Fort Lauderdale, Florida,
U.S.A.
Lé 3 d'janvyi, 1976.
Moussieu l'Rédacteu,
Eh bein, nouos v'la dans la nouvelle année dé mil neu chent septante-six. Ch'est seux qu'un tas d'monde ont fait des rêsolutions pour lus condite duthant l'Nouvel An, mais comme nouos l'dit l'vièr diton, “Les rêsolutions du sé né sont pon les cheinnes du matîn!”, nou peut penser qu' les cheinnes du preunmié jour dé janvyi né s'sont pon les mèmes à la fîn du mais. Ch'est dans la natuthe humaine dé les faithe et dé l's oublier dans l'tîntamârre dé la vie d'touos les jours.
Lé Bouan Dgieu m'a permîns d'en vaie un tas, d'ches jours dé Nouvel An, et j'en ai veu d'toutes les sortes dans l'couothant d'ma longue vie, sus tèrre, en mé et dans l'air, en dgèrre et en paix, et les tragedies d'la vie ont empiéthi auve lé pâssage du temps. Il' empiéthent à m'suthe qué l'temps va. I' s'est dêveloppé un genre dé malfaiteux si cruel et mêchant qué nou li donne le nom dé terroriste. Ches mauvais sujets n'ont autchun respé pour la vie humaine et sont actis ichîn et mème à Londres en Angliétèrre, où'est qu' nou s'créthait l'pus en seûtheté qu' autcheune aut' pliaiche au monde. Y'a tchiques jours, eune machine înfèrnale (appelée eune “bombe” ichîn) tuit onze pèrsonnes, et en bliessit un grand nombre, dans l'aéroport dé La Guardia à New York. L'âffreuse tragedie en est qu' ch'est un tas d'înnocents d'aver fait autchun ma ès terroristes, tchi sont à pèrdre la vie. À m'n idée, il est grand temps dé r'mett' la louai en allant tch'impôse la peine dé mort pour des malfaiteurs dé mème.
Jé n'peux sénon penser à la sîmplyicité et la trantchilité d'la vie en Jèrri y'a huiptante ans. Ouaithe qué La Grand' Route des Mielles est mênommée “Five Mile Road” ou n'a pon chîn milles dé long. Mais i' y'avait chîn milles dé La Forge ès Landes, où'est qu' jé d'meuthais auve Papa et Manman, à L'Harmonie à La Mouaie à St. Brélade, ou'est qu' ma tante et Marraine, Missis Fraînque d'Aubert (née Le Feuvre) démeuthait. D'habitude, toute la fanmil'ye sé rêunissait à La Forge pour Noué, mais j'allions tréjous pâsser l'Jour dé l'An, Papa et Manman et mé, siez ma tante à La Mouaie.
I' n'y avait pon d'motos dans chu temps-là, et “la carrosse tchi va sans j'vaux”, comme lé “train” du “Jersey Railways and Tramways Ltd.” 'tait appelée par les anciens, né v'nait pon à St. Ouën. Comme j'n'avions ni j'va ni quèrre, i' fallait marchi partout, et j'sortions d'bouanne heuthe pour êt' à La Mouaie en temps pour dîner. La Route des Mielles mé pathaîssait longue (j'n'avais qué quat' ou chînq ans), et Papa et Manman 'taient oblyigis d'marchi douochement à cause dé mé. Quand j'tais lâssé, Papa m'portait sus san dos pour eune volée. Heutheusement, un anmîn fèrmyi dé m'n oncl'ye Fraînque d'Aubert v'nait nouos r'porter ès Landes à St. Ouën l'sé atout sa vainne ou san quèrre.
Pus tard, quand j'disais à Papa tch'i' d'vait en aver pliein ses braies, d'ches Jours dé l'An pâssés si liain d'siez nous, i' m'disait: “Ch'n'est rein quand j'pense qué quand il' 'taient à bâti l'Mont d'La Pulente et qué j'trempais l's ôtis dans la forge dans la carriéthe au pid du mont, j'y marchais touos les jours, d'ichîn, pour êt' là à sept heuthes du matin jusqu'à siex heuthes at sé!” Les travaillieurs dé chu temps-là n'étaient pon en grève la maîntchi du temps. Il' 'taient pus contents d'la vie qu' les cheins d'à ch't heu. I' n'avaient pon tant d'conforts, mais il' 'taient îndépendants et contents d'lus sorts.
Ch'est eune nouvelle année dans L's Êtats étout, et y'a p't-êt' des membres tch'y siégent pour la preunmié fais. Jé n'sai pon acouo l'rêsultat d's êlections tchi veinnent dé s'pâsser pour Député mais j'veins d'èrchéver la gâzette du vîngt d'novembre tchi m'dit qu' Moussieu d'La Trinn'té a 'té êlu Sénateu. J'ai tréjous 'té întérêssi dans sa carriéthe politique viyant qu' j'ai connu san Papa, Moussieu Athelstan Riley, Seigneu d'La Trinn'té. Il 'tait président du chapitre en Jèrri du “English Church Union” quand j'fus nommé ségrétaithe du chapitre à rempliaichi Moussieu Le N'veu, tch'avait 'té ségrétaithe pour bein d's années. Et j'tais présent, auve lé chant et l's “acolytes” dé l'Églyise dé St. Simon, quand la chapelle du Mangni d'La Trinn'te fut consacrés par l'Êveque Talbot dé Winchester.
Lord Halifax dé chu temps-là et Moussieu Athelstan Riley, auteur dé plusieurs cantiques dans lé “English Church Hymnal”, 'taient considéthés les pus distîndgis laïques dé l'Églyise d'Angliétèrre.
Il a pâssé hardi dg'ieau par La Corbiéthe dépis ches temps-là, et comme ou continnue à y pâsser, j'm'arrête à vouos souhaiter, et à vouos lecteurs et à touos m's anmîns, eune raide bouanne nouvelle année!
George d'La Forge
Viyiz étout: