Fort Lauderdale, Florida,
U.S.A.
Lé 13 dé dézembre, 1975.
Moussieu l'Rédacteu,
Quand nou-s-est janne et qu' nou-s-attend fête dé vaie Noué v'nîn, lé temps s'pâsse tellement à la lente tch'i' vouos sembl'ye tch'i' n'arrivetha janmais, mais quand nou d'veint vièrs les jours dé Noué semblient vouos tchaie sus l'co d'vant qu' nou-s-a quâsi ieu la chance dé sé r'mett' sus ses pids d'driéthe dépis l'chein d'l'année pâssée.
Dans ma jannèche, Papa Noué 'tait un vrai pèrsonnage tchi v'nait nouos apporter des présents la Sèrvelle dé Noué. I' d'valait par la cheunm'née et m'ttait les présents dans la cauche qué nou-s-avait pendue à l'ais du foyi. I' v'nait du Pôle Nord dans un traîné hale par des Chèrs du Nord, et nou n'sé d'mandait pon comment dgiâtre qué l'traîné, tch'était sans doute un traîné fait pour ûsage sus la né et la gliaiche dépis qu' Papa Noué v'nait du Pôle Nord, pouvait gabather sus tèrre sans rouelles. Ou comment tch'i' pouvait navidgi par sus les liefs à pingnons, à trémies ou à mansardes, et s'y stâtionner quandi qu' Papa Noué d'valîsse dans la cheunm'née atout ses présents dans sa pouque. Dans l's idées înmaginnatives d's êfants, des mystéthes dé mème n'existaient pon, et comme nouos l'dit l'dévis sus l's armueûthies d'la fanmil'ye Messervy, “Au valeureux coeur, rien impossible!”, rein n'est împossibl'ye dans l's idées d'la jannèche!
Quand j'vai les jouets des mousses ichîn en Améthique, des jouets tch'éthaient r'présenté eune pétite forteune pour les campangnards à St. Ou y'a huiptante ans, j'pense au pliaîsi qu' eune orange et tchiques almandes, nouaix et codrettes, et p't-êt' eune pomme, trouvés dans la cauche remplyie par Papa Noué nouos donnait dans chu temps-là, et jé n'peux sénon penser qué les mousses d'à ch't-heu, tch'ont la vie si aîsie et tant d'jouets tch'i' n'savent pon tchi en faithe, et tchi sont bein trop avisés pour craithe tch'i' y'a rêellement un Papa Noué, manquent hardi du bonheu tch'était engendré dans nouot' vie d'mousse par lé fait qué la pauvrété du temps nouos faîsait apprécier les p'tits beinfaits d'la vie, et d'penser au bein-être des autres aussi bein comme du sien.
Dé nouos jours, la fête dé Noué n'a pon la sîngnificâtion réligieuse dé s'n originne. Oulle est dév'nue affaithe conmèrciale. Pourtant, j'chantons acouo les cantiques tch'ont pèrpétué l'histouaithe dé la condite des Rouais et des Sages au bèr du Seigneu nouvieau-né par l'êtaile dans les cieux tch'êcliaithait lus c'mîn dans l'pus bieau pèlerinnage dé tout temps. Et l'Églyise Catholique et Apostolique li'a donné lé nom dé “La Mêsse de Christ” (Christ-Mass”) que toutes les Églyises Chrêtchiennes ont adopté étout, pour souôlingni l'obligâtion d'touos les Chrêtchiens d'assister ès sèrvices réligieux pour célébrer chutte belle Fête dé la Nativité du Seigneu Jésu. Mais combein tch'i' y'en a dans l'monde à l'accepter comme eune obligâtion? Né v'la chein tchi dév'thait êt' nouot' prîncipale otchupâtion quand l'jouoyeux jour arrive, pour èrmèrcier l'Bouan Dgieu dans ses églyises sus tèrre, et joindre nouos vouaix ès cheinnes des bénis dans l'Églyise Triomphante au Paradis, dans l' “Sanctus” dé la Mêsse de Christ, pour célébrer comme i' faut, Sa Nativité. Jé n'pouvons pon nouos înmaginner la jouaie qué tant dé louange et d'adorâtion d'San Saint Nom pouorrait donner au Seigneu, assis à la drouaite du Péthe Céleste dans les cieux, si touos les Chrêtchiens du monde la célébraient d'mème, et en mème temps!
À la pliaiche dé célébrer Noué d'mème, l'affaithe est dév'nue si conmèrciale qu' un tas d'monde né pathaîssent pon réaliser la sîngnificâtion réligieuse et spirituelle de la fête. Pour ieux, ch'est un aut' jour dé vacanche tch'est payi par lé maître à rein n'faithe - comme bein d'aut' jours “fériés” duthant l'année. Un jour pour sé régaler auve du bel et du bouan et aver du rigodon dans la maîson. Ch'n'est pon pour dithe tch'i' y'a du ma ou péché dans tout chu rêvillon, mais quant à mé, j'crai qué nou dév'thait pûtôt obsèrver la fête réligieusement et r'mett' lé rêvillon à un aut' jour.
Enfîn, qué la célébrâtion s'faiche d'eune manniéthe ou d'l'autre, j'vouos souhaite. Moussieu l'Rédacteu, et à touos vouos lecteurs et à m's anmîns en Jèrri et à l'êtrangi, un Bouan Noué, Bouanne Année, Bouan pid, Bouan' yi, Bouanne dent, et l'Paradis à la fîn d'vouos jours!
George d'La Forge
Viyiz étout: