San Antonio, Texas,
U.S.A.

Lé 19 dézembre, 1970.

Moussieu l'Rédacteu,

Né r'véchîn Noué et dépis qué j'sis trop liain d'Jèrri pour pouver châtchi d'main auve mes anmîns en lus souhaitant un Bouan Noué, et embraichi en mème temps les danmes et d'mouaîselles souos la touffe dé dgi pendue en d'ssus d'la porte en entrant, j'prends ch't occâsion d'vouos souhaiter, par êcrit, Moussieu l'Rédacteu, et à touos vouos lecteurs et à mes anmîns, un raide Bouan Noué et eune Nouvelle Année tchi vouos apportétha les choses qu'ou pouorriez d'sither pour vous-mèmes, et eune bouanne santé et tout pliein d'prospéthité!

Ch't année n'est pus d'longue duthée. Pour nous, en Améthique, ou n'nouos a pon 'couo apporté la paix, mais j'avons un Président tch'est à êprouver raide à nouos l'apporter. I' n'y a pon d'doute qué si ch'tait nouos chefs d'armées d'tèrre, des airs et d'la me tch'avaient l'autorité, y'a longtemps qu'chutte dgèrre dé Vietnam es'sait finnie, mais quand ch'est les politciens tchi c'mandent i' n'y a pon d'accord, sustout quand l'Président n'est pon du mème parti politique comme le Congrès. Il est critichi par lé Congrès quand i' fait tchiquechose, et il est crititchi s'i' n'fait pon au goût des Sénateurs du parti contraithe. À m'n idée, lé système parlémentaithe Angliais est bein pus logique. Au mains L'Preunmié Minnistre Angliais a l'support dé san parti.

La dgèrre Arabe-Israëlite n'est pon 'couo finnie ni n'tout, et y'étha p't êt' acouo du feu d'satchi d'vant qué l's Arabes rêalisent qu' Israël n'est pon aîsi à dêtruithe!

La tchestchion d'explosion d'population est acouo sus l'tapis par ichîn, et il est à noter qué l'drein récensement nouos donne eune addition tchi met l'total d'habitants à pus d'deux chents millions. Ch'est seux qué L's Êtats-Unis et La Russie s'en vont continnuer l'exploration d'l'espace et des plianètes, La Russie pour objet militaithe et L'Améthique en veue d'les coloniser dans un av'nîn qué jé n'vèrrons pon nouos-mèmes, mais tch'est eune pôssibilité pour les généthâtions à v'nîn. I' s'pouorrait, étout, que l'affaithe dé trop d'population dans l'monde es'sa rêsolue par la destruction des peupl'yes s'il arrive eune dgèrre nucléaire. Espéthons qué ch'la n's'arrivetha pon - y'éthait pus d'aventuthe à viagi es aut' plianètes qué d'êt' fricachis en vie sus chutte tèrre!

L'Assembliée des Nâtions Unies n'a pon 'couo rêussi à uni les nâtions et êtabl'yi la paix sus la tèrre. Y'a tant d'jannes nâtions tchi s'dîsent îndépendantes mais tchi sont en véthité des dictatuthes et tchi votent dé chu côté-là, qué j'sommes tréjous appelés împérialistes ouaithe qué ch'est l'pus souvent les sou et l'souôtchein d'L'Améthique et d'L'Angliétèrre tchi les gardent en vie! Quand tchi qu'j'allons vaie la Justice couronnée? Enfîn, i' pathaît qu' L'Assembliée des Nâtions Unies vaut la peine dé continnuer pour l'amour dé donner eune chance ès nâtions dé d'entr'chicangni là à la pliaiche dé s'entr'capuchi sus un camp d'batâle!

Comme Noué est la fête dé la naîssance du Prînce dé la Paix, né v'chîn l'temps d'êprouver à l'êtablyi. La preunmié chose à faithe dé chu côté-là est d'l'êtablyi entre les travailleurs et l's îndustries, pour empêchi les grèves tchi n'finnissent pon par rêsoudre autcheune chose. À m'n idée, un bouan c'menchement es'sait d'passer eune louai pour les aboli, et êtablyi un système arbitral. Un système dé mème dév'thait valer la peine d'êprouver pour asseuther l'bein-être des travailleurs. L'arbitrâtion pouorrait s'faithe sans la pèrte des jours dé travas tch'i' n'ratrappent janmais du point d'veue finnancyi viyant qué les pus hauts gages tchi gangnent sont engaûmés par la renchiéthe dé la vie tch'est l'rêsultat d'ches pus hauts gages-là!

Tch'est tchi vouos pend sus la tête en Jèrri dans la nouvelle année tch'est sus l'pas d'porte? Lé Bouan Dgieu est l'arbitre d'nouos destinnées, et i' n'y a qu' Li tchi l'sait. Ch'est seux tch'I' n's'en va pon nouos l'dithe car I' nouos a donner l'pouver d'détèrminner nouot' mode dé vie et, si pôssibl'ye, amender l'êtat d'nouos vièrs jours et nouos m'ner à eune heutheuse destinnée auve lé passage du temps et au Paradis aupres l'trépas!

Ch'est seux qué l'tîntamârre du tourisme s'en va continnuer l'êté tchi vient, mais j'trouvethai la paix au Mènage ès Feuvres à St. Ouën si L'Bouan Dgieu m'prêsèrve pour m'y r'trouver, et quand j'vai l'tîntamârre à l'entou d'mé ichîn et la violence et les meurtres et la tueûthie dans les routes par lé nombre excessif dé motos par les c'mîns, v'la tchi m'fait penser tch'i' y'a des choses acouo piéthes qué l'tourisme! Y'a quand mème eune chose qué j'voudrais vaie en Jèrri en 1971. Ché s'sait d'tchitter à bâti des maisons ou aboli les conditions tchi permèttent ès travailleurs d'hors-pays dé l's otchuper ieux-mèmes au dêpit des vrais Jèrriais, vièrs ou jannes, tch'en ont bésoin!

Piêsse La Nouvelle Année nouos apporter l'bonheu à vous, et la paix sus la tèrre!

George d'La Forge
 

Viyiz étout: