Trenton,
Michigan, USA.
Lé 20 d'juîn, 1981.
Moussieu l'Rédacteu,
Ouaithe qué les gâzettes dé Jèrri sont trais ou quat' sémaines en r'tard par lé temps tch'i' veinnent ichîn, i' sont întérêssantes pour un Jèrriais exilé. Par exempl'ye, à ches drein j'm'étais d'mandé tch'est tch'avait gângni l'"Muratti" ch't' année. Eh bein, la gâzette du sept dé mai, tchi veint d'arriver, nouos annonce qué Jèrri est l'gângnant. Mais j'n'ai pon veu un accomopte du jeu d'dans. Fallut-i' patter pour décider tch'est tch'éthait l'vent driéthe pour quémenchi? Chose assez drôle, dgia, est tchi fallait fouoilli les spectateurs du "match" pour dêcouvri s'i' y'en avait tch'étaient armé. Et chose acouo pus êtonnante est qué la police trouvit un "blackjack", deux-s'trais coutchieaux, des chîsieaux et des balles de billiards tchi pouôrraient bein faithe du ma, car i' sont solides et b'santes. Mais lé "football" est un sport. Pourtchi qu'les spectateurs veulent êt' armés? Né v'là acouo eune aut' preuve qué tout est boulevèrsé d'nouos jours.
Y'a si longtemps qu'j'ai tchitté Jèrri qué j'ai pèrdu compte du nombre d'fais qu'Jèrri a gângni l'"Muratti" à compather à Dgèrnésy. I' m'sembl'ye tout d'même qué ch'est Dgèrnésy tch'en gângne. I' n'faut pon sans doute oublier qué l'Âne a les gambes pus longues qué l'Crapaud!
J'tais êtonné d'liéthe, dans la même gâzette, qué chîn chents tonnes dé nouvelles patates sont restées sus les mains des fèrmièrs viyant tch'i' y'en a d'trop sus l'marchi en Angliétèrre et tch'i' n'y'a pon mouoyen d'les vendre. Sabre dé bouais! Quand j'pense au goût supèrbe des nouvelles patates en Jèrri, v'là tchi m'fait l'ieau v'nîn à la bouoche! Et d'penser qu'ches 500 tonnes es'sont p't-êt' env'yées sus la maie. Ichîn, en Améthique, ch'est les patates crues dans l'Êtat dé Idaho tchi sont considéthées êt' les miyeuthes, Mais à m'n idée ch'est acouo les Rouoyales dé Jèrri tch'en gângnent.
Eune chose tchi m'a frappé en liêsant la même gâzette est qué l'Départément d'Agritchultuthe des Êtats a payi trente mille louis à un collège Angliais pour apprendre ès fèrmièrs dé Jèrri à fèrmer! Peut-i' y'aver rein d'pus riditchule! Sénon qu'ch'est dû sus la pouchette du contribuabl'ye, nou pouorrait dithe qué ch'est rîsibl'ye, et vouot' articl'ye d'fond au sujet est bein à propos. À m'n idée (et j'admets qué j'n'y connais rein, dans l'fèrmage, sénon qué j'sai qu'ch'est eune duthe vie tch'est sujette à l'înjuthe du temps) les vièrs fèrmièrs Jèrriais en connaîssent pus, entoûrre lé fèrmage, prîncipalement en ch'tchi concèrne les conditions spéciales et clyînmatiques dé l'Île, qué les théoristes Angliais n'ont janmais seu.
Dans la colonne tchi nous ramémouaithe dé chein tchi s'pâssait en Jèrri y'a septante-chînq ans, j'vai tch'i' y'avait pliainte qué les jannes embêtaient l'monde et l'traffi d'chu temps-là viyant tch'i' jouaient à "football" dans la rue St. Mar. V'là tchi montre qué ch'n'est pon d'au jour d'aniet qu'la jannèche a ieu bésoin d'disciplinne. Mais les jannes dé chu temps-là (un temps qu'j'ai connu) 'taient d's anges à compather ès cheins d'à ch't heu.
J'vai qu'la tchestchion d'înnonder La Vallée des Moulîns (mênommée "Queen's Valley") est acouo sus l'tapis, mais j'ai quâsi pèrdu espéthance dé la vaie sauvée. J'espéthe quand-même qué l'Avocat Falle, un fanmeux batilieux, n'a pon pèrdu couothage, et tch'i' s'en va y mett' la main acouo eune fais.
En liêsant la gâzette du trente d'avri j'vai, dans l'articl'ye dé "Meridian" souos l'hôlouoge, qué jé n'sis pon l'seul tchi fut d's'appointé d'la couleu adoptée par Les Êtats pour Jèrri. Sans doute, jé n'connais rein entouôrre la scienche héraldique. J'éthais laîssi l'affaithe dé la décorâtion des corps des léopards entre les mains capabl'yes dé Moussieu Ian Mackay. Mén ambition était d'vaie les trais léopards dé Nouormandie en grand sus la couleu à la pliaiche du "sautoir", dépis tch'i' sont sus nouos dotchûments officiels, nouot' monnaie, nouos tîmbres, etc. Mais j'avons pèrdu l'opporteunnité dé l's y mettre, et ou n'èrveindra probabliément janmais. I' faut don s'contenter du médiocre tch'a rêsulté.
Eune chose tch'est bein cèrtaine dans la vie est qué pèrsonne né peut s'attendre d'aver tout ch'tch'i' veurt. I' faut don s'accouôteunmer à êt' content d'l'aver d'temps en temps et d'prendre la vie comme ou veint. Et, pardessus tout, apprécier eune bouanne santé, la chose la pus précieuse au monde.
George d'La Forge
Viyiz étout: