Les Pages Jèrriaises

Nuous Jersiais au Canada

 

Vendredi au sé, le Vinne-sept Janvi, les Membres de la Sociaitai Jerriaise du Canada eûtent lus Dînai Annuel au St. Lawrence Hall, à Montréal.

Y ya vraiement longtemps que j'n'avais pas veu une si belle racachie de masques alentou d'une table. J'arrivîmes à l'Hôtel à huit heuthes et demie, mais y'tai neuf heuthes d'vant qu'j'nouos mîmes à table. J'n'étais pas mârri, car j'avais grand faim, car y faut tout dithe, j'n'avais pas bu man thé, j'voulais en avé pour mes sous!

Ch'est pourtchi quand les portes de la Grande Salle à dînai fûtent ouvertes et qu'la proceission rentri avec notre Président Philip Messervy en tête, j'peux vuous dithe que j'n'étais pas l'dernyi dans la proceission, j'tais a maintchi mort de faim. Quand la Bainaidiction fût d'mandée par Wesley l'Brocq, qui print occouo du temps, les garçons ne printent pas grand temps à lus assièthe, et mettre les huîtres souos lus grosse dent. Il avait bein des choses sus l'programme, d's'affaithes que noun n'vait pas tuous les jours, j'pensi qué ch'tait aussi bein d'en esprouver un p'tit d'châque sorte, mais quand j'vim à la Salade Vernon, (une chance qu'y'n y'en avé pas fort) j'fût oblygi d'la laissi, ou 'tai suthe comme du vinaigre, et bein yien d'êitre aussi bouonne qu'chain qu'la bouonne femme de maithe nuous faisait quand j'tais mousse.

Enfin, quand l'podin vint sus la table j'oubliyi man d'sappointement, et, j'apprins la lesson d'n'pas esprouvai d's'affaithes qu'j'n' connaissais pas.

Aprés l'café y' nuous donnîtes un cigare qui brulît comme une cannibotte. Aprés chenchin notre Président (à peine que j'pouvîmes le vais, il avait une palme en devant d'li qui l'muchait) nouos d'mandît comme bouons Jerriais de baithe à la santei du "Roi" et du "Duc de Normandie" et, d'la maniéthe qué j'bûmes tous j'pense que j'avîmes une bouigre d'sai.

Aprés ch'na j'eumes plusieurs "toasts", et, j'êcoutîmes plusieurs "speech". Mess Laffoley rêiponnit pour "Jeirri" et y nouos fît un bein nice speech, y fût suivi par Wesley l'Brocq et A. P. Weary qui reiponnîtes aux "toasts" "Canada" et "La Sociaitai Jersiaise".

Quand l'Président q'menchit a paslé des "Associated Members" Ph'lip Le Gros, de Salmon Lake, fichit san camp car, coumme il 'tait le seul qui représentai ches membres-là y savait qu'i'lallait être obliji d'paslé, mais l'Président gardi ses yiers ouverts, et, quand Ph'lip r'vint y l'y d'mandi d'rêspondre au "toast" des "Associated Members", Ph'lip se l'vit et n'pasli pas trop piéthe pour un campagniard. Mess Vibert, de Colorado, rêiponnit pour les "Visiteurs" et Jack Nicolle pour les "Dames".

Mess Renouf raiponni pour "La Presse", mais, pour nous qu'étîmes d'l'autre but d'la table, j'n'pûmes pas entendre grand chose de t'chit qui disait. J'pense que l'Président savait qu'j'avîmes sai, car, i' nouos d'mandît d'béthe à plusieurs "toasts," qui 'n'tais pas sur l'programme, à tchi j'rêiponnîmes sans auchune hésitation.

Entre les toasts j'eûmes tchiques chansons et d'la musique. Walter Hacquoil chantît "The Maple Leaf", George Helleur, "Beautiful Jersey", et Weary nouos chantît une chanson comique; tout l'temps qui chantît y sautait dans l'air comme un jeuné gamin. Les garçons joignîtes et chantîtes les chorus avec bouon tcheu, mais, avec tout chut brit-là, il 'ne pouvîtes pas rêvilyi le Bouon-homme Tom Le Dain qui dormait comme un bouon.

Duthant la séthée j'eumes la visite d'un Mousieu Gawne qui rentri avec les ornements d'san office d'la Sociaitai "Sons of England", les garçons pensaient que ch'tait le Roi George qu'était v'nu nouos payi une visite. Quand 'il eut fini san speech, qui fut bein nice et patriotique, j'l'y donnîmes trais hourahs et le Président l'y dis qui r'grettait quin'-tai pas Jersiais. J'avîmes un Guernesiais qui nous pasli tchique note, y 'la d'l'air d'un bouon garçon.

Duthant la séthée, l'Président nouos pasli d'un Jersiais qu'a rentré dans la "Canadian Navy" comme Sub-Lieut.-Engineer, et qu'il espéthe qu'si ya une d'jerre, qui montretha un bouan exampye aux Canadiens. Comme y'a une fin à toutes bouannes choses, j'chantîmes "Auld Lang Syne" et "God Save the King" à une heuthe et demie du matin, chein qui m'fit d'la peine, parceque la Ginger-Ale n'était pas mauvaise.

Si touôs l's'autres Jersiais au Canada savaient l'piaisi que j'eûmes au Dîner, ils y veindraient tous, tant qu'a mai, j'en prins une bouone bordaie. Bouone chance à touos nouos jeunes gens.

 

Y'UN QU'ÉTAIT-LÀ.

 

Nouvelle Chronique de Jersey 4/3/1911  

 

Viyiz étout:

 

Les Pages Jèrriaises