|
Je n'ai qu'deux mots à vos écrithe, Et en tchic lignes j'm'en vais vuos l'dithe: Dans deux'treis jours j'vos tchittes, bouannes gens Pour un p'tit viage de deux-treis ans: A bétôt. Ch'n'est pas pour dithe que j'sis ennié, Bein au contraithe, chès bein à r'gret Que j'sis contraint de m'en aller, Mais i' faut bein, j'peux pas rester: A bétôt. Me t'n'in ichin à faithe du drill, Nennin merci, ch'la m'donne la bile, J'sis pas escliave pour être q'mandé Et j'n'aime pas à être insulté: A bétôt. De me r'nardé dans lus sales tentes J'n'ai pas d'envie, et ils en mentent S'i disent qui l'faut, bouan gré mal gré. V'chin ma réponse, d'un ton bein sé: A bétôt. J'm'en vais ailleurs, ouest-que n'ou n'est pas Embêtaies d'même, et si en cas Que dans l'av'nin nou change la loi Eh bein, sans doute, je m'en r'veindrai: A bétôt. En attendant j'm'envais m'prom'ner, Et un mio du monde visiter Par chin par là; vaie du pays, N'ya rein d'itait comme de viagi: A bétôt. Mais j'm'en vais pas vous oubliyé, Et d'temps en temps j'vos êcrithai D'même ou séthaies de mès nouvelles Et j'peux vos en promettre de belles: A bétôt. A mes pathans, à tuous m's'amins, A mes lecteurs et mes vaisins, Tous qui m'connaissent, ou que j'connais J'lus dis à tous, oquo une fais: A bétôt.
Ph'lip d'la Golarde |
Viyiz étout: