|
Au nor' de la Côte Pacifique, Dans la Colombie Brittanique, Les sauvages, avec hache et marté, Scie et rabot, tranche et couté, Se sont donnez pour lus pliaisi, Une chose de t'ch'il ont grand ordgi. Chonna s'appelle des Mâts d'Tôtèmes; N'yen a pas d'deux qui sont les même. De buoais d'sapin, en couleurs peints, Haut d'chinquante pids... sait pus ou mains... La, a l'entrée du p'tit village Ils sert d'enseigne qui dit aux sages: “L'chein qui m'a fait est homme de ben, Et ses anchèstres sont v'nus de yien.” Ches drôles de mâts sont d'simagrues Doeisiaux plieumés et d'bêtes pélus, D'paissons qui nagent dans l'air et l'yau, Et des bourdons un p'tit mio gros. I y'a des r'nards et des héthans, Des corbins niers et des rats bliancs; P't'être un ca-ouan, ou une lécarde, Ov des grands yeux qu'tout l'monde r'garde. Un lion de mé avec des dents Assez affreuses pour tuonné l'sang Des grosses baleines (respé d'honneur) Qu'écopissent a immense hauteur, Des biches barbues, et des moutons Avec des cornes qui tuonne en ronds, Des ours, des loups et des crapauds (Qui n'sont pas Jerriais, ben s'en faut) Et un serpent qu'est l'djiable li-même, Collé autou du Mât Tôtème! Et d'après chein qu'l'viers Indiens crèthe, Ches fameuses bêtes étaient lus pèthes, Maîstres d'la plie, d'la né, des vents... Mais y'a de ch'la ben, ben lontemps!
P.W. Luce |
Viyiz étout: