Deustrais d'nos amins étaient dans la boutique l'aut'e jour à distchuter, en s'passant l'temps, le prix des patates, l'êlection pour Connaîtablye, etc., quand iun d'ieux, qu'était mâté l'long d'la porte à r'garder les passants, se touâni d'bord et nos d'mandi, “Est-che qu'i' y a tchique enterrement à matin?”
Un autre li raîponni. Pas que j'aie ouï pâler, mais tch'est qui t'fait d'mander chenna?
Oh ch'est que v'là deux hommes qui passent avec châtchun lus nier ballot souos lus bras et je criyais peut-être que ch'tait deux d's hommes à Sinnatt ou à Croad qui s'en allaient à un enterrement.
Je dêhallîmes à vaie tch'est que ch'tait et je r'connu les deux messieux, mé, et je m'mins à rithe comme un fo.
Tch'est qu'tu trouves de si amusant té, Caouain? le sien qui l's avait veus l'prumi me d'mandi.
Oh! j'li raîponni, ch'est que je n'crai pas que nos Avocats essaient pus enchantés qu'chenna si savaient qu'ils avaient 'té prins pour des croque-morts!
Des Avocats! Tch'est qu'tu nos chantes là? Des Avocats ont i' l'habitude de lus promener dans la ville avec un nier balluchon sous lus bras?
Oui, acheteu, j'li raîponni, chu ballot-là qu'ou viyiz là est lus robe officielle, qui sont obligis d'mettre sus lus co aussi bain dans la P'tite Cour comme à la Cour Royale. Ch'est une nouvelle ordre qu'ils ont r'chu à ches dernyi, alors i' sont obligis de tchéthier lus manteau d'une pliaiche à l'autre, tout comme un peintre qui porte san d'vanté, en attendant qu'ils en aient châtchun une deuxième de faite, afin d'en garder iune à châque pliaiche.
Mais tch'est qui peut être la raison d'un patheil changement.
Ah dame, je n'sais pas, j'li dis, à mains que che sait que l'expérience a démontré que quand un Avocat est vêtu d'sa robe officielle, v'là qui n'peut qu'accentuer la dignité de sa profession et l'faithe penser au serment qu'il a prins, chein qui l'empêche peut être de conter tant d'ment'ties au Juge comme i' f'thait s'il 'tait dans ses habits d'touos les jours.
Au moment d'êcrithe c'hut article chin, je vains justement d'appren- le résultat de l'Election pour Connaîtablye.
Et comme touos vous j'ai 'té êtonné par l'ênorme majorité du Sieur Ferguson par sus san contchuthent.
Mais, prenant toutes les circonstances en considéthation i' fallait quâsiment s'y attendre, quoique la dêfaite de Moussieu l'Tchaîne n'est d'autchune manièthe déshonorante pour li.
Il a 'té battu par un Moussieu qui jouit d'une immense popularité, qu'est d'ailleurs bain méthitée, un homme charmant et tout-à-fait capablye de remplyi les fonctions d'la cherge à latchelle il a 'té êlu par le peuplye.
Mais nous peut en dithe autant du candidat perdant, et ch'est bain rare que nou vaie deux hommes de chu calibre-là prêts à la même occasion, à mettre lus services à la disposition du public et consacrer lus temps et lus talent pour le bain être de la communauté.
Dans ches conditions-là il est péniblye pour les habitants d'la ville d'aver à dithe à iun d'ieux, “Merci, la même chose, mais je n'avons pas besoin de vos services pour le moment, une autre feis si en cas, je nos féthions un pliaisi - et ainsi d'suite.”
Mais malheutheusement, dans bain des temps, i' n'y a pas “une autre feis,” l'occasion ne se r'présente pas, ou bein quand ou s'présente, le même homme n'est pas dans les sentiments de s'y r'prêter.
Eh bain, je voudrais suggérer un r'miède, mé!
Dans une occasion comme chette chin, pourtchi pas diviser la ville dans deux districts?
La Cour pouorrait assermenter nos deux Messieurs et lus baîlli châtchun lus district à contrôler.
Entre nous villais, je sommes tréjous à tintamarrer pour augmenter nos réprésentants dans l's Etats et l'evchin don une glorieuse opportunité.
Et la chose es'sait si facile.
Le Connaîtablye du Ouest aithait ses “headquarters” dans York Street comme actuellement, et pour les besoins de l'autre maintchi i' y a un grand bâtisse en vouaie de construction du côté d'Springfield, un êdifice qui probablyement ne servitha jamais de rain à rain, mais qui f'thait un magnifique “Hôtel-de-Ville.”
Les dévoirs de Connaîtablye pour une ville de quâsi trente mille habitants sont trop onéreux pour un homme tout seu, ch'est pourtchi partageons les en deux.
La tchestion vaut bain la peine d'être êtudiée, n'est-che pas, sinon que pour chute feis, je crains que l'Caouain l'a minse en avant un p'tit mio tard.
Caouain
1924
Viyiz étout:
