Les Pages Jèrriaises

Lé Bacaillot

 

La preunmié fais qu'un matelot crouaîsit l'Banc dé Tèrre-Neuve, i' lî fut înflyigi eune couôteunme qué nou-s'app'lait lé bacaillot.

La pratique 'tait d'mâter l'nouvieau matelot atout les bras alloungnis d'châque côté contre tchiquechose sus l'pont, l'amather par les ponchés et pis l'douother d'graisse et d'sie pouor lé râser auve un "râseux" d'bouais. S'il ouvrait la becque tandi tch'il 'tait à êt' douothé nou lî fouôrrait la brînge dédans.

Les cheins tchi s'otchupaient dé donner bacaillot 'taient, l'contremaître et les matelots souos li. Lé chein tchi voulait convier atout eune boutelle d'ieau d'vie ou aut' litcheu en êcappait, d'la cérémonie; ch'est en tchi n'y'en avait pon tellement souvent tch'avaient bacaillot.

La couôteunme dispathut au c'menchement du vîngtchième siècl'ye, à chein tch'i' pathaît.

Lé bacaillot 'tait s'posé d'êt' lé dgieu d'la mé ou l'faîté du Banc d'Tèrre-Neuve, et il est à r'mèrtchi qué mouothue en Portûndgais s'dit bacalhau. Y'a sans doute tchique înfluence d'là-bas.

 

Viyiz étout:

 

Les Pages Jèrriaises