Dit mé êstche bein vrai que tan fils, tan Johnny, est ervenu d'Terreneuve?
Ta t'y apportet d'la mouothue, des nos, des éthans avec des oeuvres?
Hélas!! combein qu'jaime tout chonna, j'sais bein contente d'en avé.
Crait tu qui m'en vendret? fait mé l'piâizi d'ly d'mandé.

Ou bein si tu m'einviteais t'chique sétheais à bèthe du teais,
Tu pouorrais nos en donné eun fricot, et d'même je pouorrais l'vais.
Sans doute qu'il est bein pus piêsant et qu'il a bein grandit.
Dit mé, l'erconnaissais tu? d' pis l'temps qui tet hors, il a deu changit.

Fait y toutes sortes de p'tits teurs? comme y y'ien a qui font.
Fait y la meîne qu'il a oubliyiet l'Jerriais? conte le mé tout au long,
Où bein a t'y asseais d'esprit; pour n'avé pas d'ordgi,
Et pour que parmi les villeais y'n se faitche pas motchi.

Est t' y v'nu avec eunne ronde castchièthe faite avec d'la pai d'ourse?
Et eunne grande kâzaque bein d'oubiée avec eun collet qui r'trousse.
A t'y de chest braies qui sont courtes boutonneais sçouos le j'nou?
Et d'chest haoutes bottes, et des "gaiters" qui sont s'trappeais alentou.

Dit-mé a t'y cru eunne moustache? où p'têtre la t'y râzeaie.
Les hommes achteu sont comme les prêtres; chest eunne bein drôle d'ideaie -
D'ein gardé, ni moustache, ni barbe, ils ont l'air de "convicts".
Eun homme qu'à eunne belle grande moustache trouve eunne fille bein pus vite.

Pour ervenai a tan Johnny, pâsle t'y d'cherchi eunne femme?
Sitôt qu'ils ont bâton et montre, faut allai condithe les dames.
J'pense bein achteu qu'les p'tites drinettes te font diversément bé,
Pour tan Johnny qu'est bein einstruit, y tâchont d'latrappé.

Et pis tu l'sçait si bein comme mé, il est eun bieau garçon.
Quand y tet p'tit, qu'il tet joli; et eunne si belle complexion.
A t'y ouquo ses chveux corleais comme devant s'en allé?
Où bein les a t'y yieux coppeais si court qu'nou n'peut pas les hallé.

Oh! mais jamais j'ein l'oublithait, chu chieir petit garçon,
Quand y m'viyiait y couothait vite pour un "kiss". Oh! qui tet bon.
Chest grand domage qu'il est si grand; car y r'mendonna pas,
Y s'çait trop "shy," y sont tous d'même, mais chonna n'duthat pas.

J'ein sçait s'il est comme yieun que j'connais qu'aime eunne fille de Gouoret,
Il a ideaie quand y r'veindra, d'la d'mandé - chest un secret!!
Y n' est pas trop ergardant, y dit si chette lè est preinze,
Qui peut tréjous en choiesi eunne aoutre, car y sont quatorze ou t'chïenze.

Y n'peut pas être trop difficile; que sçait eunne soeur où l'aoutre;
Y dit qui faut qu'il en ait yieunne qui sçait belle et bein haoute,
Et pis il aime taut la famille, chest des gens bein avnants.
Y mange souvent des pommes-de-terre avec deuex-strès éthans.

Y l'zont p'têtre yieux de tan Johnny, quand y r'vint en Jerri,
De san long viage, chu pouor garçon, j'en avais grand pitchyi.
Qu'il tet content d' être ervenu vais san pèthe et sa mèthe,
Ses frèthes, ses soeurs, touos ses ammeins et san pouor vieir grand pèthe.

Ma pouore vieille garse: il est grand temps que j'men aille prépathé,
Pour man bouan homme, eun bouan fricot. Il aime eun bouan dîné.
Chest drôle que touos les hommes sont d'même, ils aiment de "bons morceaux."
Si n'ou veux les vais d'bouanne humeur; donneais lu d'bouans fricots.

Si chest que la femme veut avé eunne robe où eun chappé,
Qu'oul ait tréjous la tabïye d'giernie de "nice" choses pour dîné.
J'lavîzais de faithe la même chose pour déjeuné et teais.
Quand yia du bon à touos les r'pas, ne v'la chein qui lus piais.

Chest pouor hommes, chnest pas êtonnant quand y r'vaines pour lus r'pas;
Y sont affameais comme des loups; l'appétit n'lus manque pas.
Si chest que l'fricot sent à bon; quand ils entre dans la maison,
Lus yieux pétilles; lus fache souorit; y disent tuaus tchique chose de bon.

Et les femmes qui sont si bouannes; ont la patienche de Job,
Y lus fricache du paîson, et même lus boiolle des bobes;
Il est vrai qu'les femmes sont ernommeais de faithe tout en lus pouvé,
Pour mettre lus homme heutheuex comme eun prince en l'y donnant eun bouan dîné.

Enfein hommes et femmes preneais m'navis,
Si ou vouleais être heutheurs dans chute vie,
Ne gronneais pas!! siyïz tréjous de bouanne humeur,
Et sus toutes choses pâsleais tréjous "avec douceur."

Georgie