Fus tu à la Salle Parouaissaile l'aut' Jeudi êcouter les candidâts pour Senateu, me d'mandit le Ph'lip Desclios l'aut sé. 'Mé, j'n'y fus pas, car j'avais eune vaque en train d'vêler.'
'Mon Ph'lip' j'lis dis, 'mé j'n'y fus pas nintout. J'avais envie d'y'aller, mais à m'n âge j'n'aimes pas sorti la niet. Et pis, J'pensis que touas ches pèrrots-là a bailli d'lus goule, v'la tchi s'n allait prendre du temps, et l'docteu' m'dit que j'devrais êt' au liet à neuve heures au pus tard. Ch'n'est pas que j'fais tréjous coumme les docteurs me disent, mais par huit heures et d'mie j' c'menche à penser au liet'.
'A chein, qu'nou' m'dit' s'fit l'Ph'lip, 'tu n'mantchis pas grand' chose. Mais, dis-mé, pout tchi d'ches dgiexsept candidâs que t'en vas voter?'
'Je n'sais pas exactément' j'lis répounnis, 'pour tchi que j'm'en vais voter mais j'sais déjà bein les siens tchi n'éthount pas ma vouaie. Te r'appeles-tu du vièr Georges él Co d'Rozé, dans l'vièr temps quand j'avaimes deux partis à la Trin'té, les Rouoges et les Blius et, bordées d'electioun, le Georges soulait s'faithe: J'sis Rouoge dans l'âme, j'votrais pour eun trounc d'chour pustôt que d'voter pour eun Bliu'.
Et bein mé, J'pense démême au sujet d'certains, candidats tchi sount sus les rangs.
Je n'dis pas au Ph'lip pour tchi qu'j'allais voter mais j'nos mînmes à dischuter les candidates, surtout lus d'fauts, et j'avais ensé d'les racounter à mes lecteurs, mais je prîns l'avîs des siens qui s'y r'counnaissent pas qu'mé et i'm'ount dit que v'là tchi f'rait du mauvais sang d'eun bord et d'l'autre, et d'même j'm'en vais m'taithe. Mais j'm'en vais vos dithe, je n'sis ni sage ni discret et j'ai passé quarante ans dans l'Service diplomatic sans sagesse ni discretioun, et je ncrais pas que v'là tchi m'a fait grand ma.
Quant ès candidâts, y'en a que je n'counnais pas mais i'm'semblyient n'aver pas grand pais dans lus manches.
'Dgâtre sait' s'fit l'Ph'lip, 'té et mé, j'soummes buoans vièrs Jèrriais, mais au jour d'aniet chein que j'pensouns ne coumpte pas pour chi. J'avouns déjà d'drôles de gas dans l's Etâs, de ches soûo-disants 'modernes' qui veulent boulvérser tout, mais, coumme té, j'crains que les nouviaux Etâts s'en vount etre bein piéthes. N'ou sé d'mande tchi dgiâble est dev'nu de not'Jèrri.'
'Bah, bah' j'li dis, 'tu n'gagnes pas rein de t'faithe la bile. Coumme té, j'dêteste chein qui s'passe en Jèrri d'ches jours, j'sais bein que y'érat acquo d'buons Jèrriais dans l's Etâts après ch't êlectioun, mais i' sprounent renvèrtchis par les membres qui n'sount pas Jèrriaise, déjà achteu dans la majorité. Mais, té et mé, tchiqué j'pouvouns faithe? Dans chutte vie, mon garcoun i' faut ércounnaitre que y'a bein des choses que nou'n'aimes pas mais qu'nou' m'peut pas coumbattre.'
'Ah, j'sais bein' s'fit l'Ph'lip tout mînsérablye,' que ch'est d'not' faute. Coumme tu m'as dis d'vant, j'éthaimes deu nos rapp'ler tchi qu'i' s'arrivit à la brébis, toute plieine de fouai, quand oulle ouvrit sa porte au loup et s'fit avaler'.
Lé Vier Trin'tais.
JEP 28 October 1993
Viyiz étout: