Tant pus d'otchupations et d'travas qu'nous a, tant pus les gens cherchent oquo à vos en imposer. Du moment que la Louai Militaithe fut minse en forche et que les jaunes formes d'exemption pouvaient se protchuther siez les greffiers des difféthents tribunaux, i' n's'est presque pas passé un jour que nou n'm'en ai apporté si bouan et si bête, que les prumiers jours je faisais chu pliaisi-là à touos les siens qui m'le d'mandaient, sans penser pour un moment à r'cliâmer auchune rêcompense ou rétribution, mais le rêsultat en fut que l'brit couothi par toute la ville et la campagne que l'Caouain n'était pas un “aigrefin” et qu'i' s'faisait un pliaisi de remplyi les formes d'une maniéthe des pus compliète et satisfaisante sans chergi un seul sou. Quand nou fait d'même du travas grâtis nou trouve naturellement pliain d'monde à vos bâîlli de l'empliai, alors comme je vos ai dit j'y était si souvent couverte de ches jaunes papiers là que Marie Hibou se mins à gronner et à dithe que ch'tait assez pour bâîlli l'jaunisse à toute la famille.
Heutheusement que v'là tchi n'duthi que pour un temps et je vos asseuthe que j'étais bain content quand la date pour la rentrée des formes fut arrivée.
Mais je n'tais pas pour être laissi bain longtemps en paix.
V'là-t-i' pas que la s'maine passée une femme arrive siez-nous et criyi du bas des d'grets, “La Caouain est-i' là, si' vos pliaît?” “Oui dja missice,” je li dis, “ramontez.”
Ou ramonti et je li d'mandi bain polîment: “Et tch'est qu'i' peut y aver pour vot'e service?” “Eh bain, Caouain, tu eus la bonté l'aut'e jour de remplyi la forme à man garçon, et je sis v'nue te d'mander de m'faithe oquo un aut'e pliaîsi. J'espéthe que tu n't'en vas pas me r'fuser.”
Je sis dévenu un mio indépendant à ches dernyi, alors je li dis d'un ton hautain: “Ch'est tout selon, madame! Vos pliaît-i' explitchi aussi nettement que possiblye la natuthe de vot'e rétchête?”
Oulle hésiti un moment, et pis ou dit: “Je sis v'nue pour te d'mander de le r'présenter dévant les tribunaux.”
“Vraiment? Ou m'faites un grand honneur! Mais ma pouore missice, je n'sis pas Avocat!”
“Nan, je l'sais bain, mais nos gens ont pus d'confiance en té qu'en auchun d's Avocats!”
“I' s'saient fliattés d'vos ouï dithe chenna.”
“P't-être, mais ch'est d'même pourtant. Eh bain, tu n'm'as pas oquo dit, le d'fendras-tu?”
“Devant que d'vos promettre, je voudrais pus d'détails quant ès raisons pourtchi qu'i' veurt être quiergi. Tchille âge qu'il a?”
“Vingt-chinq ans!”
“Est-i mathié?”
“Mathié! Es-tu fo? Il a assez à faithe à souôstenin sa pouore méthe sans aver une autre femme à maintenin.”
“A-t-i' passé d'vant les docteurs?”
“Oui, la s'maine passée, les peûles qu'i' sont!”
“Tch'est qu'i' lis ont fait, don, ma pouore missice?”
“Tu veur dithe, tch'est qu'i' n'li ont pas fait! Ils l'ont fait se d'shabillyi tout nu parmi un tas d'autres hommes, l'ont fait dêhaller sa langue, li ont capuchi l'estoma et sonné les côtes, l'ont fait toûtre et dithe, “ninety-nine,” enfin i' l'ont fait subi toutes les humiliations imaginablyes, que l'pouore garçon n'avait qu'd'en mouothi d'honte sans pâler d'la fraid, et pis finalement i' l'ont dêcliathé “A 1” et li ont dit de r'mettre ses habits. Ah! j'voudrais aver 'té là, mé, je vos l's aithais arrangis, à ramasser man garçon comme chenna!”
“Alors missice, s'il a passé “A 1,” il en s'sa d'autant pus difficile à exempter. Combain d'terre qu'ous avez?”
“Tchinze perques d'gardin et un mio d'côtil.”
“Gardous du bestias?”
“Oh oui, une biche, et i' n'y a qu'li qui peut la traithe. Si ch'est qu'i' s'en allait je s'sais obligie de tuer la biche ou d'la vendre.”
“Faisous des tomates?”
“Oui, touos l's ans j'en pliantons deux rangs le long d'la muthaille. Et ch'est li qui les arrange et qui les “spray,” i'n'peut pas souffri que personne d'autre y touche. Si i' s'en va, ches tomates là essont perdues.”
“Ecoutez, missice,” je li dis, “ou devethiez bain saver que ches exchuses-là ne sont pas suffisantes pour les messieux du Tribunal. I' faut tchiquechose de pus plausiblye.”
“Vaithe, je l'sais bain. Ch'est pour chenna que j'sis v'nue à té. Tu pouorrais dithe que l'gardin tcheint à peu près douze vrégies, et dans tan discours, treis vaques pouorraient rempliaichi la biche, et tu pouorrais ettou allouogni les rangs d'tomates un mio, - sauver l'garçon, enfin!”
“Madame,” je le dis, “i' n'y a qu'une seule raîponse à faithe à vos propositions. Le Caouain des Chroniques a s'n honneur à garder et i' n's'en va pas terni s'n êtchusson, quand che s'sait pour sauver chinquante de vos garçons!”
“Allez trouver un Avocat!”
Caouain
1917
Viyiz étout: