Nouos v'la dans la Nouvelle Année. I' faut espether que ch'tannée ichin s'en v'a être eune bouanne année pour tout l'monde, et eune millieuthe année pour les fèrmiers.
J'tions invités à passer l'jour de l'an siez not' vaisin Mess Fitchet, et j'avais bouanne espéthance que l'grand d'ses fi's, Ph'lippe, f'sait la carre à Souky, car j'voudrais la vaie engagie à un garçon comme li d'vant qu'chut villais là, Burlington Berty, c'manche à la hanter siez nous. Mais i' pathaît que j'nai pas d'chance. V'la qui m'fait mêrri' quand j'y pense. Enfîn, j'vais vouos raconter comment qu'la séthée s'passit.
Mess Fitchet avait învité ma belle-méthe, car oulle est restée siez nous d'pis Noë, et Piteur Tout'seu 'tait là étou. J'mênagit d'suggether à Missis Fitchet de mettre la pièche à Ph'lippe a la tablye, et oulle enn' 'tait bein contente car oulle a tréjous admithé not' Souky.
Les décothâtions d'Noë 'taient acquo dans l'parleux, - y'avait des ribans d'papi dé toutes les couleurs pendus partout et des "Blue Lights" 'taient pendues au piafond ichin et là.
J'cliergîment les tablyes, et l'meublye dé d'dans l'parleux et j'nouos mîment à danser. Ph'lippe avait învité ieun d'ses amins qui joue l'Flutina et y'avait deux ou trais des gâs d'la "Band" dé Guy Fawkes avec lus flûtes, et Nic'less Plaieouel vînt avec san violon.
J'avais prînt Ph'lippe de côté, et j'y'avais dit à l'ouothelle qué Souky voulait danser avec lî toute la séthée, quand v'la l'domestique qui veint l'cherchi pour aller dans l'êtablye soigni lus millieuthe vaque qui 'tait en r'nouv'lant. Ph'lippe, ou' viyis, est quâsi aussi bouan comme un Docteu d'Bêtes quand i' s'agit de r'nouv'ler des vaques.
J'voulais arrêter qu'i' r'vînses dévant c'manchi à danser, mais l's'autres ne voulaient pas attendre, et chut fichut Nic'less Plaieouel là mînt san violon d'côté en disant qu'y'avait assez d'musiciens sans lî, et s'mînt à danser avec Souky. J'en 'tais enorfanté, mais j'pensis que Ph'lippe èrveindrait en temps pour s'assiéthe avec Souky pour le souper qui nouos attendait.
J'dansîment les vielles danses du temps jadis, - les oualses, quadrilles, heel-one-two-three, et bein d'autres que j'ait r'oublié les noms, car j'nait jamais 'té un grand danseux mé-même. A la piéche de danser, mé, j'lus chantiti deux ou trais chansons "Vive la Compagnie," que man poure vier amîn Jock Luce, de mémouaithe respectée, avait traduit en Jerriais, "Marlbro s'en va-t-en Dgerre, Mironton, Mironton, Mirontaine," "Belle Rose," "Au clair de la Lune qu'il fait beau dormir," et "Beautiful Jersey" en Angliais. Ch'tait la seule que j'chantit en Angliais, car i'n'y'avait que Nic'less Plaieouel qui l'comprend, - et, entre nous, j'nen crait pas grand' chose, de chut mâtîn-là. I' fait des teurs parcqu'i' joue l'violon, et i' fait la mîne d'aver oublié l'Jerriais dépis qu'il allit en Angliéterre apprendre la musique. Et i' pu' d'ordgit dépis qu'i' donne des leçons d'violon. Ch'tî-là s'sait à bein prés aussi bouan sus une fèrme comme un fermyi s'sait à m'suther un moussieu d'la Cour Royale pour un fa' d'habits du Dîmanche au Gagne Petit en ville.
Quandis qu'les musiciens 'taient à prendre lus vent, je r'citit la Crémation de Sam McGee et l'Homme dé d'dans la Leune, que Jock avait composé pour mé dévant m'n'aller à la Côte.
Quand vînt l'temps d'mangi, Missis Fitchet nouos invitit à nouos assiéthe à tablye, qui pathaîssait quâsi aussi bein qu'la nôtre la Séthée d'Noë, mais j'avais l'tcheur gros dé vaie ch't' achocre là de Nic'less Plaieouel s'assiéthe auprès d'Souky à la piéche dé Phlippe Fitchet.
Missis Fitchet nouos avait arrangit un fricot qui vouos faisant l'ieau v'nîn à la bouoche. Ch'tait du lard fraid, des tranches de poulet, un bieau jambon qu'était décoré avec tout plien d'persi, des betteraves dans du vînaigre, de p'tits ougnons au piclye, deux grands pâtés d'pomme, des bourdélots et des mervelles. Et pis d's'almandes, des nouaix, des codrettes, des châtaines, d's'oranges et des "Crackers" a côté d'chaque assiette.
M'n'appétit n'tait pas aussi bouanne comme d'habitude, car je r'gardais tréjous Souky d'la carre de m'n'yi pour vaie si chu Nic'less là 'tait à l'î faithe des sifèches, et en même temps jêcoutais pour ouï la porte ouvri et vaie Ph'lippe êrvenin.
Enfin l'temps s'passit, et j'nouos mîment à haler sus les Crackers, et j'oublyit quâsi Souky et Nic'less quand j'ouïs ma belle-méthe lièthe le mio d'papi qu'était dans l'cracker qu'oule avait halé avec Piteur Tout'seu, san parchonyi à la tablye.
Ch'tait:
"You will wed your partner gay
"Before Sunset next Christmas Day."
Tout l'monde s'êgouffit d'rithe, et l'pouore Piteur fut prînt d'peux et s'sauvit en s'esthusant et disant qu'il avait eune îndigestion! Ma belle-méthe riait tant qu'oulle en plieuthait!
Comme l'heuthe s'avanchait, Mérayeu dîtr qu'il 'tait renps d'sen aller siez nous, et nouos v'là tous à s'entr' souhaiter eune bouanne année et s'entr'embrachi. Et justément comme Ph'lippe entrit dans la porte, Nic'less Plaieouel avait ses bras l'tou du co' à Souky et il 'tait à l'embrachi!
J'n'ait pas acquo tout d'même perdu espéthance d'arrangi chut mathiage là avec Ph'lippe, et en attendant j'vouos souhaite à tous eune Bouanne Année.
George d'La Forge
Chroniques de Jersey 4/1/1947
Viyiz étout: