En Israël
Le Ménage ès Feuvres,
St. Ouën.
Lé 6 d'novembre, 1976.
Moussieu l'Rédacteu,
Tchi changement d'pâtuthe! Y'a eune sémaine aniet j'tais à Jérusalem en Tèrre Sainte, au bieau solé. Arrivé à Londres l'arlévée i' faîsait fraid et i' tchiyait d'la plyie. En Jèrri un p'tit pus tard, y'avait au mains du solé à nouos faithe la beinv'nue.
Si j'avions dit à nouos anchêtres qué nou pouvait s'rêvilyi à Jérusalem et s'couochi en Jèrri l'mème jour, i' nouos éthaient probabliément dit qué ch'tait un tas d'blèrnîn et nouos éthaient d'mandé si j'les prannions pour des achocres dé craithe d'ité! Pourtant ch'est la puthe véthité. Mais i' faut sé ramémouaither qué quand j'tais mousse il éthait fallu un d'mié jour pour aller des Landes au Vièr Châté à Gouorray, et ch'est seux tch'i' y'avait un tas d'Landîns à St. Ouën tchi n'avaient janmais 'té si liain d'siez ieux. d'aut' côté, les naviguants d'la contré avaient viagi partout l'monde.
Quand j'disais au monde qué j'm'en allais en Israël, i' mé d'mandais si j'tais seux qué nou pouvait y'aller en plieine seûtheté ches jours, prîncipalement quand les gâzettes nouos disaient tch'i' y'avait du troubl'ye dans la contrée du "West Bank" (eune lîziéthe dé tèrrain d'à bein près eune mouoyenne dé vîngt milles à l'ouest dé la riviéthe du Jourdain) tchi soulait apparténîn au Rouoyaume Hachémite dé Jordanie mais tchi fut prînse par les soudards d'Israël dans lus dreine dgèrre auve les Arabes, et il' ont appathemment bouanne întention d'la garder - comme il' ont l'întention d'garder Jérusalem, couôte tchi couôte, étout.
J'n'avais pon espéthé d'pouver vîsiter les fanmeuses Hauteurs du Golan, mais j'feûnmes pèrmîns d'aller d'ssus et mème dé visiter la sentinnelle armée tchi fait la garde à l'extremité du térritouaithe Golan contchéthit et otchupé par Israël. et dans la distance à tchique chents verges nou viyait l'poste dé la sentinnelle Syrienne. et j'visitînmes partout dans l'"West Bank" sans embarras.
Nouot' visite fut mènagies superbément par lé Député Jean amy L'Maistre. i' connaît les dgides officiels en Israël, et il est appathemment en bouan rapport auve ieux car i' travaillaient parfaitement ensembl'ye pour nouos condithe ichîn et là et nouos montrer l'pays comme i' faut. et i' faut admettre, sans doute, qué j'tions un parti d'seize pèrsonnes tch'accordaient comme des clioches, et v'la tch'asseûthe lé contentement et l'pliaîsi d'un viage à
l'êtrangi en bouanne compangnie. I' vaut mème la peine dé r'corder lus noms comme bouan souv'nIn d'nouot' viage: L'docteu Frank Le Maistre, OBE, et sa danme; Moussieu Clifford Alexandre et sa danme; Moussieu George Richardson et sa danme; lé jeune Moussieu Andrew Kinnaird (d'Angliétèrre) et sa danme; Mesdanmes Margaret Stephen et Hazel M. Hewitt, Mdlles. Eva et Grace Le Sueur. Et pis j'avions eune danme, Mdme. L. Mignot, tch'est dans sa nénantième année et èrmèrquabliément alèrte pour sén âge, tréjous d'bouanne heunmeu et prête à prendre part dans toutes les excursions. Heutheusement, sa fille, Mdme. Stella L. Wavell, 'tait auve nous étout. Et l'Député Jean Amy L'Maistre et mé.
Nouot' preunmié s'maine fut pâssée à Tibériade au bord dé la Mé d'Galiée. J'tions louogis dans eune hôtel Juive, et j'peux la r'quémander. située sus la hauteu, oulle a eune belle veue d'la mé, et nou-s-y mange divèrsément bein et nou-s-y jouit d'touos les comforts. en arrivant, j'èrmèrtchis la grandeu d'la ville dé Tibériade dé nouos jours. Quand j'tais là y'a vîngt-chînq ans ch'tait un p'tit village. a ch't heu, ch'est eune ville dé conséquenche. Oulle est d'amain pour des visites ès alentours. J'pâssînmes la grand' partie d'un jour à visiter Capharnaüm, ville împortante dans la vie d'Notre Seigneu. Ch'tait là, et dans l's envithons, tch'I' fît un tas d'Ses discours et d'Ses mithacl'yes. J'pouorrais mème êcrithe eune articl'ye au sujet, mais ché s'sa pour eune aut' fais. J'allînmes, étout, sus la Montangne des Béatitudes, où'est qué l'Seigneu prêchait souvent. et pis dans l'églyise bâtie ès envithons d'la pliaiche où'est tch'I' donnit à mangi à la foule tchi s'était assembliée à l'ouï prêchi, en multipliyant les sept pains et deux paîssons. Oulle est appelée "L'Églyise dé la Multiplicâtion".
Nouot' deuxième sémaine fut pâssée dans eune hôtel Arabe ("Strand Hôtel") à Jérusalem. Jé n'm'en vais pon êprouver à vouos raconter tout chein qué j'fînmes comme visites dans chutte ville sanctifiée par lé martythe dé Notre Seigneu sus la Crouaix du Mont Golgotha. Pour mé, la ville dé Jérusalem, auve l'Églyise du Saint Sépulcre, tchi couvre chu p'tit mont-là à ch't heu, bâtie d'ssus par les C'valièrs des Crouaîsades pour consèrver lé lieu d'la Crucifixion, d'l'ensevelissement et mînse en tombe dé Notre Seigneu, es'sa tréjous un lieu d'vénéthâtion et d'pélérinage jusqu'à la fîn d'mes jours.
J'racontis ma preunmié visite dans ches lieux saints dans les bulletîns nunméthos 46 à 50 dé L'Assembliée d'Jèrriais, publiyés en 1964 et 1965. Y'a ieu bein des changements d'pis chutte visite-là, tch'eut lieu en 1951, et j'vouos en donn'nai un r'cit pus tard.
George d'La Forge
1976
Viyiz étout: