San Antonio, Texas,
U.S.A.
Moussieu l'Rédacteu,
Né v'chîn la Nouvelle Année et des vièrs comme mé sont r'connaîssants qué l'Bouan Dgieu lus pèrmet d'en r'vaie acouo ieune. La vie est eune aventuthe si întérêssante qué nou vit tréjous en espéthance. Quand nou-s-est d'la séthée nou-s-apprécyit d'autant pus la préchaine qué nou-s-a la chance dé vaie, sachant tch'i' sont nécessaithement lînmitées à l'av'nîn.
J'm'èrsouveins qué quand j'tais mousse l's anciens nouos dîsaient qué quand nou-s-avait tchiquechose dé neu, comme habit, ch'tait bouanne chance dé l'mettre pour la preunmié fais lé Jour dé l'An. eune drôle dé crianche dé chu temps-là, étout, 'tait qué ch'tait mauvaise chance si eune femme 'tait la preunmiéthe à entrer dans vouot' maîson l'preunmier Jour dé l'An. Dgieu mèrci qué ches vielles crianches-là ont dispathu auve lé pâssage du temps.
Eune chose tchi n'a pon dispathu dans l'couothant d's années est la mauvaîtchi. Les dgèrres continnuent. L'année pâssé ch'tait la cheinne du Viet-Nam. Nou la criyait finnie, mais i' pathaît tch'i' y'a dangi qu'ou r'quémenche. lé cêsse-feu entre Israël et l'Êgypte n'est pon trop seûthetabl'ye. Les malfaîteurs sont nombreux dans les grand' villes ichîn en Améthique. Y'a ieu sept chents meurtres dans la cheinne dé Detroit dans l'Michigan ch't' année, et ch'n'est ieune d'un tas d'villes tch'ont pus d'un million d'habitants.
I' y'a un manque dé disciplinne dans l's êcoles, et maîtres et maitrêsses sont souvent en grève pour pus d'gages. Nouot' gouvèrnément, êprouvant à asseûther l'fèrre-pliaie ès difféthentes races tchi constituent l'peuple Améthitchain, forche l's univèrsités subventionnés par l'Êtat d'appointer eune proportion d'femmes, néthes et blianches, comme professeurs, et eune proportion d'hommes dé race Latine (d'scendants du peupl'ye Mexitchain) dans cèrtains Êtats comme lé Texas, lé Nouvieau Mexique et l'Arizona, et d'race Afritchaine dans touos l's Êtats, chein tchi dînminnue souvent la qualité d'înstruction car il est tchiquefais nécessaithe dé mett' bas des bouans professeurs dé grande capacité et d'expéthience pour sé conformer à la louai appelée "Human Rights" engendrée par lé cri des minnorités ches dreinnes années.
Quand j'pense au manque dé disciplinne dans l's êcoles ichîn, j'sis r'connaîssant d'aver subi la disciplinne dans l'Êcole Wesleyenne à St. Ouën quand j'y étais. Dans chu temps-là, les pathents couôt'naient l'maître d'êcole, et si un mousse sé pliaingnait à ses pathents d'aver ieu la badgette quand i' r'vénait d'l'êcole, y'avait des chances qué san p'pèe lî donnIsse eune suée pour aver 'té mêchant assez pour en méthiter ieune à l'êcole! Mais nou n'pensait pon à s'pliaindre. Ouaithe qué nou criyait qué l'maître 'tait p't-êt' trop au-fait atout la badgette, nou savait en sé-même qué ch'tait juste d'êt' peunnis s'nou l'méthitait.
J'mé d'mande tch'est tchi s'pâsse en Jèrri ches jours. ch'est la preunmié chose tchi m'veint à l'idée en mé l'vant touos les matîns et en m'couochant l'sé. Les gâzettes prannent si longtemps à v'nîn d'pis qué l'grand baté Queen Elizabeth n'est pus, qué les nouvelles dé l'Îlesont tréjous un mais ou pus en r'tard quand il' arrivent. Enfîn, en Jèrri comme ichîn, né v'chîn l'temps d'faithe des rêsolutions. Nou sait bein qu'les rêsolutions du sé né sont pon les cheinnes du matîn, mais ch'est l'habitude d'en faithe, à chutte saîson ichîn, pour toute la Nouvelle Année tchi nouos attend. Combein d'fais qu'j'ai pensé, en r'vénant d'la ville quand j'sis en Jèrri, qué si touos les cheins qué j'vai à fliaûner lus temps et lus sou, jour auprès jour, dans l's aubèrges, allaient à l'églyise ou à la chapelle aussi souvent comem i' vont là, nouos lieux d'tchulte n'éthaient janmais d'bancs vièdes et s'saient riches en sou. Mais ch'est seux qu'nou n'peut pon forchi ches b'veurs-là d'faithe eune rêsolution d'changi l'aubèrge pour l'églyise!
Ch'est 'chîn l'temps d'faithe tout ch'tch'est possibl'ye pour encouothagi les bouannes oeuvres, en montrant l'exempl'ye sé-mème en fréquentant l's églyises pus souvent, et faithe les jannes aller à l'êcole du Dînmanche à la pliaiche d'êt' à couorre les c'mîns et criailli dans les rues duthant l's heuthes du tchulte, car un vièr diton nouos dit qué chein qu'nou-s-apprend janne nou n'oublyie pon vyi, et ch'est bein vrai. I' sont fanmeux, nouos vièrs ditons.
Et j'ai eune rêsolution toute spéciale à consilyi à touos les Jèrriais. J'l'ai mentionnée d'vant et j'espéthe la r'nouveler touos l's ans tchi m'restent, car j'la considéthe dé grande împortance: Ch'est d'faithe lus mousses pâler l'Jèrriais dès lus p'tits jours. Autrément, nouot' bouanne vielle langue s'en îtha d'pus en pus dans les fonds pèrdus, et ou s'en va dispathaître à tout janmais si les jannes né r'tcheinnent pon l'privilège et l'honneu d'pouver s'entre souhaiter eune bouonne et heutheuse Nouvelle Année dans la langue dé lus anchêtres.
J'vouos la souhaite à tous!
George d'La Forge.
1974
Viyiz étout: