps à décider entre les deux. Ch'tait la charmante p'tite vaque au Sieur Hickey, d'la Trin'té, tch'avait fait lé champion d'vant aniet. Il est vrai qu'oulle a bêtôt huit ans, mais jamais j'n'l'avais veue pathaitre si bein. Oulle en a 'té bein près.'

'Et les Juges? J'pense bein tch'ils ont fait des mêprinses, comme de couôtume.'

'Nouffé, pas hardi' j'li dis 'mais j'n'sais pas comment tchi' sont v'nus à mettre la ' senior yearling' à Frainque Avri traisième dans sa clàsse. A ma veue n'y'en avait bein d'autres comme mé. Dans les boeux, y'en avait p't'êt'e tchi 'taient pûs haut ou pûs bas tch'ils éthaient deu êt'e mais nou s'attend tréjous à chenna. Le Jack A'Court a fait raide bein, comme de couôtume et l'Sieur Arthu d'Sainte Mathie étout, sans compté lé Frainque Avri. A l'prendre, iun dans l'autre, ch'tait un raide bouon 'show' tout travers.'

'Et' ou d'mandit 'as-tu par chance rencontré d'autres candidats pour Sénateur?'

'J'n'ai veu qué l'Bill Perchard' j'li dis 'et il est bein décidé d'êt'e candidat. Etout j'ai d'mandé à Percy L'Masuthi si prend pour Député pûs tard.'

'Et tchèsqu'i't'a dit?'

'Il a châtchi la tête, et m'a dit pas àch'teu' mais i'pouôrrait changi d'idée.'

'Ocquo une autre cose' ou dit 'J'vais qué les fermiers s'en vont à payi pûs pour envier lûs patates en Angliéterre. I'm'semblye que ch'est une honte.'

'Bein seux' j'li dis 'mais ma pouôrre fille j'fallait s'y attendre. Le hommes sus les cauchies ont yeu ch'qu'i voulaient: ils éthont pûs d'gages et f'thont mains d'travas, et i'faut qu'les fermiers paient. Ch'est l'Union àch'teu tchi gouverne l'Ile et non pas nos Etats. Si chenna continue tu vêrras qué d'vant long i'y'étha un nombre des amins du Sieur Hyman dans la Chambre comme Députés et même comme Sénateurs, et i'faudra les péyi et ch'ne s'sa pas l'Union tchi les paietha. Chein qu'oulle a fait jusqu'ichîn n'est qu'un c'menchment, et i'n'y a pas un membre des Etats tchi n'lé sait pas.'

'Si ch'est d'même' ou dit 'j'n'éthions qu'une chose à faithe, man Ph'lip. Che s'sa d'abandonner l'fermage et d'nos en aller ès 'Cottage Homes'.'

PH'LIP
21/5/1960

 

Viyiz étout:

 

Les Pages Jèrriaises