Les Pages Jèrriaises

Les runs des Robîns

Fort Lauderdale, Florida,
U.S.A.
Le 10 d'avri, 1971.

Moussieu l'Rédacteu,

Dans "La Revue d'Histoire", publiée par la Société Historique de La Gaspésie, y'a un accompte du viage dé l'Abbé Ferland, en 1836, lé long des côtes dé Gaspé. "La Maison Robin" est mentionnée dans l'journal dé san viage, et ch'est întérêssant viyant qu'les Jèrriais à La Côte, et lus part dans dêveloppement du conmèrce dé chutte partie-là d'la Provînce dé Tchubec, né sont pon souvent mentionnés dans l's êcrituthes des mêssieux Cannadgiens-Français. En prîncipe, i' n'sont pon enamouothachis d's Angliais, et les Jèrriais veinnent souos chutte catégorie-là. Et pis, y'a tréjous la pensée - acouo vivante - qué "Les Robîns" faîsaient les sou et les Cannadgiens l'travas! J'pense bein qu'ch'est naturel quand nou pense à la vie duthe et pénibl'ye des gens tch'avaient à gangni lus vie à l'înjuthe du temps dans un pays fraid et couvèrt dé né tout l'hiver.

L'Abbé Ferland 'tait dévoué à sa vocâtion et à san peupl'ye. Il avait dêjà 'té autou d'La Côte 25 ans d'vant sén êvêque, et il 'tait à mains d'vaie l'progrès qu'un quart d'siècl'ye avait apporté. I' nouos dit qu'Pèrcé 'tait un village isolé. La population en 1836, compôsée d'Cannadgiens, Jèrriais et Irlandais, 'tait dans les 500 pèrsonnes. En hiver, toute la natuthe lî pathaîssait accabliée et ensevelie souos des amas d'né tchi duthaient jusqu'au mais d'mai. Les bancs d'glace s'êtendaient au liain sus la mé, et du fraid vent soûffliait constamment. L's habitants 'taient san nouvelles dé l'aut' monde tout l'hiver.

Mais quand v'nait les preunmié jours dé juîn, nouos dit l'Abbé, l'aspect changeait compliètement. Les navithes arrivaient chèrgis d'marchandises, et l's hommes et femmes et êfants s'otchupaient à apprêter la mouothue pour la saler. Y'en avait tellement d'exportée à l'êtrangi tch'i' s'arrivait souvent qu'les fanmiles du pays n'en avaient pon pour mangi dans l'tchithème, eune affaithe gênante pour lé peupl'ye Catholique Romain.

Y'avait, Moussieu Ferland nouos dit, trais maîsons tchi faîsaient l'conmèrce d'paîsson, les Maîsons Robîn, Janvrîn, et Buteau et Le Boutillier. Lé Sieur Lé Boutilyi avait travailli pour Moussieu Robîn d'vant s'associer auve lé Sieur Buteau.

Y'avait souoxante ans qu'Charles Robîn, un janne homme dé Jèrri, 'tait v'nu s'êtablyi à Pèrcé où'est tch'i' n'y avait qu'tchiques habitants. Il 'tait acti, întelligent, et bein êdutchi, et san conmèrce s'êtendit graduellement et auve succès. Dépis dgiex-neuv' ans (à ch't êpoque-là) i' s'était associé auve ses deux n'veurs. I' né d'meuthaient pon sus les lieux. Moussieu Ph'lippe Robîn viageait en France et en Italie, et dé là il env'yait ses plians et ses ordres à Moussieu Jacques Robîn en Jèrri - tch'était enchèrgi d'les faithe déver. Il' avaient les mèmes goûts et l'ajet d'lus oncl'ye et travaillaient bein d'ensembl'ye et s'accordaient comme des clioches. quand vînt un temps, il' avaient trais runs, iun à Pèrcé, iun à La Grand' Rivièthe, et l'prîncipa à Paspédgia. des jannes Jèrriais d'quatorze ans v'naient travailli d'dans. La disciplinne 'tait sévéthe, "entrant dans les plus minutieux détails de la conduite à tenir", nouos dit l'abbé, "même spécifiant les plats qui, chaque jour, doivent être servis à table!" Mais ouaithe qué les gages des commis 'taient faillis, janmais un maître n'a 'té mus sèrvi qué n'l'était Moussieu Robîn, Ches jannes Jèrriais-là d'vaient rester vièr garçon, ou bein s'i' voulaient s'mathier, lus femmes né pouvaient pon d'meuther auve ieux sus les runs. et acouo, nonobstant toute chutte disciplinne, l'Abbé Ferland nouos raconte tch'il' 'taient si louoyaux vèrs La Maîson Robîn qué s'n întéthêt sembliait s'identifier auve les leurs!

Iun des prîncipes des Mêssieux Robîn 'tait dé n'pas pèrmettre autcheune innovâtion. Par exempl'ye, i' bâtissaient des navithes. La brigue Dawn, dans tchi p'pèe et m'mèe et mes fréthes Sydney et John fîdrent lé viage dé Jèrri à Paspédgia en 1901, en 'tait iun des leu. Il avait 'té bâti à La Pointe St. Pièrre auprès d'Malbaie. Eh bein, l'histouaithe dé l'Abbé Ferland nouos raconte qué ch'tait un prîncipe êtablyi qué l'drièthe des navithes ès Robîn d'avait être dé faichon d' "tchu d'poule", évidemment eune expression en Gaspésie pour la forme en rond. Eune fais, lus maître tchèrpentchi s'mîns dans la tête dé donner eune poupe carrée à iun des navithes viyant qué l'bouais disponibl'ye et d'amain 'tait favorabl'ye pour chutte forme-là. Tchiques mais auprès, i' fut ordonné dé r'dêfaithe la poupe et d'la r'bâti en forme d'tchu d'poule - comme était l'prîncipe êtablyi!

Pour mé, ch'tait întérêssant d'lièthe entouorre la bouonne réputâtion, dêjà êtablyie en 1836 - y'a 135 ans - des Robîns à La Côte. Né v'la un exempl'ye où'est qué l'couothage, la pèrsistance et l'îndustrie d'un Jèrriais fondit, y'a 200 ans, eune maîson d'conmèrce dans un pays isolé et fraid, tch'a continnué et tchi fonctionne acouo, sans doute auve un changement d'pèrsonnel viyant l'passage du temps, jusqu'au jour d'aniet!

George d'La Forge

 

Viyiz étout:

 

Les Pages Jèrriaises