Moussieu l'Editeu,
Continuant l'histouethe que j'avais qu'menchi la s'maine passée, quand la Merrienne s'etait mînse à chouâsi les candidats pour Senateur tch'y l'y pliâisaient, ou vos souveindrez qu'oulle en avait trouvé quatre, et tchi y'en fallait acquo huit, puisque oulle tait décidée d'voté pour le nombre permînt par la louai.
Y'tait dans les djais heuthes, et j'l'y dit tch'il tait temps d'nos mettre au liet, mais ou n'voulit pas en ouï paslé.
“Quand je qu'menche une djobbe” ou dit, “j'aime à la finni. Ach'teu tchèsque y s'sa man chinquième? Ah, véthe, le Juge Billot. J'n'ai pas l'honneur de l'connâitre, mais la Louisa l'rencontrit à un bézaar l'année pâssé, et ou dit qu'ch'est un charmant corps. Ch'est d'bouons monde, les Billots. E'rgarde san fréthe, le Charles, tch'est Connêtablye de Saint Martîn. N'eu v'la yun tch'y n'a jamais tait pour hauchi l'rât. Une crouâix contre san nom ch't'y-la.”
Y faut que j'vos explyique, Moussieu, qu'la Louisa est yunne de nos niéches tch'a mathié un Grouvilliais. Comme la Merrienne, oulle a trop d'béque, et d'pus d'un sens oulle est bête comme ses pids, mais ou n'est pas sans avé tchiques bouonnes idées, et sans doute oulle avait raison au sujet du Juge Billot. J'dis à la bouonnefemme que j'en approuvais.
“Quand tu n'en approuv'thais pas,” ou s'fit, “v'la tchi ne f'thait autchune difféthence. Le jour de l'êlection tu f'thas comme tu voudras, et mé je f'thai comme je voudrai. Man prèchain l'Juge Cabot. Je n'l'ai jamais veu, mais un homme tch'y porte chu nom-là n'peut pas sinon être un bouon Jèrriais.”
“Y dev'thait attrapé des vouaix à la Trin'té,” j'l'y dit. “Nou n'peut pas touôné un dêtou dans chutte pâraisse-là sans capuchi contre un Cabot. Ch'est piéthe que des lapins.”
“Tant pus qu'y'en a, tant mûs,” dit Merrienne. “Ch'est un bouonne race. Combein qu'n'en v'la?”
“Six,” j'l'y' dit. “Y t'en faut ocquo une demié-douzaine. Mais dépêche-té car je qu'menche a avé sommé.”
Ou s'mînt à s'ebâillyi. “Et mé étout,” ou dit, “mais y faut qu'j'en trouve ocquo yun d'vant ramonté. Montre-mé la liste. Ah, justement, le v'shin, Le Juge Collas. J'éthais deu pensé à l'y d'vant.”
“Et pourtchi chonna?” j'l'y demandit. “Tu n'le r'connâitrais pas si tu l'rencontrais dans la route. J'n'ai rain contre l'y, mais au mains, d'vant voté pour un homme nou dév'thait en savé un mio pûs long.”
“J'en sais assez,” ou dit. “J'me r'souvains d'Mousieu Collas, tch'y soulait prèchi dans nos chapelles, et ch'tait un homme comme nou n'en viyait pas hardi. Ben seûx qu'ch'est yun d'ses d's'cendants. Combain tchi nos en reste?”
“Chinqe” j'l'y dit. “Mais laisse le réstant jusqu'à d'main, j't'en prie. J'dors sûs but.” Et nos v'la hors à nos couochi.
Ph'lip.
1948
Viyiz étout: