Les Pages Jèrriaises

Nou-s-est oquo mus d' être siez sé


Bein yain d'siez mé, je m'trouve à ch't heu,
Bein des milles de terrain j'ai veu,
J'ai visité et j'ai viagi :
Je m'sis prom'né, j'ai travailli
Et veu d'bieau grain, 'té dans des minnes,
J'ai veu des ours me faithe d'laies grinnes :
Malgré tout ch'la, pour dithe le vrai,
J'aimthais oquo mus être siez mé.

D'pis que j'sortis, dans l'mais d'avri,
J'ai tout l'temps veu la scène changi :
D'abord fallait crouaîsi la mé,
Pis le Canada traverser :
De l'Est au Ouest, du Sud au Nord,
De long en large, j'vais d'touos les bords :
Mais malgré ch'la, pour dithe le vrai,
J'aimthais oquo mus être siez mé.

Y'a des chents villes où'est qu' j'ai passé
Et des douzaines qu' j'ai visité,
De Prince Albert à Regina,
De d'pis Moose Jaw jusqu'à Panser :
J'vais d'Winnipeg pour vaie Souris
Et souvent j'passe par Balgomie :
Mais après tout, pour dithe le vrai,
J'aimthais oquo mus être siez mé.

N'faut pas qu' j'oublie de mentionner
Que l'oncl'ye Sam j'vais visiter,
Car de Portal tandis qu' je sis
J'vais jusque dans l's Êtats Unis:
Mais s'i' m'fallait les nommer toutes,
Qu' j'en finithais j'ai bein des doutes :
En d'pit d'lus nombre, pour dithe le vrai,
J'aim'thais oquo mus être siez mé.

Pourtant ch'est bé que de viagi,
D'vaie les bieautés d'un autre pays,
Lacs et riviéthes, des grands hauts monts,
Crouaîsi les prairies, les vallons, .
Et sus des bieaux hauts ponts passer
Et vaie tout chein qu'i' y'a d'pus bé :
Tout d'même, m's amins, j'dis chein qu'est vrai :
Où'est qu' nou s'trouve le mus, ch'est d'étre siez sé.

 

Ph'lippe d'la Golarde

Moose Jaw,
Septembre, 1904

 

Viyiz étout:

 

Les Pages Jèrriaises