Acouo eune fais, nou ouait des tchestchions entouor l's êlections. Y'en a tchi voudraient voter hors touos nos Sénateurs ch't' année à seule fîn d'les rempliaichi en blio. Mais coumme dé raîson, ch'est raîque la maîntchi des Sénateurs tchi lus en vont ag'ver lus mandat à la fîn d'l'année; i' faudrait attendre 2011 pouor pouver tâchi d'fliantchi hors les six d'restant.
Mais, qu'nou dit, ch'est du niolîn d'n'aver pon d'êlection quand nou pouôrrait dênichi toute la dgaîngue dé reintchivâles en même temps. Pouortchi qu'ch'est raîque en Jèrri qu'ch'est d'même?
Ah mais, Jèrri n'est pon eunique dans tout chenna. Deux têtes valent mus qu'ieune, mais dans not' système eune chambre vaut mus qu'deux. S'nou r'garde d'aut's pays, ch'est hors du c'meun d'aver toute la haute chambre êlue d'auve la bâsse.
En Nouvieau Jèrri les membres dé l'Assembliée sont êlus touos les deux ans, mais les quarante sénateurs sont êlus pouor deux ans, pis pouor quatre ans, acouo pouor quatre ans, et dèrché pouor deux ans et aînchîn d'siette. Nou n'y comprendrait ni lard ni couochon.
Les Sénateurs fédéthaux d's Êtats Unnis ont un tèrme dé siêx ans, mais un tchièrs d'entre ieux sont êlus touos les deux ans - et v'là tch'est pus à co coumme siez nous.
Les Sénateurs Kentutchiens, Califourniens, Alastchiens et d'aut's sont êlus pouor quatre ans, et la maîntchi d'entre ieux sont êlus touos les deux ans.
En Illinnouais, y'a des Sénateurs êlus pouor deux ans et y'en a tchi sont êlus pouor quatre ans - ch'est s'lon l'distrit et l'année d'lus êlection. Y'a des distrits tchi sièvent un patron d'un tèrme dé 2 ans, pis 4 ans et 4 ans, d'aut's tch'ont d'êlections pouor des tèrmes 4-2-4, et les restants font 4-4-2. Lé Sieur Barack Obama soulait êt' un Sénateu Illinnouaisien - et s'i' comprannait chenna i' comprendrait autchun problième à la Blianche Maîson!
En France, les Sénateurs n'sont pon êlus par l'peupl'ye du tout, ch'est en tchi y'a eune manniéthe dé collège êlectoral (coumme pouor nos Juges) dans tchi les grands êlecteurs sont des députés, des maires et des consilièrs. Jusqu'en 2004 les Sénateurs 'taient êlus pouor neuf ans, et un tchièrs d'entre ieux êlu touos les trais ans (coumme nos Sénateurs soulaient êt' jusqu'en 1966). Mais à l'av'nîn la maîntchi d'entre ieux s'sont êlus touos les trais ans (coumme nos Sénateurs d'pis 1966).
Y'a des pays, bein seux, où'est qu'les sénateurs n'sont pon êlus du tout, mais appouaintés. Tout coumme, en Jèrri j'allons êlithe des Sénateurs ch't' année et, coumme nou dit, votez pouor ou votez contre, mais votez!
Geraint Jennings
Viyiz étout: