Les Pages Jèrriaises

Le r-tou de Phlip de Terreneuve

J'avois une maitresse
Que J'aimois tendrement
Qui m'faisait des promesse
De m'aimer constamment
Mais tandis que jetois
        A gagniy l'sou
L'ingrate oul a fait choix
        D'un autre epoux

J'mengagi pour terre neuve
Deux étais un hivé
Chétoit une rude épreuve
Que j'avais à passé
Nenné me fit promettre
D'ecrire souvent
Mais j'ne r-chu qu-une seule lettre
        Au but d'un an

Mé ne r-chevant pas de lettre
Jetois à maintiy fôt
Je men fut à la r-cherche
Du couosin Jean Bilot
Y m-dit men pouore médian
        Ne ten gêne pon
Oul est mariais j'entends
        A Phlip Bisson

Mé ne voulant pas craire
Chu que l'couosin disoit
Je me mins en colere
Disant q-chla n-se pouvait
Et je jurri trées faies
        Un gros serment
Nannin j'en le créraias
        Qu-en le véyant

Arrivant en Jerry
Jugie de men m-éspé
Ch-toit vrai chu q-nou ma dit
J'failliz en affollé
Je men fut la cherchi
Ou qu-ou d'meurait
Afin de lîs r-prochi
        Sa ligiertait

Mais quand j-vins à sa porte
Oul-tait si afrontais
Ou-m répondit d'la sorte
Mait Phlip quest qu-ou voulais
Je tâchi de tnin ferme
        Et lis r-prochi
Mais y ni-eut pas une lerme
        Qui vint a s-niy

Adieu cruelle Nancy
Tu-as r-jettait me-n amour
Si tot ou me r-poussi
Et m-répondit tout court
L'amour ch'est d'la folie
        Ch-nest ren dutout
Ichin quand nou-s marie
        Chest pour des sou

 

Nicholas Bott

 

Vèrsion faite pouor eune chanson:

J'avais eune maitrêsse
Qué j'aimais tendrément
Tchi m'faîsait des promêsses
Dé m'aimer constanment
Mais tandi qué j'étais
A gângni, gângni l'sou
L'îngrate oulle a fait chouaix
D'un autre, d'un autre êpoux

J'm'engagis pour Tèrre-Neuve
Deux êtés, un hivé
Ch'était eune rude êpreuve
Qué j'avais à pâsser
Nenné mé fit promettre
D'êcrithe, d'êcrithe souvent
Mais j'n'èrchus qu'eune seule lettre
Au but, au but d'un an

Mé, n'èrchévant pas d'lettre
J'étais à maîntchi fo
Jé m'en fus à la r'chèrche
Du couôsîn Jean Billot
I' m'dit: man pouôrre médgian,
Né t'en, né t'en gêne pon,
Oulle est mathiée j'entends
A Ph'lip, à Ph'lip Bisson

Mé, né voulant pas craithe
Chein qué l'couôsîn disait
Jé mé mîns en coléthe
Disant qu'ch'la n'sé pouvait
Et jé juthis trais fais
Un gros, un gros sèrment
Nânnîn jé n'lé craithais
Qu'en lé, qu'en lé viyant

Arrivant en Jèrri
Jugiz dé man m'sespé
Ch'tait vrai chein qu'nou m'a dit
J'faillis en raffoler
Jé m'en fus la chèrchi
Ioù qu'ou, ioù qu'ou d'meuthait
Afîn dé lî r'prochi
Sa ligiéthe, ligiétheté

Mais quand j'vîns à sa porte
Oulle 'tait si affrontée
Ou m'rêponnit d'la sorte
Maît' Ph'lip tch'est qu'ou voulez?
Jé tâchis dé t'nîn fèrme
Et lî, et lî r'prochi
Mais i' n'y'eut pas eune lèrme
Tchi vînt, tchi vînt à s'n yi

Adgi cruelle Nancy!
Tu'as èrj'té mén amour
Si tôt ou m'èrpoussit
Et m'rêponnit tout court:
L'amour ch'est d'la folie
Ch'n'est rein, ch'n'est rein du tout
Ichîn quand nou s'mathie
Ch'est pour des sou, des sou
 

Viyiz étout:

 

Les Pages Jèrriaises