Le Ménage ès Feuvres,
St. Ouën.
Lé 19 dé juin, 1976.
Moussieu l'Rédacteu,
Les félicitâtions sont en ordre chutte sémaine, et j'félicite Moussieu l'Bailli tch'a monté d'grade d'Êtchuyer à Messire. Et j'félicite mén anmîn l'Docteu Fraînque Le Maistre et l's aut' mêssieux qué j'n'ai pon l'honneu d'connaître pèrsonnellement pour l'Ordre distîndgi d'O.B.E. qué Sa Majesté la Reine, nouot' Duc, lus a accordé. Ch'est mangnifique dé vaie qu' ou n'oublyie pon d'honorer les Jèrriais dîngnes dé sa faveur.
V'la tchi m'fait pliaîsi, tout partitchuliéthement, d'vaie qué l'Docteu L'Maistre, est d'chu nombre là. Ch'est à craindre qué nouot' belle et ancienne langue s'en va dispathaître, et comme j'l'ai mentionné bein des fais, ché s'sa dans ma pâraisse natale dé St. Ouën qué chutte tragédie étha lieu, viyant qu' ch'est là qu' ou duth'tha l'pus longtemps. Mais i' n'y a pon eune aut' pèrsonne au monde tch'a tant fait pour la prêsèrver comme lé Docteu Frank Le Maistre, O.B.E., et ch'n'est qu' juste qué l's honneurs lî s'saient accordés.
Pèrsonne ne sait mus qu'mé l'travas tch'il a enduthé à faithe san fanmeux dictionnaithe, et tchi sacrifice qué v'la tch'a couôté à sa charmante danme tchi s'est privée d'sa compangnie et dé s'n aîgue touos les sièrs pour pus d'dgiex ans d'temps quandy tch'il 'tait tout seu en d'vant dé s'n êcritouaithe dans s'n office à atchumuler les détails nécessaithes pour èrcorder châque mot et lî donner san genre, explicâtion, prononciâtion et usage, sén êtchivalent en Français et mème tchiquefais en Angliais et Latîn.
J'peux vouos dithe chenna auve cèrtitude car j'ai ieu l'pliaîsi, l'honneu et la chance dé d'meuther siex ieux duthant m's êtés en Jèrri dévant qué l'Ménage ès Feuvres fûsse restauré, et j'ai tréjous 'té êmèrvilyi qu' un homme pûsse ag'ver pathelle tâche tout seu.
J'n'ai pon 'couo 'té en Jèrri longtemps ch't êté, mais j'ai dêjà ieu l'pliaîsi d'aver la visite dé deux anmîns tch'ont pâssé la grand' partie d'lus vie à La Côte mais tchi d'meuthent à Montréal à ch't heu - Mdlle. Cecilia Bower, eune couôthinne au Sieur Hedley Bower d'St. Brélade, et l'Sieur W. Selwyn Bouillon, fis du feu Moussieu Eugène Auguste Albert Bouillon, dans san vivant Agent-général des Robîns à La Côte. Ch'a 'té un pliaîsi d'les r'vaie et d'lus pâler d'un tas d'pèrsonnes qué j'avons connues à La Côte et tchi n'sont pus du rangs des vivants.
Quand j'arrivais dans L'Coin du Banc, à La Côte, tch'est justément d'vant prendre la route tchi pâsse par sus la montangne pour sé trouver à Pércé, j'entrais tréjous vaie m's anmîns Ouoyamme Jean et sa damne, née Eliza Jane Bower, et j'tais seux d'aver eune tâsse dé thée en pâlant des couôthîns Bower en Jèrri. Dans chu temps-là y'avait trais soeurs Bower vivantes. Hélas! Mdlle. Ceclilia est la seule du rang des vivants à ch't heu et ch'tait un pliaîsi d'la vaie en Jèrri duthant sa preunmié visite dans l'île. Lé Coin du Banc atout sa belle pétite Églyise Anglyicanne au pid d'la montangne tchi dominne Le Coin comme eune sentinnelle, n'étha pus l'mème attrait pour mé à l'avnîn, car mes anmîns, Ouoyamme et Eliza Jean sont en r'pos dans l'chînm'tchiéthe à ch't heu, et jé n'connais pus pèrsonne là.
Lé Sieur W. Selwyn Bouillon tcheint d'san péthe pour êt' fanmil'ye et charmant. Il 'tait întérêssi d'vaie un articl'ye qué j'êcrivis à l'êgard dé Moussieu Bouillon dans l'Bulletîn nunmétho 30 (du r'nouvé d' 1960) dé L'Assembliée d'Jèrriais. Ch'tait Moussieu Donald de Carteret fis de feu l'fanmeux George W. de Carteret, tch'êcrivait l'Jèrriais souos l'nom d'plieunme “Lé Cahouain”, tch'a 'té li-mème à La Côte dans san janne temps, tch'a am'né l'Sieur Bouillon m'vaie.
En pâlant d'Paspédgia auve lé Sieur Bouillon et sa danme, née à Shigawake, j'eus l'împression tch'i' n'y a qu'un homme né en Jèrri à Paspédgia à ch't heu. Ch'est l'Sieur Arthur Ollivier, né au Ouaisné, à St. Brélade. Lé Sieur Arthur G. Le Gros, Agent-général pour les Robîns, fut né à Londres, et l'Sieur John H. Le Breton, Président d'la Maison Robin, Jones & Whitman (fis dé feu Thomas Le Breton, né en Jèrri), fut né à La Côte. Lé Sieur Ph'lippe Le Bro, né à St. Ouën et longtemps auve les Robîns, mouothit l'année pâssée. Il appréchait d'sa nénantième année.
I' y'a, en êffet, bein p'tit d'Jèrriais, nés en Jèrri, tchi d'meuthent à La Côte à ch't heu. À ma connaîssance, i' n'y en a qu' iun dans l's envithons d'Gaspé, lé Sieur John Becquet, tchi d'meuthe à Haldeman. J'pense tch'il avait eune septantaine d'années quand j'lé vinmes, lé Sieur P. M. de Veulle et mé, en mai, 1968, ch'est en tchi i' dait appréchi d'sa huiptantaine à ch't heu. I' m'dit tch'il avait deux soeurs en Jèrri, Mdlles. Evelyn et Vera.
À New Carlisle, y'a acouo l'Sieur Frank Le Gresley, pour bein d's années “Sheriff” et Juge dé Paix d'sa contrée, et fréthe dé Madanme Veuve James Le Bro, ex-Connêtabl'ye d'St. Ouën. Et l'Sieur Douglas Bathette est acouo pliein d'vie dans sa boutique à Bonaventure. I' s'pouôrrait, sans doute, tch'i' y'en a autres, mais j'en doute.
George d'La Forge
Viyiz étout: