Lé Ménage ès Feuvres,
St. Ouën.
Lé 28 juin, 1969.
Moussieu l'Rédacteu,
Dans ieune des gâzettes dé chutte sémaine, j'viyais qué l'Juge dé la P'tite Cour avait jugi quarante-deux causes dans l'mème jour! Tchi jour dé travas! Quand j'tais Commis-Vicomte y'a chînquante-chînq ans, ché n'tait pon souvent tch'i' y'en avait pus qu'trais ou quatre. Lé pus du temps i' n'y en avait qu'ieune ou deux, et ch'tait rare tch'il éthait fallu siégi l'arlévée.
Ch'tait l'Juge John Vaudîn tchi présidait la Cour dans chu temps-là, et i' n'y avait pon fort dé motos par les c'mîns. Dé nouos jours ch'est âffreux d'vaie l'nombre d'gens présentés pour en aver cachi quandi tch'il 'taient êbédés par la bouaisson ou des drogues. En Améthique y'a des sîngnes partout tchi disent S'ou b'vez, n'cachiz pon, et s'ou cachiz, né b'vez pon! Eune bouanne idée, n'est-che pon? V'la tchi né f'thait pon d'ma d'aver eune chentaine dé ches sîngnes-là ichîn en Jèrri, où'est qué l'baithe est bouan marchi, les motos nombreux et l'monde prêssis! Et jé n'sai pon pourtchi tch'i' sont si prêssis quand i' sont à cachi lus motos en Jèrri. Les distances sont si p'tites tch'i' n'peuvent pon aller liain assez pour qué la vitesse faiche grand' difféthence à l'heuthe dé l'arrivée. J'ai r'mèrtchi qu'à trente milles à l'heuthe nou-s-est à la vaie d'tout l'monde et qué quand i' vouos passent i' vouos jettent un r'gard comme si nou-s-avait la minne meurtriyi, et pis nou les r'trouvent arrêtés à la préchaine rouoge veue ou au préchain dêtou tchi fait prendre tou à tou!
L'Député de Veulle dé St. Cliément avait eune fichue bouanne idée quand i' lus dît dans L's Êtats qué d'haler la licence dé cachi à un motoriste - pour autcheun d'lit ou crînme - lî f'thait pus d'ombrage qué d'lé mett' en prison. J'avais r'gret d'vaie tch'i' n'y avait pon fort dé membres dans La Chambre tch'étaient dé s'n avis. Quant à mé, l'idée qué v'la tchi nouos don'nait mains d'motos dans les routes et mains d'îndividus dans la prison vaut la peine dé considéther, et p't êt' qué l'Député de Veulle, tch'a un tas dé p'tits boudîns dans la tête, pouorra penser à tchique aut' chose pour arriver à chu rêsultat-là!
J'viyais étout, dans la gâzette, qué L's Êtats sont en train d'nommer un nouvieau conmité pour êprouver à réglier les disputes entre l's îndustries et les sŷndicats des travailleurs. N'en v'la, eune tache! I' faut espéther tch'i' y'étha mouoyen d'passer eune louai pour pouver présenter les parties à un contrat, aussi bein l'maître comme l'empliyé, dévant Justice, si iun ou l'autre romps l'contrat. Dans chu cas-là, nou pouôrrait finni l'êcrituthe du contrat par les mots si bein connus ès vièrs Jèrriais: Et Jurèrent lesdites parties que jamais contre les prémisses elles n'iront ni ne feront aller, à quoi nous les condamnâmes à peine de parjure.
En pâlant d'condamnâtions, j'avons la chance qué j'né d'meuthons pon souos les conditions qu'nouos anchêtres avaient à supporter y'a quat' chents ans. Dans L'Histouaithe dé Jèrri par M. de la Croix, j'liêsais l'aut' jour qué ieune des peunnitions d'chu temps-là 'tait d'coper l's ouothelles ès coupabl'yes - et i' n'fallait mème pon êt' coupabl'ye dé grand' chose pour aver à subithe chutte cruauté-là! En 1533, lé Sieur Andrieu Lescauday fut condamné à l's aver copées pour cause dé larcin et malgouvernement, et pour faithe l'affaithe acouo pus cruëlle, i' li fut ordonné d'garder ses g'veux copés pour qué nou visse tch'i' l's avait pèrdues, ses ouothelles!
Un cas, acouo pus barbare qué ch'ti-là ouaithe tch'i' s'arrivit en 1787, deux chents ans pus tard, 'tait l'cas d'un nommé Brouard. I' n'est pon dit tchi ma tch'il avait fait. Auprès aver ieu eune ouothelle copée, i' pathaît qu'ou t'nait acouo un mio car il êprouvit à la r'cliuter en pliaiche. Viyant ch'la, l'Député-Vicomte li arrachit l'morcé tch'était copé, ramâssit un cliou et un marté et l'fit cliouer à ieune des portes d'la prison! J'vouos asseûthe qué j'sis r'connaissant d'n'aver pon ieu à exétchuter ou seurvilyi pathelle peunnition quand j'tais Commis-Vicomte en 1914!
Plusieurs cas sont mentionnés où'est qu'les malfaiteurs tch'avaient fait tchique dro 'taient fouëttés jusqu'au sang tout l'long du c'mîn d'la porte d'La Cohue Rouoyale au chînm'tchièthe. Et en 1635, lé nommé Noël Briart, forbanni pour crînme dé vol, èrvînt dans l'Île en 1639, quatre ans auprès. I' fut saîsi et condamné à êt' pendu! Il' 'taient tendres, nouos anchêtres!
Heutheusement, les temps ont changi. Ouaithe qué l'Jugé dé La P'tite Cour est accâblié d'travas d'nouos jours, jé n'sis pon en faveur dé coper l's ouothelles ès malfaiteurs, mais j'aimethais bein vaie l'Juge condamner l's îndividus auve des longs g'veux tchi vont d'vant li à l's aver copés au ras. Quand j'en vai atout des g'veux d'mème dans la ville, j'mé d'mande tchiquesfais si ch'est fille ou garçon!
George d'La Forge
Viyiz étout: