Lé Vietnam est un pays dans l'Âsie du Su'êt. Géographiquement l'pays est un long landget en forme d'S auve un mio d'laîze au Nord et au Sud mais hardi êtrait au mitan (50 kilomètres dé laîze au pus êtrait). La côte a 3,260 kilomètres dé long.
Lé clyînmat est souos-tropique au Nord et tropique au mitan et au Sud. Les montangnes et les huthieaux font les deux tchièrs du tèrritouaithe.
La populâtion du pays est dans les chent millions d'gens, et la langue officielle est l'Vietnamien.
Politiquement, l'pays est eune républyique socialiste où'est qu'lé parti Commeuniste gouvèrne lé pays, mais tchi pèrmet un marchi libre et du dêv'loppement conmèrcia.
Pouor dé l'histouaithe, y'avait des difféthents rouoyaumes sus l'tèrritouaithe jusqu'à la contchête par les Chinnouais en 111 d'vant l'Christ. Pouor dans les mille ans l'Vietnam restit souos la dominnance d'la Chinne, mais du hèrtchin dans l'êtat Chinnouais en 939 auprès l'Christ pèrmînt l'êtablyissement d'un rouoyaume Vietnamien îndépendant (mais tchi payait du tribut à la Chinne). Chu rouoyaume, souos des difféthentes dynnasties, contchéthit des tèrritouaithes au Sud, et au dgiêx-huitchième siècl'ye lé Vietnam avait pus à co l'tèrritouaithe qu'il otchupe au jour d'aniet.
Au dgiêx-neuvième siècl'ye l'Empithe Français s'en d'mentit et prînt la partie du Sud du pays en 1858 et y fit la colonnie d'Cochînchinne. Eune nouvelle dgèrre en 1883 mînt l'restant du pays souos deux protectorats sus tchi l's empéreurs avaient raîque dé l'autorité sŷmbolique. Tout coumme en 1887 les trais tèrritouaithes fûtent încorpouothés dans l'Îndochinne Française.
En 1940 lé Japon otchupit l'Îndochinne Française. Quand l'Japon s'rendit en 1945, lé front nâtionna Vietnamien m'né par lé parti Commeuniste prînt l'pouver. Mais la France èrgângnit douochement du tèrritouaithe tout coumme la dgèrre entre les Français et les nâtionnalistes continnuait. Auve lé souôtchein d'la Chinne commeuniste les Vietnamiens en gângnaient, et auprès eune dêfaite militaithe, les Français r'connûtent l'îndépendance du Nord du pays. Lé tèrritouaithe 'tait don divisé en deux auve l'empéreur théoriquement au pouver au Sud. Eune républyique du Sud fut procliâmée, et eune dgèrre civile entre les deux êtats Vietnamiens c'menchit. L's Améthitchains rempliaichîtent les Français coumme lé souôtchien du gouvèrnément du Sud, et en 1964 lanchîtent eune întervention militaithe. La dgèrre fut couôtageûthe pouor les Améthitchains est lus alliés et vînt hardi împopulaithe parmi les populâtions. À la fîn l's Êtats Unnis accordîtent d'èrtither lus forches militaithes en 1973, et en 1975 les forches du Nord gaffîtent lé Sud. Lé pays fut èreunifé en 1976. La tchête du système êcononmique commeuniste à la fîn d's années 80s libéthalîsit l'êcononmie du Vietnam mais laîssit l'parti Commeuniste au pouver.
L'înfluence du Chinnouais fit les caractéthes Chinnouais l'prîncipal mouoyen d'êcrithe la langue Vietnamienne. Des missionnaithes Chrêtchiens au dgiex-septchième siècl'ye quémenchîtent à faithe sèrvi l'êcrithie Latinne pouor êcrithe lé Vietnamien, et ch't' êcrithie-là d'vînt c'meune pouor des êcrituthes Catholiques. En 1910 l'adminnistrâtion colonniale Française împôsit l'êcrithie Latinne coumme lé standard. Ouaithe qu'lé Français fûsse la langue colonniale, l'êcrithie Vietnamienne n'est pon basés sus l'Français mais a d'l'înfluence du Portûndgais fait sèrvi par les missionnaithes tch'înventîtent lé système. Nou peut distîndgi l'Vietnamien êcrit par l'usage des dgiacritiques (ou accents). Y'a des lettres tch'ont d's accents, épis nou-s-ajouôte acouo d's accents pouor èrprésenter l'ton d'la prononchiâtion. Eune lettre peut don aver deux accents sus.
Grâce à l'înmigrâtion nou peut mangi d'la tchuîsinne Vietnamienne dans des difféthents pays. Y'a eune înfluence Chinnouaise dans la tchuîsinne Vietnamienne et l'riz est eune grande partie d'l'agritchultuthe du pays. Mais l'histouaithe colonnialiste Français a laîssi des mèrques sus l'mangi du pays - par exempl'ye auve des long pains et d'la lait'tie.
Viyiz étout: