San Antonio, Texas,
U.S.A.
Lé 28 dé novembre, 1970
Moussieu l'Rédacteu,
Jeudi d'chutte sémaine 'tait l'jour d' "Actions dé Grâces", un jour "férié" en Améthique, mîns à part pour èrmèrcier L'Bouan Dgieu pour toutes les bouannes choses tch'I' nouos donne avau l's années.
Quand l's anchêtres des Améthitchains d'à ch't heu mîndrent l'pid à tèrre à Plymouth Rock, Massachusetts, en 1620, la preunmié chose tch'i' fîdrent 'tait d'lus agenouoilli sus l'hèrbe en pliein air et l'èrmèrcier pour les aver condits sains et saufs dans un nouvieau monde où'est tch'il' espéthaient pouver èrquémenchi eune vie affranchie d'touos l's embarras d'la cheinne tch'i' v'naient d'tchitter. Chutte prièthe d'èrconnaîssance fut eune Action dé Grâces tch'êtablyit la lueu d'la fouai Chrêtchienne dans l'nouvieau continnent, eune lueu tchi n'a janmais dispathu ouaithe qué la violence et la prêsse dé la vie modèrne ont fait ombrage à la trantchilité d'la vie qu'les pélérîns-pionnièrs avaient envisagi quand i' s'êtablyîdrent ichîn. auve tout l'troubl'ye d'nouos jours, L'Améthique est acouo l'pays d'belle promêsse pour lé chein tchi n'a pon d'peux d'sa peine, lé pays qu'Abraham Lincoln disait tch'était "Lé nouotre à s'en joui, lé nouotre à prêsèrver et l'nouotre à transmettre ès cheins à v'nîn!" Ouaithe qué la fouai Chrêtchienne êtablyie par les pélérîns Pilgrim Fathers a 'té assaillie bein des fais d'un côté et d'l'autre pas lé fait mème qué la libre pensée et l' "franc-parler" sont partie d'l'êvangile Améthitchaine et l'ont mînse en tchestchion, oulle est acouo pus vivante ichîn qié dans bein d'aut' pays. Nou-s-en vait la preuve quand nou vait l'nombre d'gens tchi hantent les églyises au dînmanche - dé tchi qu'nou n'vait pon fort en Jèrri d'nouos jours!
Quand, en 1621, William Bradford, passagi à bord du Mayflower, fît appel ès pélérîns d's'assemblier pour rendre grâces pour lus preunmié récolte, la priéthe fut suivie par un festîn, et v'là tch'êtablyit eune couôteunme dé rendre grâces un jour touos l's ans tch'a duthé pour pus d'trais chents ans.
Dé nouos jours, lé festîn est d'amors un r'pas d'picot rôti, mais ch'tait aut' affaithe en 1621. À chu preunmié r'pas-là, i' nouos est dit, y'avait du paîsson et d'la volaille à tathe-larigot, d'la fraîche mouothue, des honmards, des fûts plieins d'andgulle, des becques-dé-corbîn, dé vanné et d'huîtres apportés par les Îndgiens (Peaux Rouges"). Y'avait, étout, des châlotes, du vèrjus, des frâses, des frambouaises et des preunes. I' nouos est dit tch'i' y'avait étout d'la viande dé chèr et du podîn, fournis "auve l'aîgue des Îndgiens". Appathemment, les pionnièrs avaient 'té r'chus à bras ouvèrts par les Îndgiens. Dans chu temps-là, des maîsons avaient dêjà 'té bâties et 'taient habitabl'yes, et y'avait 51 pèrsonnes "survivantes" à prendre part dans l'festîn, chein tchi veurt dithe tch'i' y'avait ieu des décès dépis l'arrivée des pélérîns. Mais tchi festîn! Ch'n'est pon ravissant tch'il' avaient eune supèrbe espéthance pour l'av'nîn dans lus nouvieau monde quand i' pûdrent récolter pour produithe un festîn d'mème dans si p'tit d'temps. S'il' avaient peut ajouôter deux-s'trais cabots d'patates dé Jèrri - lé r'pas éthait 'té parfait!
Ouaithe qé ch't êvènement à Plymouth Rock dans l'Massachusetts fut l'occâsion tchi suggéthit la proclamâtion d'un jour d'Actions d'Grâces annuel, y'avait dêjà ieu eune colonisâtion Angliaîche sus les bords dé la rivièthe James en Virginie. I' pathaît qué 38 pèrsonnes avaient d's'embèrtchi là lé 14 mai, 1607, et tch'il eûdrent tchique sorte d'sèrvice au grand air comme fête des récoltes étout.
Lé Président George Washington ordonnit qué l'26 d'novembre fûsse lé jour mîns à part pour rendre grâces. Duthant la dgèrre civile, Lé Congrès Continental nommit un jour spécial châque année à l'exception d'l'année 1777, et l'Président James Monroe en nommit iun en 1812. Lé Président Lincoln chouaîsit l'drein jeudi d'novembre en 1863 pour la fête annuelle, et touos les Présidents d'pis, sénon les trais dreins, ont nommé un jour dans chu mais-là. Franklin Roosevelt changit l'jour au traîsième jeudi, mais v'la tchi n'fut pon populaithe, et L'Congrès des Êtats-Unis s'en mêlit et lé Thanksgiving Day est obsèrvé officiellement lé quatrième jeudi d'novembre touos l's ans à ch't heu.
Tchi danmage qué nou n'peut pon r'vénîn à ches bieaux jours-là d'entréprînse par les pionnièrs, et dé r'dêcouvri la jouaie d'vivre et d'gangni sa vie par la sueu d'san front! I' m'sembl'ye qué j'vai la jouaie sus les faches dé ches chînquante-ieune pèrsonnes-là quand i' lus assiévîdrent au festîn auprès aver tchitté pathents et anmîns en Angliétèrre, crouaîsi l'Atlantique dans un p'tit bèrquot d'navithe tchi n'avait cèrtainement pon d'c'modités ni d'lyits d'plieunmes à bord, sans saver tch'est tch'i' lus pendait sus la tête en arrivant dans un pays otchupé par des sauvages, et qu'auprès un an il' avaient mênagi à bâti assez d'maîsons pour lus abriter et dêfrichi assez d'tèrre pour produithe les fruits d'un festîn pathel. Ch'n'est pon ravissant tch'i' voualaient rendre grâces au Bouan Dgieu pour touos Ses beinfaits!
George d'La Forge
Viyiz étout: