Trenton, Michigan,
U.S.A.
Lé 22 d'mai, 1976.
Moussieu l'Rédacteu,
La gâzette du 8 d'avri est întérêssante par la divèrsité d'ses portraits et nouvelles. Sus la preunmié page j'vai l'portrait d'Moussieu L'Brun, Agent-chef des Împots. Dans la deuxième y'a l'portrait d'Moussieu l'ex-Député Allen Clarke tch'est iun d'mes bouans anmîns et vaîsîns quand j'sis en Jèrri. Dans la traisième, m'n anmîn Moussieu l'Député Jean Amy L'Maistre, dé La Brétchette, à L'Êta, est dans l'groupe en d'vant d'l'Êcole dé St. Aubîn. Dans la chîntchiéme, j'èrconnais l'portrait dé Madanme Député Baal, la charmante danme tch'était l'dguide du groupe dans tchi j'mé trouvis l'année pâssée pour visiter la vielle prison en ville. Dans la siexième, j'vai l'portrait du vénéthabl'ye Père Rey, décoré par Moussieu l'Consul dé France pour san travas d'quarante-deux ans à l'Obsèrvatouaithe St. Louis. Et pis sus la mème page nou vait l'nouvieau pavage dé dalles dans La Rue d'Drièthe tchi dait couôter un tas d'sou au pouôrre dgiâtre d'contribuabl'ye tch'était probabliément assez content d'marchi sus l'vièr pavé.
L'annonce du décès d'Mdlle. Adèle Perrédès mé ramémouaithe qu' oulle 'tait ieune des pèrsonnes qué j'fus enchèrgi d'visiter à man r'tou en Jèrri par sén anmîn l'Sieur Ernest Mourant quand j'allis l'vaie à La Nouvelle Zélande en 1963. Lé Sieur Mourant, décédé dépis tchiques années, 'tait l'fis à Philippe Le Sueur Mourant tch'êcrivait l'Jèrriais souos l'mênom dé “Bram Bilo”.
Y'a d'bouannes nouvelles dans la gâzette. J'tais content d'vaie qué l'nombre dé condamnâtions pour aver cachi des motos en êtat d'ivrêsse dinminnuit à tchînze dans l'mais d'mar en compathaison d' 38 dans l'mème mais en 1975. V'là tchi montre qué la peine dé prison est à faithe du bein. Et l'fait qué la Cour d'Appel a r'fûsé dé changi chutte condamnâtion dans un cas partitchulyi, et qué la Cour Rouoyale, siégeant en nombre supérieur, a approuvé telle peine dé prison, s'en va aîdgi hardi à combattre la baithie par les motoristes.
Eune aut' bouanne nouvelle est qué la grève des travailleurs sus la cauchie né duthit pon trop longtemps. Dans touos les cas, i' n'dév'thait y'aver d'grèves quand nou considéthe les gages d'au jour d'aniet. Nou-s-en est enn'yés car ch'est tréjours l'publyi tch'en souffre l'pus.
I' pathaît qué l'travas au Fort sus l'Mont d'la Ville c'menche à s'faithe vaie à cause du bouan progrès dreinement. I' faut féliciter Moussieu l'Député Lemprièthe-Robin pour chenna. I' fallait du couothage pour entréprendre la présidence du conmité responsabl'ye.
Les changements proposés dans la louai sus l's héthitages sont întérêssantes à compather à la louai du temps qué j'tais clèrcot dans La Rue ès Trais Pigeons. V'là tchi li donn'nait pus d'rapport auve les idées d'nouos jours, et j'crai bein qu' man protchuleux et homme d'affaithes a ieu tchiquechose à y faithe. Ché s'sa întérêssant d'vaie les débats au sujet d'ches changements là et du projet tchi concèrne la nouvelle disposition d'la boul'lie d'motos dans la ville quand v'la tchi veindra sus l'tapis dans L's Êtats.
J'vai qué lé “I.D.C.” est en train d'proposer des changements pour faithe ses règl'yes pus pliabl'yes tch'i' n'sont à ch't heu. P't-être qué ieune des raisons est l'nombre dé d'mandes dé r'considéther des décisions contraithes. I' faut s'y attendre. Quand i' y'a un changement d'présidence dé conmité, i' y'a tréjous l'idée qué l'nouvieau président est pus pliabl'ye qué l'chein dé d'vant.
Quand tchi qu'la renchiéthe dé tout s'en va s'arrêter? L'annonce qué l'couôtement du viage dé Jèrri à Londres et r'tou par avion a hauchi d'quat' louis mé donne ieune des raisons d'la renchiéthe dé man viage dé l'Améthique en Jèrri et r'tou touos l's ans. J'veins d'payi sept chent nénante-neu dollars pour man viage par avion lé 29 dé chu mais. L'année pâssée ch'tait siex chent souoxante-deux dollars. Si l'affaithe continnue à renchiéthi, lé temps veindra qu' j'éthai à empreunter des sou d'mes anmîns en Jèrri pour aller les vaie!
Les cheins tch'ont d'la propriêté à vendre en Jèrri sont à faithe des forteunes. La gâzette nouos dit qué trais propriêtés dans la Rue d'La Motte veinnent d'êt' vendues pour un d'mié million dé louis! Et i' n'y a pon assez d'sou pour payi pour deux-s'-trais minnistres pour garder l's églyises ouvèrtes! Mais ch'n'est p't-êt' pon des vrais Jèrriais tchi sont à profiter d'ches sou-là. Ma vielle généthâtion Jèrriaise 'tait pus au-faite à travailli et couoyer qu' à faithe forteune!
George d'La Forge
Viyiz étout: