San Antonio, Texas, U.S.A.
Lé 23 d'dézembre, 1972.
N'èrvéla l'bieau jour tch'appréche: Lé jour dé naîssance dé Nouotre Seigneur Jésû-Christ, un jour qué j'dévons tous êt' èrconnaîssants d'pouver célébrer dans l'églyise et siez nous. La jouaie dait êt' êcliatante dans l'ciel quand, à toutes les Mêsses Solonnelles dé Miniet, les vouaix des fidèles sus la tèrre sé joignent ès vouaix des Anges et Archanges à l'entou du Trône en chantant les belles patholes du Gloria qu' ou pouvez vaie dans l'supèrbe sèrvice dé la Sainte Cène dans la Litourgie: “Saint, Saint Seigneur Dieu des Armées, les cieux et la terre sont remplis de Ta gloire, Ô Dieu Très-Haut, parce que Tu as donné Jésus Christ, Ton Fils Unique lequel, dans un temps pareil à celui-ci, naquit pour nous !”
Ch'est vraînment en vieillissant qu' nou-s-apprécie la jouaie et l'bonheu d'eune jannèche tch'a dispathu à m'suthe qué châque Noué a fait s'n appathance. Dans chutte jannèche-là nou criyait fiabliément à l'existance dé Papa Noué. Comme mousses, j'n'avions pon les bieaux jouets qué l's êfants ont à ch't heu, et Noué 'tait l'grand jour tch'i' y'avait p't êt' eune chance d'en trouver iun ou deux dans la cauche qué nou pendait souos l'ais du fouoyi pour êt' seux tch'i' la vîsse en d'scendant par la cheunm'née. Les jouets 'taient quand-mème pûtôt eune affaithe d'espéthance que d'réalité dans la campagne, liain d'la ville, et nou s'contentait d'l'orange ou deux, des codrettes et des nouaix qué nou trouvait dans la cauche.
La vraie jouaie 'tait d'vaie l'arrivée d'oncl'yes et tantes et les p'tits couôthîns tchi v'naient passer Noué auve Papa et Manman, et tch'apportaient tchiques présents pour mett' au pid d'l'Arbre d'Noué. I' n'tait pon d'acat, l'arbre. J'allions, Papa et mé, coper un vèrt bouais dé d'ssus tchique fôssé. Nou li donnait la pliaiche d'honneu dans eune carre du parleux ou dans la tchuîsinne viyant qu'nou-s-y mangeait l'dîner d'Noué. Pour l'orner, nou faîthait du mus qu'nou pouvait. Duthant l'année, nou sauvait autcheun mio d'papi et d'riban couleuthés. Nous copait d's êtailes et aut' objets atout l'papi, et nou faichonnait des p'tites églyises en carton et nou pendait touos l's objets et ribans dans l'arbre atout du fi à couôtre. À la pliaiche dé lantèrnes, nou pouvait alleunmer des p'tites chandelles dans des vèrres ordinnaithes, couleuthés atout d'la rouge encre et d'la bliue et d'la vèrte, et les pendre atout du fîn fi d'fé dans l'arbre. Papa gardait s'n yi d'ssus en cas d'dangi du feu.
Ch'tait eune grand' fête d'êt' auve les p'tits couôthîns. Il' apportaient les jouets trouvés dans lus cauches. S'i y'en avait tchi v'naient d'la ville, il' avaient sans doute des sûffliets, des trompettes et des p'tits tambours, et i' faîsaient assez d'tîntamârre pour dêfoncer l's ouïes ès anciens!
Y'avait des mousses tch'allaient crier lus Noué par les maîsons. I' tappaient ès portes et criyaient “Man Noué, Man Noué, s'i' vouos pliaît!” mais Papa n'mé pèrmettait pon d'y aller mé-mème. I' disait tch'i' n'voulait pon vaie autcheun membre d'sa fanmile tcheûter d'mème.
Tout l'jour nou ouiyait la vouaix solonnelle dé la clioche dé la Grande Églyise tchi sonnait sans arrêt dépit méjeu la sèrvelle jusqu'à mînniet l'jour dé Noué. Man p'pèe et m's oncl'yes allaient prendre lus tou à sonner. I' m'sembliait tréjous qué ch'tait la vouaix d'l'églyise annonçant la naissance du Seigneur des mille et mille fais pour qué tout l'monde la ouïsse!
Pour nous, mousses, lé dîner d'Noué 'tait tchiquechose à s'en litchi les babinnes toute l'année en r'vénant. I' nouos sembliait qu' touos les fricots 'taient rassembliés sus la tabl'ye. Et pis y'avait l'podîn d'Noué. Manman avait mîns des piéches dé siex sou en argent d'dans, et ch'tait tchiquechose dé pouver en trouver ieune dans l'morcé qu' ou vouos donnait. Nou miâtchait bein l'podîn pour êt' seux dé n'l'avaler pon s'il 'tait-là. Tout l'monde restait à tabl'ye eune volée et Papa nouos racontait d's histouaithes entouôrre ses viages à l'êtrangi quand i' navidgeait. Et pis i' nouos racontait des vielles crianches du temps d'Noué comme la cheinne des vaques tchi s'agenouoillaient à mînniet la sèrvelle en adoration du Seigneur, et qu' l'ieau dans les boutchets touannait en sang en mème temps, et j'éthions ieu grand' peux d'aller dans l'êtabl'ye à ch't heuthe-là!
Quand nou sé l'vait d'tabl'ye y'avait du rêvillon, des danses et des chansons, et d'vièr onze heuthes les cheins tchi d'meuthaient un but c'menchaient à s'en aller.
Lé mémouaithe dé ches bieaux jours dé Noué-là m'fait acouo apprécier la jouaie et l'mystéthe dé la Fête dé La Nativité. Piêsse-t-alle êt' un jour dé jouaie pour vous étout, Moussieu l'Rédacteu, et pour touos m's anmîns en Jèrri et à l'êtrangi, et pour touos les lecteurs dé chutte bouanne gâzette. Un Bouan Noué à tous!
George d'la Forge
Viyiz étout: