|
J'me r'souveins du temps qu'les vièrs Trin'tais Aimaient hardi à s'entre-quétillyi Ah! fallait vaie coumme i' s'battaient Dans une êlection pour Chantgni! Ch'tait là l'bouan temps, quand les gros bonnets, S'n'allaient faithe le tou du canton Ov les pautes bein rempl'yies de p'tits jaunets Qu'étaient distribuès dans pus d'une maison! Nou vendait bouan prix d'faillis boeux d'huit jours, Et de p'tits animaux changeaient d'cotin Et vivaient d'autre chose que d'pouorres tiges d'chour Quand l'affaithe appréchait - tchic temps d'vant l'scrutin! Mais tout ch'là est passè - n'y'a pus d'bouan dinièrs Pour les partisans des Rouoges et des Blus; Les hoummes et garçons sont sièz yeux touos les sièrs Et persounne ne veint taper douch'ment à l'us! Ergardèz ch'tannèe, tch'est qui s'passe ichin, Les deux Chantgnièrs actuels - qu'où' connaissiz tous - Se laissent réêlithe sans aver hèrtchin! Et les têtes de parti trouvent chounna d'lus goût!! ****** Oh! George!! Oh! Nicqless!! y'où don qu'est l'vièr temps? Quand les vieaux d'la paraisse avaient tous si grand sai', Quand les Rouoges et les Blus montraient les ribans, Quand tous l's'êlecteurs 'taient excitès au sai', Quand chatchun avait la pus grand libertè Quand nou s'couochait parfais bein tard le matin, Quand certains, j'ai ouï, oubliaient même lus llièt Et qu'lus femmes en avaient un divers chagrin! Et quand les pouorres djâtres en arrièthe ov lus râts, Se fichaient, en riant, de touos les Vingtniers, Et r'gardaient du bord de lus Candidats, Ov espéthance et jouaie r'lîsants dans lus yièrs! Elie 1914 |
Viyiz étout: