Les Pages Jèrriaises

Ou zêtes pour le "balô"

A l'Editeu de la Vielle Chronique

Monsieu l'Editeu, - Et me étou, j'sis de Saint Ou, et des Landes, j'vos airais êcrit i y a longtemps, mais je n'cryais pon qu'ousz airais imprimet man jerais. Je n'sis pon de l'avis de man vaisin qua écrit dans la Jeune Chronique et si ou voulais bein je vos dirai pourtchi.

Ou zêtes pour le "balô" dans les élections et me étou, et si jêtions consultais à St. Ou, mais par le systèm du "balô" les très quarts des St. Ouennais s'aient de vot avis.

Y paraît qu'ou z'avez changi d'opinion et qu'ou criiz que des juges de loué devzaient être des hommes de loué.

Yia pus de chinquante ans que j'prenons vote gazette dans ma maison, et j'avons ach'teu au sujet des juges, les mêmes idaies que vous, j'en pâlons souvent ov nos vaisins et biaucoup de nos bouannes maisons craient comme nous, que pour faize des saulers y faut un cordonnyi, pour faize des braies y faut un couotuzi, un écrivain pour faize des contras, un montryi pour faize des montres et un homme de loué pour faize un juge.

J'ai tai juge à not agricultuze, j'counais les points des bêtes à counes - Y disent dans le vaisiné que j'sis un bouan juge de bêtes - mais si y m'mettaies juge à la Cour pour les loués y dithaient que j'sis un bête de juge et j'crai que che sezait vrai.

Man vaizin qua écrit à la jeune Chronique dit qu'y faut marchi ov le tems et usé du pruning knife; chès là d'langlichonnie que jen' comprens pon, mais j'sis de s'n avis qui'n faut pon y met la hache - y faut amendé, pon détruize - nommé deus juges payis au publiq ne sezait pon détruize mais amendé. Quand nou paye le juge de la Petit' Cour che n'tait pon détruize et personne annié ne sen pliaint.

Le fils de not' vaisin des landes es pus malin que san pèze denpis qui dit que dès quil a veu la cour a l'ouvrage il est d'avis de payi ses juges. V'la cheu que chest descoler ses aviers.

Sakagiz ocouore quiqune des vielles idaies - les drouêts du seigneus - jambage, cuissage et autres, nos vielles abominablles élections, les Dièmes à nos prêtres et ès autres - sakagiz, sakagiz, ou zatrappezais raide de coups de pus chest vrai - mais y faut que tchiqu'un les attrappe et vos épaules sont larges - allais-y, j'sommes des vôtres.

Douard des Landes
11/9/1889


 

Viyiz étout:

 

Les Pages Jèrriaises