Le Ménage ès Feuvres,
St. Ouën.
Lé 12 dé juin, 1976.
Moussieu l'Rédacteu,
Ieune des preunmié choses qué j'fais en arrivant en Jèrri est d'èrgarder les gâzettes du mais ou deux dé d'vant, car lé “Weekly” est un mais, tchiquefais chînq ou siex s'maines, en c'mîn d'Jèrri en Améthique et les nouvelles sont vielles par lé temps qu' j'ai ieu la chance dé les liéthe.
Ch'est întérêssant d'vaie tch'est tch'i' s'pâsse dans siex s'maines dans eune île si p'tite comme la nouotre. I' m'sembl'ye qué vèrs la fîn d'l'année pâssée, lé Député Ph'lippe de Veulle nouos dit qué l'temps 'tait arrivé tch'i' y'avait assez d'maiethons bâties et “projetées” pour la populâtion d'chu temps-là. Eh bein, i' faut qu' la population aie grandi hardi d'pis, car L's Êtats sont tréjous d'mandés d'en autoriser acouo pus. Et j'criyais qu' la tchestchion d'bâti dans l'Mathais à Bieaumont, à St. Pièrre, avait ieu tant d'opposition qu' oulle avait 'té abandonnée. Mais nannîn, j'vai tch'i' y'en a acouo pâlement. Mais chein tchi m'fait pester est d'vaie qu'la gâzette însiste d'appeler l'Mathais "Goose Green"! Tchi dgiâtre d'îndividu tch'a înventé ch't âffreux mênom là?
Et v'la tchi m'fait chose dé vaie les mênoms tch'ont 'té donnés ès belles vallées tch'i' y'a tchestchion d'mett' souos l'ieau - "Queen's Valley" (Les Reines) et "Fern Valley" (Maupertus). Lé fait qué la tchestchion d'les dêtruithe (heutheusement tch'i' y'a acouo assez d'Jèrriais d'restant tch'ont ieu l'avis d'opposer telle destruction) est souvent dans les nouvelles ches jours éthait 'é eune bouanne opporteunité pour la gâzette dé lus donner lus vrais noms. I' m'veint à l'idée, ma fîngre, qué p't-êt' qué la raison qu'les mênoms "Goose Green", "St. Ouen's Pond" et "Five Mile Road" continnuent à êt' faits sèrvi par la gâzette et un tas d'monde tchi dév'thaient saver mus, est probabliément viyant qu'un tas des Membres d's Êtats n'pouorraient pon prononcer les vrais noms comme i' faut! Autrément qu'les Connêtabl'yes et Députés campangnards, combein tch'i' y'en a d'ieux tchi savent paler l'Jèrriais?
J'sis tréjous întérêssi à r'garder les portraits dans la gâzette, et dans la cheinne du quatre dé mai j'vai l'chein d'un vièr anmîn, lé sieur Wilfred Bridgieaux, tchi d'meuthe à Ottawa au Cannada où'est qué j'l'ai veu bein des fais. Nou pâle dé s'dêhaler, mais né v'la un Jèrriais tchi n's'est pon seulement dêhalé, i' s'est mîns à couorre lé travèrs dé plusieurs cârriéthes, c'menchant comme clèrcot dans la cârriéthe dé la louai en Jèrri et sautant dans la cârriéthe dé la douanne au Cannada. Ayant finni d'cârrier, né v'la-t-i' pon tch'i' s'met à administrer sèrment à têmoins et membres d'jury dans les Cours dé Justice à Ottawa, la belle capitale du Cannada!
Wilfred Bridgieaux est un charmant corps, et san succès dans la vie n'a pon gâté san caractéthe fanmilyi et hospitalyi. J'avons ieu l'pliaîsi, man fréthe Sydney et mé, dé joui dé s'n hospitalité à Ottawa à l'occâsion d'mes visites au Cannada. I' sont tréjous prêts, li est sa charmante danme, à vouos r'chéver à bra ouvèrts quand nou va par là. I' s'est distîndgi dans les milieux juridiques dé la capitale et est eune vraie exempl'ye dé la manniéthe qué les Jèrriais, par lus îndustrie, honnêteté et bouan comport, rêussissent dans lus entréprînses à l'êtrangi.
Dans la gâzette du onze dé mai, j'vai l'portrait d'un aut' Jèrriais tchi s'est dêhalé et distîndgi dans l'conmèrce, chutte fais en Jèrri - l'ex-Député d'St. Sauveux, Maît' Ph'lippe Syvret, natif dé St. Ouën ouaithe tch'i' d'meuthe en ville. Jé l'félicite et j'lî souhaite jouaie à l'occâsion du nénantième annivèrsaithe dé san jour dé naissance. Il est iun des pus vièrs St. Ouënnais du rang des vivants, si pon l'pus vyi.
L's articl'yes tchi donnent les "mémoires" dé feu Walter L'Bro, rapporteux-chef dé l'"Evening Post", un moussieu qu'j'ai bein connu, sont hardi întérêssants. I' m'ramémouaithent un tas d'choses qué j'ai veu mé-mème dans l'temps pâssé. Quand j'tais Commis-Vicomte j'allais à toute les entchêtes auve Reginald Raöul Lempriethe, Êcr., Seigneu d'Rôzé et Vicomte, et j'tais membre du jury. I' fallait aller vaie les cadâvres dévant s'assiéthe comme jury pour dêtèrminner la cause dé la mort, et j'mé rappelle du pus triste spectacl'ye qué j'vis dans ches temps-là. Ch'tait d'vaie les cadâvres dé siex garçons d'seize et dgiex-sept ans, rangis l's uns à côté d's autres, tch'avaient 'té n'yés en lus bangnant dans la baie du Portelet.
Un accompte dé chu triste êvènement pathaît dans les “mémoires” du Sieur Le Bro dans la gâzette du treize dé mai, 1976. Y'en eut sept dé n'yés en mème temps, et l'septième fut trouvé tchiques jours auprès l'entchête pour les six et i' fallut eune aut' enchête pour li. Les sept garçons 'taient en pliaine santé. Il' taient êtudiants au collège “Highlands” des Jésuites. Chu tèrribl'ye êvènement eut lieu lé sept dé juillet, 1915, et fut eune vraie tragédie, non seulement pour les pathents d'ches pouorre garçons, mais pour lé Père Jésuite tch'était en chèrge dé la bangnole et tchi fut quâsi n'yé li-mème en êprouvant à les sauver.
Les accomptes du Sieur Walter L'Bro sont d'un întéthêt exceptionnel et dév'thaient êt' publiés en forme d'livre.
George d'La Forge
Viyiz étout: